មានប្រសាសន៍ក្នុងទិវាសប្តាហ៍ជាតិសុវត្ថិភាពចរាចរណ៍ផ្លូវគោកលើកទី១២ កាលពីព្រឹកមិញនេះ លោក ពិន ប្រាកដ អភិបាលរងខេត្តសៀមរាប បានបញ្ជាក់ថា ការប្រារព្វទិវានៅថ្ងៃនេះ គឺជាការពញ្ញាក់ស្មារតីដល់បងប្អូនប្រជាពលរដ្ឋគ្រប់រូបឲ្យចូលរួមលើកកម្ពស់ការយល់ដឹងអំពីសុវត្ថិភាពចរាចរណ៍ ននិងគោរពច្បាប់ស្តីពីចរាចរណ៍ផ្លូវគោក ព្រោះថា ស្ថានភាពគ្រោះថ្នាក់ចរាចរណ៍ក្នុងពេលកន្លងមកនេះ មាននិន្នាការកើនឡើងនៃការស្លាប់ជាក្រុម ដែលបង្កឡើងដោយសារការបើកបរហួសល្បឿនកំណត់ ការបើកបរក្រោមឥទ្ធិពលជាតិស្រវឹង ការមិនពាក់មួកសុវត្ថិភាព មិនពាក់ខ្សែ ក្រវាត់សុវត្ថិភាព ការជែងដោយប្រថុយប្រថាន បានបង្កឲ្យមានគ្រោះថ្នាក់ចរាចរណ៍ដែលមានសភាពធ្ងន់ធ្ងរ បណ្តាលឲ្យបាត់បង់អាយុជីវិតមនុស្ស ឬរបួស ពិការយ៉ាងអាណោចអាធម រួមជាមួយនិងការខូចខាតទ្រព្យសម្បត្តិ រដ្ឋ និងឯកជនយ៉ាងច្រើន បន្សល់ទុកនូវកូនកំព្រា ស្ត្រីមេម៉ាយ ពិការភាព សោកនាដកម្ម និងផលវិបាកជាច្រើនមកលើសង្គមកម្ពុជា។
លោក ពិន ប្រាកដ មានប្រសាសន៍ទៀតថា ដើម្បីរួមគ្នាទប់ស្កាត់ កាត់បន្ថយគ្រោះថ្នាក់ចរាចរណ៍ផ្លូវគោក ដើម្បីកាត់បន្ថយទុក្ខសោក និងភាពក្រីក្ររបស់ប្រជាពលរដ្ឋ និង ដើម្បីចូលរួមអនុវត្តឲ្យបាននូវអនុសាសន៍របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃ ព្រះរាជាណាចក្រកម្ពុជា ថា “ថ្ងៃនេះ ថ្ងៃស្អែក កុំឲ្យមានគ្រោះថ្នាក់ចរាចរណ៍” និងសូមបន្តយកចិត្តទុកដាក់ និងចូលរួមអនុវត្តលើកិច្ចការមួយចំនួន ដូចខាងក្រោម ៖
១-មុនចាប់ផ្តើមបើកបរយានជំនិះ អ្នកបើកបរត្រូវប្រកាន់ទំលាប់ជាស្វ័យប្រវត្តិត្រួតពិនិត្យលក្ខណៈបច្ចេកទេស យានជំនិះ និងលើកកម្ពស់ស្មារតីប្រុងប្រយ័ត្នជានិច្ច ចំពោះគ្រោះថ្នាក់ចរាចរណ៍ដែលអាចកើតមានជាយថា ហេតុនៅលើផ្លូវថ្នល់។
២-អ្នកបើកបររថយន្ត និងអ្នករួមដំណើរជាមួយទាំងអស់ សូមពាក់ខ្សែក្រវាត់សុវត្ថិភាពឲ្យបានគ្រប់ៗគ្នា ហើយការពាក់ខ្សែក្រវាត់សុវត្ថិភាពនេះ ត្រូវឲ្យក្លាយទៅជាទំលាប់ជាប្រចាំនៅពេលឡើងបញ្ជា ឬជិះរថយន្ត ម្តងៗ។
៣-អ្នកបើកបរម៉ូតូ និងអ្នករួមដំណើរទាំងអស់ សូមពាក់មួកសុវត្ថិភាពគ្រប់ៗគ្នាពេលធ្វើដំណើរជិត ឬឆ្ងាយ និងគ្រប់ពេលវេលា។ ត្រូវចងចាំជានិច្ចថា “មួកសុវត្ថិភាពមួយ ការពារជីវិតបានម្នាក់”។
៤-សូមបន្ថយល្បឿនបើកបរទៅតាមស្ថានភាពផ្លូវ និងស្ថានភាពចរាចរណ៍ ដូចជាផ្លូវគ្រលុក ផ្លូវកោង ផ្លូវប្រសព្វ ផ្លូវចុះឡើងចំណោត ផ្លូវចង្អៀត ឬផ្លូវរអិល។ កន្លងមកការបើកបរលើសល្បឿនកំណត់ គឺជាមូល ហេតុចម្បងក្នុងការបង្កឲ្យមានគ្រោះថ្នាក់ចរាចរណ៍ច្រើនជាងគេ ដូច្នេះត្រូវបើកបរគោរពទៅតាមល្បឿន ដែលច្បាប់បានកំណត់ គឺរថយន្តបើកបរក្នុងល្បឿនត្រឹមតែ ៨០គីឡូម៉ែត្រក្នុងមួយម៉ោងក្រៅទីប្រជុំជន និងត្រឹមតែ ៤០គីឡូម៉ែត្រក្នុងមួយម៉ោងក្នុងទីប្រជុំជន។ ចំពោះម៉ូតូដែលបើកបរក្នុងទីប្រជុំជនសូមកុំលើសពី ៣០គីឡូម៉ែត្រក្នុងមួយម៉ោង។
៥-អ្នកបើកបរមុននឹងជែង ត្រូវដឹងច្បាស់ថាផ្លូវខាងមុខទំនេរ អាចជែងបានដោយសុវត្ថិភាព ចៀសវាងការ ជែងដោយប្រថុយប្រថាន ដែលអាចបង្កឲ្យមានគ្រោះថ្នាក់ជាយថាហេតុ។
៦-អ្នកបើកបរសូមគោរពសិទ្ធិអាទិភាពនៅត្រង់ផ្លូវប្រសព្វ ដោយត្រូវបើកបរបន្ថយល្បឿននៅពេលជិតដល់ ផ្លូវប្រសព្វ
និងត្រូវទុកសិទ្ធិឲ្យអ្នកបើកបរដែលធ្វើចរាចរណ៍នៅលើផ្លូវត្រង់មានសិទ្ធិទៅមុន និងត្រូវប្រកាន់ខ្ជាប់នូវសុជីវធម៌ និងការអធ្យាស្រ័យគ្នាទៅវិញទៅមក។
៧-សូមចងចាំជានិច្ចថា ”បើពិសាគ្រឿងស្រវឹង កុំបើកបរ បើបើកបរ កុំពិសាគ្រឿងស្រវឹង”។ ពាក្យស្លោកនេះ មានសារសំខាន់ជាអាយុជីវិត ព្រោះបើបើកបរបាត់ម្ចាស់ការរេចង្កូតចុះឡើង ភ្នែកស្រវាំង បន្ថែមល្បឿនកាន់តែលឿន ធ្វើឲ្យលទ្ធភាពគ្រោះថ្នាក់ដល់ស្លាប់មានច្រើន អាចបណ្តាលឲ្យបុកបង្គោលភ្លើង ដើមឈើ របាំង ចែកទ្រូងផ្លូវ ឬសំណង់រង្វង់មូល។ល។
៨-ចំពោះរថយន្តដឹកអ្នកដំណើរ ឬរថយន្តដឹកទំនិញ សូមកុំផ្ទុកមនុស្ស ឬទំនិញលើសច្បាប់កំណត់ ជា ពិសេសរថយន្តដឹកអ្នកដំណើរ មិនត្រូផ្ទុកមនុស្សនៅលើដំបូលឡើយ ។
សូមបញ្ជាក់ថា នៅព្រឹកថ្ងៃទី២៨ ខែឧសភា ឆ្នាំ២០១៩នេះ អនុគណៈកម្មការសុវត្ថិភាពចរាចរណ៍ផ្លូវគោកខេត្តសៀមរាប បានរៀបចំប្រារព្ធទិវាសប្តាហ៍ជាតិសុវត្ថិភាពចរាចរណ៍ផ្លូវគោកលើកទី១២ នៅសាលាគរុកោសល្យ និងវិក្រឹតការខេត្ត សៀមរាប ក្រោមអធិបតីភាព លោក ពិន ប្រាកដ អភិបាលរងខេត្ត ជាតំណាងឯកឧត្តម ទៀ សីហាអភិបាលខេត្ត និងជាប្រធានអនុគណៈកម្មការសុវត្ថិភាពចរាចរណ៍ផ្លូវគោកខេត្តសៀមរាប ដោយមានការចូលរួមពី សំណាក់ឯកឧត្តម លោកជំនៅសាលាគរុកោសល្យខេត្តសៀមរាបទាវ លោក លោកស្រី ជាសមាជិកនៃអនុគណៈកម្មការសុវត្ថិភាពចរាចរណ៍ផ្លូវគោកខេត្ត ថ្នាក់ ដឹកនាំមន្ទីរ អង្គភាពនានាក្នុងខេត្ត គណៈអភិបាលក្រុង ស្រុក កងកម្លាំងប្រដាប់អាវុធ លោកគ្រូអ្នកគ្រូ សិស្សានុសិស្ស និង ប្រជាពលរដ្ឋជាច្រើនរូប ៕
រូបថត : លោក យូ វង្ស
អត្ថបទ : លោក លីវ សាន្ត
