តាមការប៉ាន់ស្មាននៅក្នុងរបាយការណ៍វិភាគ ម៉ូដែល របស់ក្រុមប្រឹក្សាជាតិអភិវឌ្ឍដោយចីរភាព ជាមួយនឹងក្រសួងសេដ្ឋកិច្ចនិងហិរញ្ញវត្ថុ ផលិតផលក្នុងស្រុកសរុបរបស់កម្ពុជា (GDP) នៅឆ្នាំ២០៥០ខាងមុខ នឹងអាចមានការថយចុះជិត ១០% ប្រសិនបើពុំមានដំណោះស្រាយ លើបញ្ហាប្រែប្រួលអាកាសធាតុ ចាប់ពីពេលឥឡូវនេះទេ។
នេះបើតាមប្រសាសន៍ លោកជំទាវ ម៉ុម ថានី រដ្ឋលេខាធិការក្រសួងបរិស្ថាន និងជា ប្រធានក្រុមប្រឹក្សាជាតិអភិវឌ្ឍដោយចីរភាព។ ក្នុងឱកាសនោះ លោកជំទាវបានវាយតម្លៃថា សិក្ខាសាលាផ្សព្វផ្សាយស្តីពីសកម្មភាព និង របកគំហើញ របស់ក្រុមការងារអន្តររដ្ឋាភិបាលស្តីពីការប្រែប្រួសអាកាសធាតុ (IPCC)នេះ ពិតជាមានសារសំខាន់ណាស់ ក្នុងការផ្តល់ជាគោលការណ៍ណែនាំគន្លឹះ ប្រកបដោយប្រសិទ្ធភាព សម្រាប់អ្នកជំនាញការ អ្នកវិភាគ និង មន្ត្រីរាជរដ្ឋាភិបាល ដើម្បីរៀបចំផែនការយុទ្ធសាស្ត្រ និង គោលនយោបាយពាក់ព័ន្ធសម្រាប់ប្រទេសកម្ពុជា ។
លោកជំទាវ បង្ហាញដល់អង្គសិក្ខាសាលានោះថា ៖ កម្ពុជាមិនបានជាប់បន្ទុក ជាអ្នកទទួលខុសត្រូវលើការបញ្ចេញឧស្ម័ន្មផ្ទះកញ្ចក់ ជាប្រវត្តិសាស្ត្រឡើយ តែកម្ពុជាបានប្តេជ្ញាយ៉ាងម៉ឹងម៉ាត់បំផុត ក្នុងការជម្រុញគំរូអភិវឌ្ឍ ដែលធន់នឹងការប្រែប្រួលអាកាសធាតុ និង ការបញ្ចេញកាបូនទាប ។ ដោយឡែក កម្ពុជាត្រូវបានដាក់បញ្ចូល ទៅក្នុងចំណោមប្រទេសដែលងាយរងគ្រោះបំផុត ដោយសារការប្រែប្រួលអាកាសធាតុលើពិភពលោក ។ ហើយឆ្នាំ២០១៩ថ្មីៗនេះ កម្ពុជាបានប្រឈមទៅនឹងរលកកម្តៅខ្ពស់បំផុត ទាំងនេះគឺជាមូលហេតុដែលនាំឲ្យប្រទេសកម្ពុជា ក្លាយជាប្រទេស ដែលគាំទ្រដ៏ខ្លាំងក្លា ចំពោះកិច្ចខិតខំប្រឹងប្រែងអន្តរជាតិ ក្នុងការប្រយុទ្ធប្រឆាំងការប្រែប្រួលអាកាសធាតុពិភពលោក ។
សិក្ខាសាលា ដែលមានរយៈពេល២ថ្ងៃនេះ មានការចូលរួម ពីតំណាងមកពីក្រុមការងារអន្តររដ្ឋាភិបាលស្តីពីការប្រែប្រួលអាកាសធាតុ (IPCC) និងប្រតិភូមកពីប្រទេសឡាវ ដើម្បីចែករំលែក ស្តីពីលទ្ធផលនៃការសិក្សាវិទ្យាសាស្ត្រ លើការប្រែប្រួលអាកាសធាតុ ដល់សិក្ខាកាមជាមន្ត្រីបរិស្ថាន មន្ត្រីរាជរដ្ឋាភិបាលដែលពាក់ព័ន្ធ សិស្ស-និស្សិត លោកគ្រូ-អ្នកគ្រូ-សាស្ត្រាចារ្យ ដែលជាពិសេសនោះគឺមានវត្តមានរបស់ លោកបណ្ឌិត ព្រីយ៉ាដាស៊ី ស៊ូខ្លា (Priyadarshi R.Shukla) សហប្រធានក្រុមការងារផ្នែកទី៣ នៃក្រុមការងារអន្តររដ្ឋាភិបាលស្តីពីការរប្រែប្រួលអាកាសធាតុ បង្ហាញចំណាប់អារម្មណ៍លើចំណុចសំខាន់ៗ ស្តីពីកិច្ចសហប្រតិបត្តិការអន្តរជាតិ ក្នុងការជួយពង្រឹងសមត្ថភាព ក្នុងការបង្កើតភស្តុតាងវិទ្យាស្ត្រ អំពីផលប៉ះពាល់នៃការប្រែប្រួលអាកាសធាតុ ។
គួររំលឹកថា នៅឆ្នាំ២០០៧ ក្រុមការងារអន្តររដ្ឋាភិបាលស្តីពីការប្រែប្រួលអាកាសធាតុ (IPCC) បានទទួលជ័យលាភីពានរង្វាន់ណូបែលសន្តិភាព ហើយបានដើរតួនាទីយ៉ាងសំខាន់ បង្កើនការយល់ដឹងអំពីផលប៉ះពាល់ នៃការប្រែប្រួលអាកាសធាតុ ជាសាកល ។
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក សេង ផល្លី
