ប្រតិភូក្រសួងវប្បធម៌ និងសិល្បៈ របស់ប្រទេសឥណ្ឌា បានសហការជាមួយមន្ទីរវប្បធម៌ និងវិចិត្រសិល្បៈនៃប្រទេសកម្ពុជា រៀបចំពិធីបុណ្យរបាំ បាហាថាណារ៉ាម (Bharatanatyam) អន្តរជាតិ រួមជាមួយនិងរបាំប្រពៃណីបុរាណរបស់ខ្មែរ នៅទីលានជល់ដំរី នៃបរិវេណប្រាសាទអង្គរធំ នៅព្រឹកថ្ងៃទី ២៧ ខែ ឧសភា ឆ្នាំ២០១៩នេះ។
លោកប្រធានក្រុមហ៊ុន ស៊ីណុ ណាណាម ត្រាវែល (Seenu Gnanam Travels) ជាក្រុមហ៊ុនសហការរៀបចំពិធីនេះ បានបញ្ជាក់ថា ការសម្តែងសិល្បៈរបាំរួម គ្នារវាងឥណ្ឌា និង កម្ពុជានេះ មានគោលបំណងរឹតចំណងមិត្តភាព នៃវិស័យវប្បធម៌ របស់ប្រទេសទាំងពីរ ដែលមានជាប្រវត្តិសាស្ត្រយូរលង់ណាស់មកហើយ ទាំងវប្បធម៌ និង សាសនាជាដើម ។
មានប្រសាសន៍ក្នុងឱកាសនោះ លោក មួន សុភាព ប្រធាមន្ទីរវប្បធម៌ និងវិចិត្រសិល្បៈ និងជាតំណាង លោកជំទាវ រដ្ឋមន្ត្រី ក្រសួងវប្បធម៌ និង វិចិត្រសិល្បៈ ក៏បានធ្វើការបង្ហាញពីមោកទភាព និង ក្តីរំភើប ចំពោះគោលបំណង និង កិច្ចសហការដ៏ល្អនេះ គឺបានឆ្លុះបញ្ចាំងពីចំណងនៃមិត្តភាព និង ការទូតជាប្រវត្តិសាស្ត្រពីយូរលង់ណាស់មកហើយ គឺតាំងពីសតវត្សរ៍ទី១ នៃគ្រឹះសករាជ នាសម័យហ្វូណន។ ម្យ៉ាងទៀតប្រទេសកម្ពុជា ក៏ជាប្រទេសទទួលឥទ្ធិពលពីឥណ្ឌា នូវសាសនាធំពីរ គឺសាសនាហិណ្ឌូ និង ព្រះពុទ្ធសាសនា ដែលមានជាអាទិ៍ ប្រាង្គប្រាសាទអង្គរវត្ត ដែលជាភស្តុតាងស្រាប់ ហើយព្រះពុទ្ធសាសនាត្រូវបានប្រជាពុទ្ធបរិស័ទខ្មែរយើង គោរពប្រតិបត្តិបូជាតរៀង មកដល់សព្វថ្ងៃនេះ ។
លោកក៏បានលើកឡើងផងដែរថា ក្រៅពីការទទួលឥទ្ធិពលពីឥណ្ឌា ប្រទេសឥណ្ឌា ក៏បានឧបត្ថម្ភ គាំទ្រក្នុងវិស័យវប្បធម៌កម្ពុជា ដូចជាការជួសជុលប្រាសាទបុរាណមួយចំនួន នៅខេត្តសៀមរាប ជាពិសេសប្រាសាទអង្គរវត្ត ។
លោក មួន សុភាព ក៏បានបញ្ជាក់ផងដែរថា នេះជាកិច្ចសហប្រតិបត្តិការលើកទី១ រវាងមន្ទីរវប្បធម៌ និង វិចិត្រសិល្បៈខេត្តសៀមរាប ជាមួយ សិល្បៈករ សិល្បៈការិនី នៃវិទ្យាស្ថានសិល្បៈ បាហាថាណារ៉ាម (Bharatanatyam) នៃប្រទេសឥណ្ឌា។
ក្នុងពិធីបុណ្យនេះ គេក៏ឃើញមាននិស្សិតផ្នែកសិល្បៈរបាំ Bharatanatyam មកពីប្រទេស India និង បណ្តាប្រទេសផ្សេងៗជុំវិញពិភពលោក មកទស្សកិច្ចនៅប្រាសាទអង្គរវត្តផងដែរ។ ចំពោះអត្ថន័យនៃការរៀបចំពិធីបុណ្យរបាំ បាហាថាណារ៉ាម (Bharatanatyam)នេះ គឺផ្តោតលើទំនាក់ទំនង ជាប្រវត្តិសាស្ត្រ តាំងពីបុរាណកាល រវាងអាណាចក្រខ្មែរ និងឥណ្ឌា ។ ម្យ៉ាងទៀតពិធីបុណ្យរបាំ Bharatanatyam អន្តរជាតិ តែងតែ ប្រារព្វធ្វើជារៀងរាល់ឆ្នាំ សម្រាប់ឧទ្ទិសដល់ព្រះសិវៈ ។
អត្ថបទ និង រូបថត ៖ លោក ម៉ី សុខារិទ្ធ
កែសម្រួលអត្ថបទ ៖ លោក សេង ផល្លី
