ថវិកាសប្បុរសចំនួន៨,៦៥០ដុល្លារ បានមកពីមូលនិធិនៃកម្មវិធី អ្នកជាវីរៈបុរសរបស់ក្រុមហ៊ុន អិនវីស៊ី ខបភើរេសិន-វីតាល់ ត្រូវបាននាំយកមកប្រគល់ជូនមន្ទីរពេទ្យកុមារអង្គរ ខេត្តសៀមរាប នៅថ្ងៃទី២៧ខែឧសភាឆ្នាំ២០១៩ នេះ ខណៈដែលមន្ទីរពេទ្យកុមារ នៅក្នុងក្រុងសៀមរាបមួយនេះ កំពុងមានដំណើរការ ទទួលកុមារមករកសេវាសង្គ្រោះ និងព្យាបាលជំងឺក្នុង១ថ្ងៃ ប្រមាណពី៥០០ទៅ៦០០នាក់។
លោក ងួន ចាន់ភ័ក្ត្រា នាយកមន្ទីរពេទ្យកុមារអង្គរ មានប្រសាសន៍ឲ្យដឹងថា ៖ កុមារដែលចូលមកទទួលសេវាសង្គ្រោះ ព្យាបាលនិងថែទាំជំងឺនៅទីនេះ មិនមានការបង់ថ្លៃទេ មិនតែប៉ុណ្ណោះបានជួយឧបត្ថម្ភរបបហូបចុកបន្ថែម ដល់គ្រួសារកុមារក្រីក្រ កំពុងសម្រាកព្យាបាលក្នុងមន្ទីរពេទ្យ ថែមទៀតផង ។ មន្ទីរពេទ្យកុមារអង្គរ បានជួយសង្គ្រោះនិងព្យាបាលដល់កុមារលើសេវាសង្គ្រោះបន្ទាន់ វះកាត់បេះដួង និងពិនិត្យព្យាបាលជម្ងឺទូទៅ សម្រាប់កុមារអ្នកជម្ងឺធ្ងន់ មានបន្ទប់សម្រាប់សម្រាកព្យាបាលផងដែរ ។
លោកជំទាវ ជឹង សុគន្ធាវី អគ្គនាយិកាក្រុមហ៊ុន អិនវីស៊ី ខបភើរេសិន-វីតាល់ មានប្រសាសន៍ថា៖ មូលនិធីនៃកម្មវិធី ( អ្នកជាវីរៈបុរស របស់ក្រុមហ៊ុនទឹកពិសារវីតាល់ ) បានធ្វើឡើងរយៈពេលពីរខែកន្លងមកនេះ គឺចាប់ពីខែមិនាដល់ខែឧសភាឆ្នាំ២០១៩ ដែលអនុញ្ញាតឲ្យសាធារណជនអាចចូលរួមបរិច្ចាគថវិកា ជួយកុមារមានជម្ងឺ និងកុមារក្រីក្រ ដោយគ្រាន់តែជាវទឹកវីតាល់ តាមបណ្តាទូម៉ាស៊ីនស្វ័យប្រវត្តិទាំង១៨ នៅតាមផ្សារទំនើបក្នុងរាជធានីភ្នំពេញ ។ ជាលទ្ធផលក្នុងរយៈពេល២ខែកន្លងមកនេះ ប្រមូលបានថវិកាប្រមាណជា ២០០០ដុល្លា ហើយវីតាល់ក៏បានបរិចា្ចគបន្ថែមទឹកប្រាក់ឲ្យបានគ្រប់ចំនួន ៨,៦៥០ដុល្លារ បរិច្ចាគជូនដល់មន្ទីពេទ្យកុមារអង្គរ តាមគម្រោងដែលបានគ្រោងទុក។
ព័ត៌មានជាតិ ថ្មីៗ
លោកជំទាវ បញ្ជាក់ថា៖ នេះជាលើកទី៣ហើយ ដែល វីតាល់ បាននាំយកមូលនិធិសប្បុរស មកជួយដល់មន្ទីរពេទ្យកុមារអង្គរ ដែលឆ្នាំមុនៗបានជួយជាអង្ករនិងសម្ភារៈផ្សេងៗ ។ នៅឆ្នាំបន្ទាប់ខាងមុខនេះ ក្រុមហ៊ុនទឹកពិសា វីតាល់ និងបន្តផ្តល់ការឧបត្ថម្ភ ជូនដល់មន្ទីរពេទ្យកុមារអង្គរខេត្តសៀមរាប រយៈពេល៣ឆ្នាំជាប់ៗគ្នាបន្តទៀត ដោយក្នុង ១ឆ្នាំៗ ក្រុមហ៊ុននឹងឧបត្ថម្ភ ជាអង្ករ ១០តោន ព្រោះមន្ទីរពេទ្យកុមារមួយនេះ ក៏បានផ្តល់ជារបបផ្គត់ផ្គង់ដល់គ្រួសារកុមារក្រីក្រមានជំងឺ ដែលសម្រាកព្យាបាលក្នុងមន្ទីរពេទ្យនេះផងដែរ៕
អត្ថបទ និង រូបថត ៖ លោក ងិន គឹមឡេង
