អ្នកជំនាញអាដហុកនៃគណៈកម្មាធិការអន្ដរជាតិសម្របសម្រួល ការគាំពារ និងអភិវឌ្ឍន៍តំបន់ប្រវត្តិសាស្ដ្រអង្គរ ហៅកាត់ថា អាស៊ីស៊ី-អង្គរ លោកសាស្ត្រាចារ្យ មួនណឺ ប៊ូឆិនណាឃី(Mounir Bouchenaki) បញ្ជាក់ថា ការសម្រេចព្រះទ័យផ្លាស់ប្ដូរទីតាំងកុដិដែលមានអាយុកាលយូរណាស់មកហើយ របស់ព្រះសង្ឃនៅវត្តលលៃ ក្នុងស្រុកប្រាសាទបាគង ខេត្តសៀមរាប គឺជាការលើកស្ទួយការអភិរក្សមរតកដូនតាខ្មែរ និងយល់ពីតម្លៃបេតិកភណ្ឌពិភពលោក។
នៅថ្ងៃទី០៣ ខែមិថុនា ឆ្នាំ២០១៩ នៅក្នុងដំណើរចុះតាមដានអនុសាសន៍ពាក់ព័ន្ធនឹងបច្ចេកទេសនៃកិច្ចការអភិរក្ស ជួសជុលប្រាសាទនៅតំបន់ឧទ្យានរលួស លោកសាស្ត្រាចារ្យ មួនណឺ ប៊ូឆិនណាឃី(Mounir Bouchenaki) បានបញ្ជាក់បន្ថែមថា ចំពោះទឹកចិត្ត និងឆន្ទៈនៃការលះបង់របស់ព្រះសង្ឃគង់ក្នុងវត្តលលៃនេះ លោកនឹងធ្វើរបាយការណ៍មួយជូនទៅគណៈកម្មការបេតិកភណ្ឌពិភពលោក ដើម្បីជម្រាបអំពីភាពជាគំរូរបស់កម្ពុជាក្នុងកិច្ចការអភិរក្សនិងអភិវឌ្ឍន៍រមណីយដ្ឋានបេតិកភណ្ឌពិភពលោក។
ក្នុងនាមអ្នកសម្របសម្រួលដ៏សំខាន់ជាមួយព្រះសង្ឃនឹងការអភិរក្សប្រាសាទ ព្រះមេគណខេត្តសៀមរាប ព្រះអង្គ ជុំ គឹមឡេង មានសង្ឃដីកាថា នាពេលកន្លងមក វត្តលលៃ ជាវត្តដែលមានការសាងសង់កុដិ សាលាឆាន់ ព្រះវិហារនៅលើខឿនប្រាសាទបុរាណ ហើយសំណង់នោះ វានឹងធ្វើឲ្យប៉ះពាល់កាន់តែធ្ងន់ធ្ងរដល់គ្រឹះប្រាសាទ និងតម្លៃប្រាសាទ។ ប៉ុន្តែព្រះអង្គសប្បាយប្រទ័យ ដែលវត្តលលៃក្លាយជាគំរូទីមួយ ដែលយល់ពីតម្លៃបេតិកភណ្ឌ ដោយព្រះសង្ឃ អាចារ្យ គណៈកម្មការវត្ត ពុទ្ធបរិស័ទបានចូលរួមការពារសម្បត្តិដូនតាដោយក្តីស្រឡាញ់ ហើយព្រមនិមន្តផ្លាស់ទីកុដិមកគង់នៅខាងក្រោម តាមអនុសាសន៍របស់គណៈកម្មាធិការអាយស៊ីស៊ី-អង្គរ ដើម្បីទុកលទ្ធភាពឲ្យអ្នកជំនាញថែរក្សា និងអភិរក្សប្រាសាទ។
ព្រះតេជគុណ ក៏បានអរគុណដល់អាជ្ញាធរជាតិអប្សរា ចំពោះកិច្ចសម្របសម្រួលផ្សេងៗ និងបានដង្ហែផ្កាប្រាក់សាមគ្គីក្នុងការសាងសង់កុដិថ្មីប្រគេនព្រះសង្ឃថែមទៀត។ ព្រះតេជគុណក៏សំណូមពរឱ្យញោមញាតិចេះស្រឡាញ់ ចេះថែរក្សា ចូលរួមការពារសម្បត្តិដូនតា សម្បត្តិបេតិកភណ្ឌពិភពលោក បើកាលណាយើងនាំគ្នាសាងសង់ផ្ទះ សាលា វត្តអារាមនៅក្បែរប្រាសាទដោយមិនបានថែរក្សា ការពារត្រឹមត្រូវ វានឹងនាំឱ្យមានផលប៉ះពាល់ដល់តម្លៃជាតិ កេរមរតកដូនតាឱ្យខូចខាតមិនខាន៕
អត្ថបទ និង រូបថត ៖ លោក អ៊ិន សីហរិទ្ធ
កែសម្រួលអត្ថបទ ៖ លោក សេង ផល្លី
