ថ្លែងក្នុងសន្និសីទស្តីពីបច្ចុប្បន្នភាពរោគកុមារវិទ្យាលើកទី៤ នៅខេត្តសៀមរាប កាលពីពេលថ្មីៗនេះ ឯកឧត្តមសាស្ត្រាចារ្យ ធា គ្រុយ រដ្ឋលេខាធិការក្រសួងសុខាភិបាល មានប្រសាសន៍ថា បច្ចុប្បន្ននេះ វឌ្ឍនភាពនៃវេជ្ជសាស្ត្រនៅកម្ពុជា ទាំងហេដ្ឋារចនាសម្ព័ន្ធនៃទីតាំងផ្តល់សេវាសុខាភិបាល ទាំងធនធានមនុស្សរាប់តាំងពីបរិមាណនិងគុណភាព រាប់តាំងពីអ្នកមានឯកទេសវេជ្ជសាស្ត្រកាន់តែច្រើន និងរាយតាមមន្ទីរពេទ្យថ្នាក់ជាតិទាំងនៅតាមបណ្តាខេត្ត មានទាំងសម្ភារបរិក្ខាបម្រើឱ្យការធ្វើរោគវិនិច្ឆ័យ បម្រើឱ្យការព្យាបាលថែទាំ ត្រូវបានបំពាក់កាន់តែច្រើននៅតាមមន្ទីរពេទ្យថ្នាក់ជាតិនិងនៅតាមមន្ទីរពេទ្យតាមបណ្តាខេត្តនានាផងដែរ ហើយគុណភាព និងសុវត្ថិភាពនៃការព្យាបាលជំងឺ ត្រូវបានប្រជាពលរដ្ឋទទួលស្គាល់ថា ល្អប្រសើរខ្លាំង ហើយប្រជាពលរដ្ឋកាន់តែច្រើន មានការទុកចិត្តកាន់តែច្រើនឡើងដែរ ប៉ុន្តែនៅតែជាប្រធានបទ នៃការវិភាគរបស់ប្រជាពលរដ្ឋដែលប្រើសេវាសុខាភិបាលទាំងផ្នែកសាធារណៈ និងទាំងផ្នែកឯកជន។
ឯកឧត្តមសាស្ត្រាចារ្យ ធា គ្រុយ មានប្រសាសន៍ទៀតថា ដូចយើងដឹងស្រាប់ហើយថា ការងារព្យាបាល និងថែទាំជំងឺ ជាការងារដែលអាចប្រឈមនឹងបញ្ហាតិចឬច្រើន ប៉ុន្តែកុំគិតថា ការផ្តល់ការព្យាបាល និងថែទាំជំងឺ ជួបនឹងគ្រោះថ្នាក់ ឬមានបញ្ហាគឺជារឿងធម្មតានោះ ដូច្នេះការយល់ឃើញបែបនេះជាការខុសឆ្គងហើយ ដូចជាគ្រូពេទ្យម្នាក់ ដែលបានសិក្សាចប់នៅមូលដ្ឋាន ត្រូវតែមាំទាំទាំងចំណេះដឹង ជំនាញ សីលធម៌វិជ្ជាជីវៈ និងការប្រកបវេជ្ជាជីវៈជាគ្រូពេទ្យ ត្រូវមានអាជ្ញាប័ណ្ណចេញដោយគណៈគ្រូពេទ្យ និងត្រូវបន្តសុពលភាពអាជ្ញាប័ណ្ណនោះ តាមរយៈការបំពេញលក្ខ័ណតម្រូវរបស់គណៈគ្រូពេទ្យ ដូច្នេះសូមឲ្យគ្រូពេទ្យទាំងអស់ ក្នុងពេលបំពេញកិច្ចការថែទាំព្យាបាលជំងឺ ត្រូវប្រកបដោយស្មារតីទទួលខុសត្រូវ ត្រូវយល់ពីបញ្ហា និងត្រូវស្វែងយល់អំពីស្ថានភាពរបស់អ្នកជំងឺ ត្រូវប៉ាន់ពីសមត្ថភាពជំនាញរបស់ខ្លួន និង សូមសិក្សាពីលទ្ឋភាពទីតាំងរបស់ខ្លួន និងសិក្សាអំពីការត្រូវការក្នុងការព្យាបាលជំងឺថាតើគួរទុកព្យាបាលខ្លួនឯង ឬក៏ត្រូវបញ្ជូនទៅគ្រូពេទ្យដែលមានឯកទេស និងមាំទាំជាង ។
ឯកឧត្តម ធា គ្រុយ មានប្រសាសន៍បន្ថែមទៀតថា កុមារងាយឆ្លងជាមួយនឹងជំងឺផ្សេងៗ ដោយសារសរីរាង្គ និងប្រព័ន្ឋការពាររបស់គាត់នៅខ្សោយ ហើយជាទូទៅ បើមានមេរោគដែលបង្កឱ្យកុមារឈឺ គឺពួកគាត់ទទួលបានយ៉ាងងាយ ដូចជាជំងឺដែលឧស្សាហ៍ជួបប្រទះច្រើនជាងគេកើតឡើងលើកុមារ គឺជំងឺផ្លូវដង្ហើម ដូចជារលាកបំពង់ខ្យល់ រលាកទងសួត ហើមសួត ជំងឺរាគរុស និងប្រភេទជំងឺខ្លះមិនសូវជួបប្រទះតែវាធ្ងន់ធ្ងរដែរ ដូចជាជំងឺរលាកដៃ ជើង មាត់ ដែលបង្កឡើងដោយមេរោគអ៊ីវី៧១ ហេតុនេះ សូមមាតាបិតានិងអាណាព្យាបាលគ្រប់រូប ត្រូវប្រយ័ត្ន ចំពោះសុខភាពកុមារ កុំឱ្យគាត់នៅក្បែរអ្នកជំងឺ និងបើមិនចាំបាច់ទេ បើកុមារមិនឈឺ សូមកុំនាំគាត់ទៅមន្ទីរពេទ្យ ព្រោះវាងាយនឹងឆ្លងជំងឺដល់គាត់ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
