កាលពីពេលថ្មីៗកន្លងទៅនេះ ក្រុមការងារថ្នាក់កណ្តាលចុះ ជួយ ឃុំខ្នារពោធិ ស្រុកសូទ្រនិគម ដឹកនាំដោយឯកឧត្តម សែស វង្សសត្ថា មេបញ្ជាការរងនិងជានាយសេនាធិការនៃបញ្ជាការដ្ឋានកងទ័ពជើងអាកាស និងជាអនុប្រធានក្រុមការងារចុះជួយឃុំខ្នារពោធិ និងលោកជំទាវ ព្រមទាំងសមាជិកសមាជិកាក្រុមការងារ បានរៀបចំការជួបជុំកុមារនៅសាលាបឋមសិក្សាខ្នារពោធិ ដោយមានការចូលរួមពីកុមារាកុមារី ជាង២០០នាក់ ដើម្បីអបអរសាទរខួបលើកទី ៧០ ទិវាកុមារអន្តរជាតិ ០១ មិថុនា ២០១៩ , ខួបលើកទី ១៨ ទិវាពិភពលោកប្រឆាំងពលកម្មកុមារ ១២ មិថុនា និងទិវាកុមារកម្ពុជាឆ្នាំ ២០១៩ ក្នុងន័យ បញ្ជ្រាប ការយល់ដឹងដល់កុមារអំពីប្រវត្តិនៃទិវានេះ បើទោះបីជាកុមារទាំងនេះ មិនបានកើតនៅក្នុងសម័យនោះក៏ពិតមែន។
មានប្រសាសន៍ក្នុងឱកាសនោះ ឯកឧត្តម សែស វង្សសត្ថា បានរំលឹកឡើងវិញពីព្រឹត្តិការណ៍ប្រវត្តិនៃថ្ងៃទី១ មិថុនា ដែលកាលពីថ្ងៃទី១ ខែមិថុនា ឆ្នាំ១៩៤២ ពួកហ្វាស៊ីសហ៊ីត្លែរ បានសម្លាប់រង្គាលប្រជាជននៅលីឌីស៊ែរ (អតីតប្រទេសឆេកូស្លូវ៉ាគី) អស់ចំនួន១៩២នាក់នៅក្នុងសួនកសិដ្ឋាន អ៊ូរ៉ាក់ ក្នុងនោះមានកុមារចំនួន១០៥នាក់ ហើយលើសពីនេះ ម្តាយរបស់កុមារតូចៗ ត្រូវគេបញ្ជូនទៅជុំរុំប្រមូលផ្តុំនៅកសិដ្ឋានមួយ ខណៈកសិដ្ឋាននោះ ត្រូវបានគេដុតបំផ្លាញចោលទាំងស្រុង និង នៅថ្ងៃទី១០ ខែមិថុនា ឆ្នាំ១៩៤៤ សកម្មភាពស្រដៀងគ្នានេះពួកហ្វាស៊ីស បានប្រព្រឹត្តិទៅលើ អូរ៉ាឌូ ប្រទេសបារាំង ដោយចាប់មនុស្សប្រុសស្រីចំនួន១.១០០នាក់ ចាក់សាំងដុតទាំងរស់ ដែលអំពើទាំងនេះ ត្រូវបានសាធារណៈមតិទូទាំងសកលលោក ថ្កោលទោសយ៉ាងខ្លាំងបំផុត ហើយពួកហ៊ីត្លែរ ទទួលបរាជ័យនៅឆ្នាំ១៩៤៥ ដោយកម្លាំងសម្ព័ន្ឋមិត្ត។
ឯកឧត្តម សែស វង្សសត្ថា មានប្រសាសន៍ទៀថា សម្រាប់កម្ពុជា ប្រទេសយើងធ្លាប់បានឆ្លងកាត់សង្គ្រាម និងរបបប្រល័យពូជសាសន៍ បានបំផ្លិចបំផ្លាញប្រទេសជាតិខ្ទេចខ្ទីដល់ឬសគល់ ហើយប្រជាជននិងកុមាររាប់លាននាក់ រងការកាប់សម្លាប់យ៉ាងព្រៃផ្សៃជាងពួកហ្វាស៊ីសទៅទៀត ប៉ុន្តែដោយសារគុណបំណាច់នាថ្ងៃរំដោះ៧មករា១៩៧៩ ប្រជាជនកម្ពុជាត្រូវបានសង្គ្រោះឱ្យរស់ឡើងវិញ និងធ្វើការកសាងនិងអភិវឌ្ឍន៍ប្រទេស តាំងពីបាត ដៃទទេរ រហូតមានការរីកចម្រើន និងអភិវឌ្ឍលូតលាស់លើគ្រប់វិស័យ ព្រមជាមួយនោះសិទ្ឋិជាមូលដ្ឋានរបស់កុមារ ក៏ត្រូវបានអភិវឌ្ឍន៍ជាបន្តបន្ទាប់ផងដែរ។
ឯកឧត្តម សែស វង្សសត្ថា មានប្រសាសន៍បន្ថែមថា ទិវា១មិថុនានេះ ត្រូវបានពិភពលោកប្រារព្ឋឡើងជារៀងរាល់ឆ្នាំ ហើយការជួបជុំរបស់យើងនៅក្នុងឱកាសនេះ គឺដើម្បីឲ្យក្មួយៗកុមារ បានយល់ដឹងពីប្រវត្តិដ៏សែនឃោរឃៅ ដែលបានប្រព្រឹត្តមកលើកុមារនៅតំបន់អឺរ៉ុប សម្រាប់ជាការយល់ដឹង និង ពិសេសជាងនេះ គឺចង់សំណេះសំណាលនិងសួរសុខទុក្ខក្មួយៗក្នុងពេលសម្រាកពីការសិក្សា ផង ដើម្បីបង្ហាញភាពស្និទ្ឋស្នាលនិងក្តីនឹករលឹកដល់ក្មួយៗក្នុងមូលដ្ឋាននេះ ខណៈដែលគ្រប់សកម្មភាពរបស់កុមារកម្ពុជា ត្រូវបានយកចិត្តទុកដាក់ខ្ពស់ពីថ្នាក់ដឹកនាំរាជរដ្ឋាភិបាលគ្រប់លំដាប់ថ្នាក់ ទាំងអង្គការសង្គមស៊ីវិល និងប្រជាពលរដ្ឋគ្រប់មជ្ឈដ្ឋាន ក្នុងគោលបំណងគាំពារ ថែរក្សា ជំរុញការអភិវឌ្ឍដើម្បីកុមារក្លាយទៅជាយុវជនល្អពលរដ្ឋល្អរបស់សង្គមជាតិក្នុងពេលអនាគត ប៉ុន្តែបំណងរបស់អ៊ំពូមីង មាតាបិតា អាណាព្យាបាល លោកគ្រូអ្នកគ្រូ គ្រប់រូប ចង់បានពីក្មួយនូវផលតបស្នងវិញ សុំតែម្យ៉ាងគត់ គឺចង់ឃើញក្មួយៗ ខិតខំសិក្សារៀនសូត្រ ប្រព្រឹត្តតែអំពើល្អ ចៀសឆ្ងាយពីគ្រឿងញៀន និងកុំសេពគប់អំពើអបាយមុខគ្រប់ប្រភេទ ដែលសង្គមស្អប់ខ្ពើម ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
