នៅព្រឹកថ្ងៃទី២៨ ខែឧសភាឆ្នាំ២០១៩នេះ គម្រោងបុរី ផ្ទះល្វែងមួយចំនួននៅក្នុងស្រុកបន្ទាយស្រី ត្រូវបានអាជ្ញាធរខេត្តសៀមរាប ដឹកនាំដោយលោក ហែន ពុទ្ធី នាយករងរដ្ឋបាលសាលាខេត្ត រួមនឹងក្រុមការងារចម្រុះ ចុះត្រួតពិនិត្យនៅតាមការដ្ឋានសាងសង់គម្រោងបុរីនានានៅក្នុងស្រុកបន្ទាយស្រី និងបញ្ជាឲ្យផ្អាកសកម្មភាពនានារបស់ពួកគេជាបណ្តោះអាសន្នសិន ចំពោះគម្រោងបុរីផ្ទះល្វែងដែលអត់ច្បាប់ ។
លោក សួស សុខចាន់ អនុប្រធានមន្ទីររៀបចំដែនដី នគរូបនីយកម្ម សំណង់ និងសូរិយោដី ខេត្តសៀមរាប បានឲ្យដឹង ថា ក្នុងការត្រួតពិនិត្យនេះ ក្រុមការងារបានរកឃើញថា គម្រោងបុរីនៅក្នុងស្រុកបន្ទាយស្រី គឺមិនទាន់មានច្បាប់អនុញ្ញាតត្រឹមត្រូវនៅឡើយ ហើយគ្រប់បុរីដែលមិនមានច្បាប់អនុញ្ញាត ត្រូវបានក្រុមការងារសម្រេចឲ្យម្ចាស់ ឬតំណាង ត្រូវតែបញ្ឈប់សកម្មភាពទាំងឡាយ ដូចជា សកម្មភាពផ្សព្វផ្សាយពាណិជ្ជកម្មគ្រប់រូបភាព , បញ្ឈប់ការសាងសង់សំណង់នានាក្នុងទីតាំងគម្រោង ហើយជាមួយគ្នានេះ ក្រុមការងារក៏បានតម្រូវឲ្យម្ចាស់គម្រោងបុរីទាំងនោះ ត្រូវតែសុំការអនុញ្ញាតច្បាប់ពីមន្ត្រីជំនាញឲ្យបានត្រឹមត្រូវ មុននឹងដំណើរការ ធ្វើអាជីវកម្មរបស់ខ្លួន។
គួរបញ្ជាក់ថា គម្រោងដែលក្រុមការងារសម្រេចផ្អាកជាបណ្តោះអាសន្ននោះ មានគម្រោងបុរីរបស់ក្រុមហ៊ុនអង្គរលែន ម៉ាក្ស បន្ទាយស្រី ក្នុងភូមិខ្នារ , គម្រោងបុរីមហាមន្ទីរ ( MAHA MONTY ) នៅក្នុងភូមិប្រិយ៍ ក្នុងឃុំខ្នារសណ្តាយ និងគម្រោងបុរីមួយកន្លែងទៀត នៅក្នុងឃុំឃុនរាម ស្រុកបន្ទាយស្រី ។
លោក ស្ងួន ណារិន តំណាងបុរីអង្គរលែន ម៉ាក្ស បន្ទាយស្រី បានឲ្យដឹងថា គម្រោងអាជីវកម្មរបស់លោកមានច្បាប់អនុញ្ញាត ពីអាជ្ញាធរស្រុក ប៉ុន្តែលោកទទួលស្គាល់ថា ច្បាប់នោះមានភាពខ្វះចន្លោះខ្លះ ដូច្នេះលោកសូមសម្តែងនូវការអរគុណចំពោះក្រុមការងាររបស់រដ្ឋបាលខេត្ត ដែលបានចុះមកណែនាំលោកឲ្យយល់អំពីផ្លូវច្បាប់ ហើយក្រុមហ៊ុននឹងខិតខំបំពេញនូវចំណុចខ្វះខាតទាំងឡាយ ដែលជាតម្រូវការផ្នែកផ្លូវច្បាប់ ដើម្បីជាការងាយស្រួលសម្រាប់អាជីវកម្ម ៕
អត្ថបទ និង រូបថត : លោក ជា ស្រស់ និង លោក ខេង ឧត្តម
កែសម្រួលអត្ថបទ : លោក លីវ សាន្ត
