ជនសង្ស័យ២រូប ដែលបានឆក់កាបូប ស្ត្រីជនជាតិអ៊ីរ៉ង់ ត្រូវបានឃាត់ខ្លួនហើយ នៅថ្ងៃទី ២៩ ខែឧសភានេះ នៅមន្ទីរសន្តិសុខខេត្តសៀមរាប នៃពន្ធធនាគារខេត្តសៀមរាប។
ហេតុការណ៍បានឡើងនៅវេលា ៦ និង៣០នាទីព្រឹក ថ្ងៃទី ២៦ ខែឧសភា ឆ្នាំ២០១៩ ដោយស្ត្រីជនជាតិអ៊ីរ៉ង់ទាំង២នាក់ ធ្វើដំណើរតាមរ៉ឺម៉ក់ម៉ូតូកង់បី នៅតាមដងផ្លូវកូម៉ៃ ឆ្ពោះទៅកាន់ប្រាសាទអង្គរវត្ត ស្ត្រីជនរងគ្រោះបានសង្កេតឃើញមានបុរសពីរនាក់ បានតាមមើលគាត់តាំងពីកន្លែងលក់សំបុត្រចូលមើលប្រាសាទមកម្ល៉េះ លុះមកដល់ពាក់កណ្តាលផ្លូវ ជនទាំងពីរនាក់នោះ បានធ្វើសកម្មភាព ឆក់ទាញកាបូបរបស់គាត់ ធ្វើឲ្យមានការប្រទាញប្រទង់គ្នា រហូតស្ត្រីម្នាក់ធ្លាក់ពីរ៉ឺម៉ក់ បោក ទៅនឹងផ្លូវបណ្តាលឲ្យរងរបួសជាំភ្នែកខាងស្តាំ និង រលាត់ដៃជើង រីឯជនសង្ស័យក៏ដណ្ដើមយកកាបូប និងគេចខ្លួនបានដោយសុវត្ថិភាព ។
តាមការបញ្ជាក់របស់សមត្ថកិច្ច ក្រោយពីបានទទួលពាក្យបណ្តឹង និងក្រោមការយកចិត្តទុកដាក់ខ្ពស់របស់ឯកឧត្តម ទៀ សីហា អភិបាលខេត្តសៀមរាប និងជាប្រធានគណៈបញ្ជាការឯកភាពរដ្ឋបាលខេត្ត និងក្រុមមន្ត្រីនគរបាលជំនាញ បានចុះធ្វើការស្រាវជ្រាវយ៉ាងមមាញឹក និង បានធ្វើការឃាត់ខ្លួនបានជនសង្ស័យ ចំនួន ៥នាក់ ហើយត្រូវបានធ្វើទៅតាមនីតិវិធីផ្លូវច្បាប់ ។ ក្នុងការចង្អុលបង្ហាញរបស់ជនរងគ្រោះនាពេលនោះ សមត្ថកិច្ចក៏បានបញ្ជាក់ថា ក្នុងចំណោមជនសង្ស័យទាំង៥នាក់នេះ ជនសង្ស័យ ២នាក់ ត្រូវបានឃាត់ខ្លួន នៅរសៀលថ្ងៃទី២៧ ខែឧសភា ឆ្នាំ២០១៩ ដោយជនទាំងពីរនេះបានជិះម៉ូតូជាមួយគ្នា ។
អត្ថបទ និង រូបថត៖ លោក ម៉ី សុខារិទ្ធ
កែសម្រួលអត្ថបទ ៖ លោក សេង ផល្លី
