កិច្ចប្រជុំអន្តរក្រសួងលើកទី៤ ដើម្បីពិនិត្យលើ សេចក្តីព្រាងច្បាប់ស្តីពីសិទ្ធ ទទួលព័ត៌មាន ដែលរៀបចំឡើងដោយ ក្រសួង ព័ត៌មាន បានបន្តដំណើរការធ្វើ ការពិភាក្សាគ្នា ព្រឹក ថ្ងៃទី ២៩ ខែ ឧសភា ឆ្នាំ ២០១៩ ក្រោមវត្តមាន ប្រធានអង្គ ប្រជុំ ឯកឧត្តម ខៀវ កាញារីទ្ធ រដ្ឋមន្ត្រី ក្រសួង ព័ត៌មាន និងវត្តមានចូលរួមពីសំណាក់ ឯកឧត្តម ជាអ្នកជំនាញផ្នែកច្បាប់ មកពីក្រសួង គន្លឹះ តំណាង ក្រុមប្រឹក្សាអ្នកច្បាប់ ទីស្តីការគណៈរដ្ឋមន្ត្រី និង ក្រុមប្រឹក្សាសេដ្ឋកិច្ចសង្គម វប្បធម៌ ទីស្តីការគណៈ រដ្ឋមន្ត្រី ដើម្បីធ្វើការពិនិត្យពិភាក្សាក្នុងការ ចូលរួមផ្តល់ធាតុផ្សំ សម្រាប់សេចក្តីព្រាងច្បាប់នេះឲ្យមានលក្ខណះគ្រប់ជ្រុងជ្រោយ តាមសមត្ថកិច្ចរបស់ក្រសួង ស្ថាប័នពាក់ ពន្ធ័ នីមួយៗ និងស្របតាមស្ថានភាពនយោបាយច្បាប់ នៃព្រះរាជាណាចក្រកម្ពុជា ។
ឯកឧត្តម រដ្ឋមន្ត្រី ខៀវ កាញារីទ្ធ មានប្រសាសន៍បញ្ជាក់ថា កិច្ចប្រជុំអន្តរក្រសួងជាបន្តបន្ទាប់មកនេះ គឺដើម្បីស្វែងរកធាតុផ្សំសំខាន់ៗពីបណ្តា ក្រសួង ស្ថាប័ន ពាក់ពន្ធ័ សម្រាប់ដាក់បញ្ចូលទៅក្នុងសេចក្តីព្រាងច្បាប់ ស្តីពីសិទ្ធទទួល ព័ត៌មាន ដែលក្រសួង ព័ត៌មាន ជាអ្នកធ្វើពង្រាង ហើយច្បាប់នេះ ត្រូវបាន រាជរដ្ឋាភិបាល ប្រគល់ភារកិច្ច ឲ្យក្រសួងព័ត៌មាន កាលពីខែវិច្ឆិកា ឆ្នាំ ២០១៣ ដឹកនាំវេទិកាពិគ្រោះយោបល់ជាមួយ អ្នកសារព័ត៌មាន អង្គការ សង្គម ស៊ីវិល និងក្រសួង ស្ថាប័ន ពាក់ពន្ធ័ ដើម្បីរៀបចំតាក់តែង។ បន្ទាប់មក នៅក្នុង ខែកុម្ភៈ ឆ្នាំ ២០១៥ ក្រសួងព័ត៌មាន បានសហការជាមួយ អង្គការ យូណេស្កូ ប្រចាំកម្ពុជា ដោយបានបង្កើត ក្រុមការងារបច្ចេកទេស ហៅកាត់ថា TWG A 2 I ( អេ ធូ អាយ ) ហើយកិច្ច ពិភាក្សាកែសម្រួលសេចក្តីព្រាងច្បាប់នេះ សម្រាប់ក្រុមការងារបច្ចេកទេស ទើបតែបញ្ចប់កាលពីពេល ឆ្នាំ ២០១៨ កន្លងទៅនេះ។ ប៉ុន្តែបើនិយាយជារួម ច្បាប់ស្តីពីសិទ្ធទទួលព័ត៌មាន កាលពីមុនដំបូង គឺក្រសួង ទំនាក់ទំនងព្រឹទ្ធសភា រដ្ឋសភា និងអធិការកិច្ច ជាអ្នករៀបចំ តែក្រោយមក រាជរដ្ឋាភិបាលបាន ប្រគល់មកឲ្យក្រសួងព័ត៌មាន ជាអ្នករៀបចំម្តង ។
ឯកឧត្តម មាស សុភ័ណ្ឌ អនុរដ្ឋលេខាធិការ និងប្រធានអនុគណៈកម្មការរៀបចំតាក់តែង សេចក្តីព្រាងច្បាប់ស្តីពីសិទ្ធទទួលព័ត៌មាន នៃក្រសួង ព័ត៌មានបានធ្វើការ បញ្ជាក់ ជូនថា សេចក្តីព្រាងច្បាប់នេះ គឺជាលទ្ធផលនៃការអភិវឌ្ឍក្របខណ្ឌ គតិយុត្ត របស់ រាជរដ្ឋាភិបាល ដើម្បី គាំទ្រដល់គោលនយោបាយ នៃការធ្វើកំណែ ទម្រង់ ប្រពន្ធ័រដ្ឋបាល និង អភិបាល កិច្ចល្អ ក្នុងការផ្តល់សេវាជូនប្រជាពលរដ្ឋប្រកបដោយប្រសិទ្ធភាព តម្លាភាព និង គណនេយ្យភាព ស្របតាមយុទ្ធសាស្ត្រចតុកោណ ដំណាក់កាលទី៤ របស់ រាជរដ្ឋាភិបាលកម្ពុជា។
ទាក់ទងទៅនិងលទ្ធផល នៃកិច្ចប្រជុំអន្តរក្រសួងលើកទី ៤ ដើម្បីធ្វើការ ពិនិត្យលើសេចក្តីព្រាង ច្បាប់ស្តីពីសិទ្ធទទួលព័ត៌មាន នាឱកាសនេះ ឯកឧត្តម មាស សុភ័ណ្ឌ ប្រធានក្រុមអ្នកនាំពាក្យ ក្រសួងព័ត៌មាន បានធ្វើការបញ្ជាក់បន្ថែម ថា ៖ (សំឡេង ក្នុងវីដេអូ)។
អត្ថបទ និង រូបថត ៖ ក្រសួងព័ត៌មាន
