នៅវេលាល្ងាចម៉ោង៧:២០ នាទី ថ្ងៃទី២៩ ខែឧសភា ឆ្នាំ២០១៩ ស្ត្រីជាភ្ញៀវទេសចរជនជាតិអ៊ីរ៉ង់ ដែលត្រូវចោរ២នាក់ឆក់កាបូបនោះ ទទួលបានលិខិតឆ្លងដែន និងឯកសារសំខាន់ៗមួយចំនួនទៀតវិញហើយ បន្ទាប់ពីសមត្ថកិច្ចប្រឹងប្រែងស្វែងយ៉ាងហ្មត់ចត់ នៅក្នុងព្រៃតំបន់អង្គរ។
បន្ទាប់ពីទទួលបានចម្លើយសារភាពពីជនសង្ស័យទាំង២នាក់ កម្លាំងសមត្ថកិច្ចជំនាញ សហការជាមួយ កម្លាំងប៉ុស្តិ៍រដ្ឋបាលនគរបាលគោកចក បានចុះធ្វើការរុករកនៅតាមព្រៃនៃតំបន់អង្គរ ដែលជនសង្ស័យបានបោះចោលសម្ភារៈ ដែលឆក់បានពីជនរងគ្រោះ។ ជាលទ្ធផល កម្លាំងសមត្ថកិច្ច បានរកឃើញនូវលិខិតឆ្លងដែន និង ឯកសារសំខាន់ៗមួយចំនួនទៀត របស់ជនរងគ្រោះ ។
ដោយមានការយកចិត្តទុកដាក់ខ្ពស់ ពីឯកឧត្តម ទៀត សីហា អភិបាលខេត្តសៀមរាប ក្នុងករណីចោរឆក់លើស្ត្រីជាភ្ញៀវទេសចរជនជាតិអ៊ីរ៉ង់នេះ តំណាងរដ្ឋបាលសាលាខេត្ត និងស្នងការរងនៃស្នងការដ្ឋាននគរបាលខេត្តសៀមរាប បានអញ្ជើញទៅ ប្រគល់លិខិតឆ្លងដែន និងឯកសារសំខាន់ៗមួយចំនួនទៀត ក្នុងឱកាសនោះផងដែរ។
បន្ទាប់ពីទទួលបានលិខិតឆ្លងដែន និង ឯកសារសំខាន់ៗមួយចំនួនទៀត អ្នកស្រី ហ្វាទីមី អារ៉ាប់សេក ជាជនរងគ្រោះ បានថ្លែងអំណរគុណចំពោះ ការយកចិត្តទុកដាក់ របស់ឯកឧត្តមអភិបាលខេត្ត ក៏ដូចកម្លាំងសមត្ថកិច្ចក្នុងខេត្តសៀមរាបទាំងអស់ ចំពោះករណីរបស់អ្នកស្រី។
អ្នកស្រីហ្វាទីមី អារ៉ាប់សេក សំណូមពរដល់ តុលាការផ្ដន្ទាទោស ចំពោះជនល្មើស ទៅតាមច្បាប់នៃព្រះរាជាណាចក្រកម្ពុជា ។
សូមជម្រាបថា បន្ទាប់ពីអ្នកស្រីហ្វាទីមី អារ៉ាប់សេក ភ្ញៀវទេសចរជនជាតិអ៊ីរ៉ង់ ជាបុគ្គលិកធ្វើការក្នុងធនាគារលំដាប់ពិភពលោកមួយ បានជួបករណីចោរឆក់កាបូបកាលពីថ្ងៃទី២៦ ខែឧសភា ឆ្នាំ២០១៩ ខណៈពេលនោះ មានសារព័ត៌មានមួយចំនួនបានធ្វើការផ្សព្វផ្សាយព័ត៌មានរបស់អ្នកស្រី រួមនឹងស្នាកស្នាមរបួសលើផ្ទៃមុខ យកទៅផ្សព្វផ្សាយដោយពុំបាន សុំការអនុញ្ញាតពីអ្នកស្រី ដែលដំណឹងនេះ បានបង្កឲ្យប៉ះពាល់ដល់សតិអារម្មណ៍របស់កូនស្រីវ័យ១៤ឆ្នាំ របស់អ្នកស្រីកំពុងសិក្សា និងប្រឡង។ ហើយអ្នកស្រីបញ្ជាក់ថា ប្រសិនបើស្នាកស្នាមរបួសនេះមិនមានការជាសះស្បើយទេ អ្នកស្រីពិតជាមានការសោកស្ដាយ និងខ្មាសអៀនខ្លាំងណាស់។
អត្ថបទ និង រូបថត៖ លោក គឿន វេត
កែសម្រួលអត្ថបទ ៖ លោក សេង ផល្លី
