នៅថ្ងៃទី៤ ខែមិថុនា ឆ្នាំ២០១៩នេះ យុវជនកាកបាទក្រហម កម្ពុជា វិទ្យាល័យ ហ៊ុនសែន ស្វាយធំ ស្រុកប្រាសាទបាគង ខេត្តសៀមរាប ចំនួន ៣២ នាក់ បានចុះធ្វើការផ្សព្វផ្សាយ សុវត្ថិភាពចរាចរណ៍ ដល់កុមារ នៅអនុវិទ្យាល័យ និងសាលាបឋមសិក្សា ហ៊ុនសែនស្វាយធំ ក្នុងឃុំកណ្តែក ស្រុកប្រាសាទបាគង ដោយមានការដឹកនាំលោកស្រី សំ សាវ៉ាង មន្ត្រីគម្រោងសុវត្ថភាពចរាចរណ៍ និងការសហការជាមួយមន្ត្រី នគរបាលអធិការស្រុក មន្ត្រីបុស្តិ៍ឃុំកណ្តែក សាខាកាកបាទក្រហមកម្ពុជាខេត្តសៀមរាប និងកុមារចូលរួមសរុបចំនួន១៥៩នាក់ ។
មានប្រសាស៍ក្នុងឱកាសនេះដែរ លោកស្រី សំ សាវ៉ាង បានឱ្យដឹងថា បច្ចុប្បន្នគ្រោះថ្នាក់ចរាចរណ៍ គឺជាបញ្ហាប្រឈមដ៍ធំរបស់ប្រទេសកម្ពុជា វាបានសម្លាប់មនុស្សជារៀងរាល់ថ្ងៃ បានធ្វើឱ្យបាត់បង់ធនធានមនុស្ស បន្សល់ទុកនូវកុមារកំព្រា ស្ត្រី មេមាយ ជនពិការ ប៉ះពាល់ដល់សេដ្ឋកិច្ចប្រទេសជាតិ និងខូចខាតសណ្តាប់ធ្នាប់សង្គម គឺបណ្តាលមកពីអ្នកប្រើប្រាស់ផ្លូវមិនគោរពច្បាប់ចរាចរណ៍ បើកបរក្រោមឥទ្ធិពលគ្រឿងស្រវឹង បើកបរហួសល្បឿនកំណត់ និងមិនពាក់ មួកសុវត្ថិភាព នៅពេលធ្វើដំណើរ។
លោកស្រី សាវ៉ាង បានបន្តថា អ្នកបើកបរយាយន្តគ្រប់ប្រភេទគួរតែមានការគោរព និងប្រុងប្រយ័ត្នខ្ពស់ នៅពេលមកដល់ជិតសាលា ជាពិសេសត្រូវបន្ថយល្បឿនផង ដើម្បីរួមគ្នាកាត់បន្ថយ ការស្លាប់និងរបួសដោយសារគ្រោះថ្នាក់ចរាចរណ៍។
ក្នុងសកម្មភាព ផ្សព្វផ្សាយមានចែកខិតប័ណ្ណសុវត្ថិភាពចរាចរណ៍ ផ្សព្វផ្សាយព័ត៌មានពីស្ថានភាពគ្រោះថ្នាក់ចរាចរណ៍ វិធីពាក់មួកឱ្យបានត្រឹមត្រូវចែកខិតប័ណ្ណស្តីពីស្លាកសញ្ញាចរាចរណ៍សំខាន់ៗ សារសុវត្ថិភាព ថ្ងៃនេះថ្ងៃស្អែកកុំឱ្យមានគ្រោះថ្នាក់ចរាចរណ៍ ផងដែរ។
សូមបញ្ជាក់ថានៅក្នុងយុទ្ធនាការនេះបានការគាំទ្រ និងសហការ ដឹកនាំ ពីគណៈគ្រប់គ្រងសាលា អ្នកគ្រូទីប្រឹក្សាយុវជនកាកបាទក្រហមប្រចាំសាលា ដើម្បីចូលរួមកាត់បន្ថយអត្រាស្លាប់ របួស ពិការ ដោយគ្រោះថ្នាក់ចរាចរណ៍ និងលើកម្ពស់សិទ្ធិជនពិការ ហើយយុទ្ឋនាការផ្សព្វផ្សាយនិ ងចែកខិតប័ណ្ណស្តីពីសុវត្ថិភាពចរាចរណ៍និងពិការភាពនេះ គឺក្រុមយុវជនកាកបាទក្រហម បានពន្យល់ដល់សិស្សានុសិស្ស ឱ្យពួកគាត់បានយល់អំពីវិធីពាក់មួកសុវត្ថិភាព និងជម្រុញដល់ពួកគាត់ពេលបើកបរត្រូវពាក់មួក និងពាក់ខ្សែក្រវ៉ាត់សុវត្ថិភាពឱ្យបានជាប់ជាប្រចាំ បើកបរទៅតាមល្បឿនកំណត់ គោរពស្លាកសញ្ញាតាមដងផ្លូវ ជាដើម។ល។
អត្ថបទ និងរូបភាព៖ យូ វង្ស
