នៅវេលាម៉ោង ១៣:៥០នាទី ថ្ងៃទី០៤ មិថុនា ឆ្នាំ២០១៩នេះ មានគ្រោះថ្នាក់ចរាចរណ៍មួយបានកើតឡើង នៅចំណុចក្បែរសាលាយាយអេង ស្ថិតនៅភូមិចុងស្រុក សង្កាត់សៀមរាប ខេត្តសៀមរាប បង្ករឡើងដោយឡានដឹកដីមួយគ្រឿង ពាក់ស្លាកលេខ ប.ជ ៣A ០១៥៧ បានបុកស្ត្រីម្នាក់ដែលកំពុងជិះកង់ បណ្តាលអោយស្ត្រីរងគ្រោះស្លាប់ភ្លាមៗនៅកន្លែងកើតហេតុ។
ជនរងគ្រោះមានឈ្មោះ បេ វ៉ុន ភេទ ស្រី អាយុ ៥៧ឆ្នាំ មុខរបរ លក់ឈូក ស្នាក់ជាមួយប្អូន ភូមិភ្នំក្រោម សង្កាត់សៀមរាប ក្រុងសៀមរាប។
បើតាមប្រភពពីពលរដ្ឋនៅកន្លែងកើតហេតុ បានអោយដឹងថា មុនពេលកើតហេតុគេឃើញរថយន្តដឹកដីមួយគ្រឿង ម៉ាក ហ៊ីណូ ពណ៌ស ពាក់ស្លាកលេខ ប.ជ ៣A ០១៥៧ បើកបរដោយជនមិនស្គាល់ឈ្មោះ បើកបរទិសដៅពីលិចទៅកើតក្នុងល្បឿនយ៉ាងលឿន លុះមកដលចំណុចកើតហេតុ រថយន្តបានបត់ទៅទិសខាងត្បូង ក៍បុកជនរងគ្រោះចំពីក្រោយពេញទំហឹង បណ្ដាលឲ្យជនរងគ្រោះស្លាប់ភ្លាមៗនៅនឹងកន្លែង ហើយខណ:ពេលនោះ ជនបង្គក៏បានព្យាយាមបើកឡានរត់គេច តែដោយសារកង់របស់ជនរងគ្រោះនៅជាប់ខាងក្រោមឡាន បើកបានចំងាយប្រហែល ៣០០ម៉ែត្រ ក៏ត្រូវបានប្រជាពលរដ្ឋ នឹងប្រជាការពារនៅក្បែរនោះ ស្ទាក់ឡានជាប់នឹងចាប់ជនបង្ករ ប្រគល់អោយសមត្ថកិច្ចតែម្ដង់។
ក្រោយកើតហេតុសមត្ថកិច្ចក៏បានប្រគល់សពជនរងគ្រោះទៅឲ្យក្រុមគ្រួសារយកទៅធ្វើបុណ្យតាមប្រពៃណី រីឯជនបង្គត្រូវបានសមត្ថកិច្ចបញ្ជូនខ្លួនទៅសាលាដំបូងខេត្តដើម្បីចាត់ការតាមផ្លូវច្បាប់៕
អត្ថបទ និង រូបភាព៖ ខេង ឧត្តម
