កាលពីថ្ងៃទី០៤ ខែមិថុនា ឆ្នាំ២០១៩ម្សិលមិញនេះ លោក នាក់ ណេរ៉ុន អភិបាលរងខេត្ត និងជាតំណាងដ៏ខ្ពង់ខ្ពស់ ឯកឧត្តម ទៀ សីហា អភិបាល នៃគណៈអភិបាលខេត្ត សៀមរាប បានជួបពិភាក្សាការងារ ជាមួយប្រតិភូកម្មវិធីស្បៀងអាហារពិភពលោក ដឹកនាំដោយ លោកស្រី ERDELMANN Francesca នាយិកា កម្មវិធី ស្បៀងអាហារពិភពលោកប្រចាំប្រទេសកម្ពុជា និងមានការចូលរួមពី លោកនាយករងរដ្ឋបាល នាយករងទីចាត់ការអន្តរវិស័យ នាយករងទីចាត់ការទំនាក់ទំនងសាធារណៈ និងសហប្រតិបត្តិការអន្តរជាតិ និងប្រតិភូអមដំណើរកម្មវិធីស្បៀងអាហារពិភពលោក ។
លោកស្រី ERDELMANN Francesca នាយិកាអង្គការស្បៀងអាហារពិភពលោក ប្រចាំ ប្រទេស កម្ពុជា បានមានប្រសាស៍ថា កម្មវិធី ស្បៀងអាហារពិភពលោក (WFP) នៃអង្គការសហប្រជាជាតិ គឺជាអង្គការដ៏ធំមួយដែលប្រយុទ្ធប្រឆាំងនឹងភាពអត់ឃ្លាន និងបានធ្វើការទូទាំងពិភពលោក ដើម្បីធានាថា គ្មានកុមារណាម្នាក់ដែលចូលគេងទាំងនៅឃ្លានអាហារឡើយ ហើយគ្រួសារក្រីក្រ និងគ្រួសារងាយរងគ្រោះទាំងអស់ ជាពិសេស ស្ដ្រី និងកុមារ អាចទទួលបាននូវអាហារ ដែលមានអាហាររូបត្ថម្ភ តាមតម្រូវការរបស់ពួកគេ។
លោកស្រី ERDELMANN Francesca ក៏បានថ្លែងអំណរគុណដល់ថ្នាក់ដឹកនាំខេត្តសៀមរាប និងរាជរដ្ឋាភិបាលកម្ពុជា ពិសេស សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលបានអញ្ជើញប្រតិភូ និងមន្ត្រីនៃប្រទេសទាំង៦០ លើពិភពលោក ដែលបានទទួលការឧបត្ថម្ភពីអង្គការស្បៀងអាហារ ពិភពលោកដើម្បីរៀបចំកិច្ចប្រជុំដ៏ធំមួយនៅខែធ្នូ ឆ្នាំ២០១៩ខាងមុខ ហើយខេត្តសៀមរាបគឺជាម្ចាស់ផ្ទះនៃកិច្ចប្រជុំនេះ។
មានប្រសាស៍ក្នុងឱកាសនោះដែរ លោក នាក់ ណេរ៉ុន អភិបាលរងខេត្តសៀមរាប ក៏បានថ្លែងអំណរគុណយ៉ាងជ្រាលជ្រៅ ចំពោះលោកស្រីនាយិកាប្រធានប្រតិភូ និងក្រុមការងាររបស់អង្គការស្បៀងអាហារពិភពលោក(WFP) ទាំងអស់ដែលបានជួយទំនុបម្រុងឧបត្ថម្ភអាហារមកលើស្ដ្រី និងកាមារកម្ពុជា ជាពិសេស សម្រាប់ការឧបត្ថម្ភកម្មវិធីអាហារដល់សាលាបឋមសិក្សាចំនួន ៤០៦ នៅក្នុងខេត្តសៀមរាប។
សូមបញ្ជាក់ផងដែរថា កម្មវិធីស្បៀងអាហារពិភពលោក បាននឹងកំពុងអនុវត្តកម្មវិធីអាហារតាមសាលារៀន នៅក្នុងខេត្តទាំង ៨ រួមមាន ខេត្ត សៀមរាប បាត់ដំបង ឧត្តរមានជ័យ កំពង់ធំ ព្រះវិហារ ស្ទឹងត្រែង កំពង់ឆ្នាំង និងខេត្ត ពោធិ៍សាត់ ។ ហើយគោលបំណង នៃកម្មវិធីនេះគឺក្នុងគោលបំណង៖
១- ដើម្បីបង្កើននូវលទ្ធភាពទទួលបានការអប់រំ ធានាបានការមករៀនទៀងទាត់ កាត់បន្ថយការបោះបង់សិក្សា ថ្នាក់បឋមសិក្សា
២-កាត់បន្ថយ ភាពស្រេកឃ្លានរយៈពេលខ្លី
៣-ពង្រឹងការអភិវឌ្ឍន៍របស់កុមារ និងការចុះឈ្មោះចូលរៀនបានត្រឹមត្រូវតាមអាយុកំណត់
៤-បង្កើនភាពជាម្ចាស់ដល់ថ្នាក់ជាតិ អភិវឌ្ឍន៍សមត្ថភាព និងលើកកម្ពស់និរន្តរភាពសង្គម ៕
អត្ថបទ និងរូបភាព ៖សីហរិទ្ធ
