អង្គការសហភាពអន្តរជាតិ ដើម្បីការអភិរក្សធម្មជាតិ IUCN (International Union for Conserva tion of Nature) និងមូលនិធិភាពជាដៃគូ សម្រាប់ប្រព័ន្ធអេកូឡូស៊ី ដែលរងការគម្រាមកំហែង (CEPF) កាលពីថ្ងៃទី២៨ ខែឧសភា ឆ្នាំ២០១៩ បានរៀបចំសិក្ខាសាលា វាយតម្លៃចុងក្រោយរបស់ខ្លួនសម្រាប់ដំណាក់កាលទី២ ក្នុងតំបន់ឥណ្ឌូ-ភូមា នៅខេត្តសៀមរាប។ សិក្ខាសាលានេះបានពិភាក្សាទៅលើបញ្ហានៃការអភិរក្សចម្បងៗ ដែលកំពុងជួបប្រទះនៅតំបន់ដែលសំបូរទៅដោយជីវចម្រុះ ដើម្បីធ្វើការផ្តល់ជំនួយសម្រាប់យកទៅធ្វើការអភិរក្សឱ្យចំគោលដៅ។
លោក អ៊ុក វិបុល ប្រធាននាយកដ្ឋានអភិរក្សជលផលនៃរដ្ឋបាលជលផលនៃក្រសួងកសិកម្ម រុក្ខាប្រមាញ់ និងនេសាទ បានថ្លែងថា ការផ្តល់ជំនួយរបស់CEPFសម្រាប់ទៅលើការងារអភិរក្សជីវៈចម្រុះ គឺពិតជាមានសារសំខាន់ និងបានរួមចំណែកដល់គោលនយោបាយអភិរក្សជីវចម្រុះ និងជលផលរបស់រាជរដ្ឋាភិបាលកម្ពុជា ជាពិសេសការកំណត់អត្តសញ្ញាណកាលានុវត្តភាពថ្មីៗនិងអាទិភាពសម្រាប់ការអភិរក្សជីវចម្រុះនៅក្នុងតំបន់។
លោកបានបន្តថា សម្រាប់វិស័យជលផលIUCNបានសហការជាមួយរដ្ឋបាលជលផលបានកំណត់តំបន់ដែលមានជីវៈចម្រុះច្រើន ហើយកំពុងទទួលការគំរាមគំហែង និងបានកំពុងគិតគូរខ្ពស់ទៅលើការអភិរក្សប្រភេទសត្វដែលប្រឈមការគ្រោះថ្នាក់ខ្លាំង ដូចជាអណ្តើក ត្រីរាជ ត្រីគោលរាំង ផ្សោត កន្ទាយក្បាលអង្កែបជាដើម។
ព័ត៌មានជាតិ ថ្មីៗ
លោក គង់ គឹមស្រេង ប្រធាននាយកដ្ឋានអភិរក្សដីគោកខាងត្បូងបឹងទន្លេរសាប នៃក្រសួងបរិស្ថាន បានមានប្រសាសន៍ដែរថា បច្ចុប្បន្ននេះក្រសួងបរិស្ថានគ្រប់គ្រងតំបន់ការពារធម្មជាតិជាង៥០តំបន់នៅលើផ្ទៃដីជាង៧លានហិកតា ដោយរមន្ត្រីអភិរក្សជាច្រើនបានធ្វើការងារការពារតំបន់អភិរក្សទាំងនេះ។ប៉ុន្តែសម្រាប់ថវិកាអនុវត្តការងារនេះនៅមានកម្រិត ដូច្នេះការផ្តល់ជំនួយរបស់CEPFទៅដល់អង្គការដៃគូសម្រាប់យកមកចូលរួមធ្វើការងារអភិរក្សនៅតំបន់ការពារធម្មជាតិនេះ ជាកត្តាមួយដ៏ល្អប្រសើរ។
លោក សោម ស៊ីថា ទីប្រឹក្សាបច្ចេកទេស នៃអង្គការសមាគមអភិរក្សសត្វព្រៃកម្ពុជា (WCS Cambodia) បានថ្លែងថា អង្គការរបស់លោកទទួលបានគម្រោងជំនួយជាច្រើនពី CEPF ហើយសម្រាប់លោកផ្ទាល់គឺបានកាន់គម្រោងចំនួនពីរ គឺមានគម្រោងអភិរក្សអណ្តើកលួងនៅខេត្តកោះកុង និងកន្ធាយក្បាលកង្កែបនៅតាមដងទន្លេរមេគង្គ។លោកថា បើគ្មានថវិកាទាំងនេះទេយើងមិនអាចធ្វើការសិក្សាស្រាវជ្រាវ និងធ្វើការអភិរក្សសត្វទាំងនេះបានទេ។
លោក Scott Perkin ប្រធានក្រុមធនធានធម្មជាតិរបស់ IUCN ប្រចាំតំបន់អាស៊ីបានមានស្រាសន៍ថា នៅក្នុងរយៈពេល៦ឆ្នាំចាប់ពីឆ្នាំ២០១៣ មកដល់បច្ចុប្បន្ននេះ CEPF បានផ្តល់ជំនួយជាង ១៨០ គម្រោង ដែលមានថវិកាជាង១៥លានដុល្លារអាមេរិក ទៅដល់ប្រទេសចំនួន៦ដែលរួមមានប្រទេសកម្ពុជា ឡាវ មីយ៉ាន់ម៉ា ថៃ វៀតណាម បូកផ្នែកខ្លះនៃប្រទេសបង់ក្លាដេស និងភាគខាងត្បូងប្រទេសចិន។ហើយសម្រាប់ប្រទេសកម្ពុជាទទួលបានច្រើនជាងគេដោយសារតែ នៅកម្ពុជាមានតំបន់ការពារធនធានធម្មជាតិ និងជីវៈចម្រុះច្រើនសម្បូបែប។
សូមបញ្ជាថា នៅក្នុងសិក្ខាសាលានេះ ក៏មានបង្ហាញ និងចែលរំលែកបទពិសោធន៍ពីអ្នកជំនាញអន្តរជាតិ និងអន្តរជាតិជាច្រើនពាក់ព័ន្ធការងារអភិរក្សធនធានធម្មជាតិជីវចម្រុះ ជាពិសេសការសង្គ្រោះសត្វព្រៃគ្រប់ប្រភេទដែលកំពុងប្រឈមការផុតពូជនៅក្នុងប្រទេសកម្ពុជា និងនៅក្នុងតំបន់៕
អត្ថបទ និង រូបថត៖ លោកឃុត សៅ
