លោក នាក់ ណេរ៉ុន អភិបាលរងខេត្តសៀមរាប បានមានប្រសាសន៍ថា នៅព្រឹកថ្ងៃទី ០៣ ខែមិថុនា ឆ្នាំ២០១៩នេះ លោកបានដឹកនាំក្រុមការងារចម្រុះរបស់រដ្ឋបាលខេត្ត អាជ្ញាធរក្រុងសៀមរាប និងមន្ទីរអង្គភាពពាក់ព័ន្ធ ចុះរុះរើស្លាកយីហោ ប៉ាណូផ្សព្វផ្សាយពាណិជ្ជកម្ម ដែលគ្មានច្បាប់អនុញ្ញាត ឬអស់សុពលភាព ដើម្បីរៀបចំសណ្ដាប់ធ្នាប់សាធារណៈ និងត្រៀមខ្លួនប្រឡងប្រណាំងទីក្រុងស្អាតផងដែរ ។
លោក នាក់ ណេរ៉ុន មានប្រសាសន៍ទៀតថា មានកត្តា០៣យ៉ាង ក្នុងយុទ្ធនាការចុះរុះរើនេះ គឺទី១. រៀបចំសោភ័ណភាពខេត្តឲ្យសក្ដិសមជាខេត្តទេសចរណ៍ ដើម្បីត្រៀមប្រកួតប្រជែង និងប្រឡងប្រណាំងទីក្រុងស្អាត , ទី២. ធ្វើឲ្យស្របតាមច្បាប់ ស្ដីពីការផ្សព្វផ្សាយពាណិជ្ជកម្ម និងបទដ្ឋានមួយចំនួនរបស់ក្រសួងស្ថាប័នពាក់ព័ន្ធ ដូចជា អង្គភាពពន្ធដារ , ក្រសួងពាណិជ្ជកម្ម , រួមទាំងក្រសួងវប្បធម៌ និងវិចិត្រសិល្បៈជាដើម និងទី៣ ដើម្បីរកចំណូលថវិកាមូលដ្ឋាន ដល់អាជ្ញាធរក្រុង ស្រុក ខេត្ត ព្រោះបច្ចុប្បន្ន រាជរដ្ឋាភិបាលបានប្រតិភូកម្មអំណាចមកថ្នាក់ក្រោមជាតិ ដើម្បីឱ្យមានចំណូលមូលដ្ឋាន ដូច្នេះបើសិនជាក្រុមហ៊ុន ឬប្រជាពលរដ្ឋ ដំឡើងស្លាកយីហោ ប៉ាណូផ្សព្វផ្សាយពាណិជ្ជកម្មគ្មានច្បាប់ទម្លាប់ត្រឹមត្រូវ វានឹងធ្វើឲ្យបាត់បង់ចំណូល និងគ្មានសណ្ដាប់ធ្នាប់ផងដែរ ។
លោក នាក់ ណេរ៉ុន មានប្រសាសន៍បន្ថែមទៀតថា ក្នុងយុទ្ធនាការនៅព្រឹកនេះ អាជ្ញាធរខេត្ត នឹងចាប់ផ្ដើមអនុវត្តសកម្មភាពពីចំណុចគល់ស្ពានថ្មព្រះរាជដំណាក់ ទៅទិសខាងកើតស្របតាមបណ្ដោយផ្លូវជាតិលេខ ៦ ហើយតំបន់មួយចំនួនទៀត នឹងអនុវត្តបន្តនៅពេលក្រោយ ដោយអាជ្ញាធរខេត្ត នឹងបន្តអនុវត្តដូចភ្លៀងរលឹម ដើម្បីរៀបចំសោភ័ណភាពខេត្ត ដូច្នេះ តាមរយៈនេះ សូមអំពាវនាវដល់ប្រជាពលរដ្ឋ ឬក្រុមហ៊ុនឯកជន ដែលមានស្លាកយីហោ ប៉ាណូផ្សព្វផ្សាយពាណិជ្ជកម្ម ត្រូវចូលរួមសហការជាមួយក្រុមការងារចម្រុះរបស់រដ្ឋបាលខេត្ត និងមន្ទីរអង្គភាពពាក់ព័ន្ធ ដើម្បីអនុវត្តការងារឱ្យមានប្រសិទ្ធភាព ហើយបើសិនជាមានចម្ងល់ ពាក់ព័ន្ធជាមួយនឹងការសុំច្បាប់ ដើម្បីដំឡើងស្លាកយីហោ ប៉ាណូផ្សព្វផ្សាយពាណិជ្ជកម្មផ្សេងៗ ត្រូវទំនាក់ទំនងសួរព័ត៌មានជាមួយអាជ្ញាធរ ឃុំ សង្កាត់ ក្រុង ស្រុក ឬមកអាជ្ញាធរខេត្តសៀមរាប ។
គួរំលឹកថា គិតត្រឹមម៉ោង១១ព្រឹកមិញនេះ ក្រុមការងារចម្រុះ បានចុះរុះរើ និង កាត់ផ្ទាំងផ្សព្វផ្សាយពាណិជ្ជកម្ម បានចំនួន០៩ផ្ទាំង ៕
អត្ថបទ និង រូបថត ៖ លោក បុង ឆវ័ន
កែសម្រួលអត្ថបទ ៖ លោក លីវ សាន្ត
