បច្ច័យទទួលបានពីសទ្ធាជ្រះថ្លារបស់ថ្នាក់ដឹកនាំ មន្ត្រី នៃអាជ្ញាធរជាតិអប្សរា ក្នុងពិធីបុណ្យផ្កាប្រាក់សាមគ្គី ចំនួនជាង៤ម៉ឺនដុល្លារសហរដ្ឋអាមេរិច ត្រូវបានប្រគល់ជូនវត្តប្រាសាទលលៃ ស្ថិតក្នុង ភូមិលលៃ ឃុំបាគង ស្រុកប្រាសាទបាគង ខេត្តសៀមរាប ដើម្បីកសាងកុដិថ្មីមួយខ្នង ជំនួសឲ្យកុដិចាស់ដែលបានកសាងនៅលើខឿនប្រាសាទបុរាណ។
បច្ច័យទាំងអស់នេះ គ្រោងនឹងចូលរួមកសាងកុដិមួយខ្នងទំហំ២០.១៥ម x ១៦.៣៥ម កម្ពស់មួយជាន់ ធ្វើពីបេតុងប្រក់ក្បឿង សម្រាប់ព្រះសង្ឃគង់នៅ ។ ការកសាងកុដិខាងលើ គឺស្ថិតក្នុងភាពចាំបាច់បំផុត ព្រោះព្រះសង្ឃគង់នៅក្នុងវត្តប្រាសាទលលៃនេះ បានសម្រេចនិមន្តពីកុដិចាស់ដែលមានទីតាំងនៅផ្នែកខាងលើ នៃខឿនប្រាសាទលលៃ មកគង់ជាអចិន្ត្រៃយ៍នៅបរិវេណខាងក្រោម ដើម្បីទុកលទ្ធភាពឲ្យអាជ្ញាធរជាតិអប្សរាធ្វើការជួសជុល អភិរក្ស លើកតម្លៃ ប្រាសាទលលៃឲ្យចាកផុតពីហានីភ័យដោយសារធម្មជាតិ អាយុកាល និងការរស់នៅរបស់មនុស្ស។
ពិធីដង្ហែរបុណ្យផ្កាប្រាក់សាមគ្គីនេះ បានប្រារព្ធឡើងនៅថ្ងៃទី២៦ ខែឧសភា ឆ្នាំ២០១៩ ក្រោមកិច្ចផ្តួចផ្តើមរបស់អាជ្ញាធរជាតិអប្សរា និងនិមន្តចូលរួមពីព្រះមហាវិមលធម្ម ពិន សែម សិរីសុវ ណ្ណោ ព្រះរាជាគណៈថ្នាក់ទោ និង ជាឧត្តមទីប្រឹក្សាគណៈសង្ឃនាយកនៃព្រះរាជាណាចក្រកម្ពុជា សាលាគណខេត្តសៀមរាប រួមនិងព្រះសង្ឃ អាចារ្យ គណៈកម្មការវត្ត ពុទ្ធិបរិស័ទ ជិតឆ្ងាយជាច្រើនអង្គនាក់។
ព័ត៌មានជាតិ ថ្មីៗ
សូមជម្រាបថា បច្ច័យចំនួនជាង៤ម៉ឺនដុល្លារសហរដ្ឋអាមេរិចនេះ មានការចូលរួមពី ថ្នាក់ដឹកនាំ មន្ត្រី អាជ្ញាធរជាតិអប្សរា ១០ ,៧៣២,១០០រៀល និង ២១,១៣៨ដុល្លារសហរដ្ឋអាមេរិច និងលោកជំទាវ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ និងជាប្រធានអាជ្ញាធរជាតិអប្សរា ចំនួន២០,០០០ ដុល្លារសហរដ្ឋអាមេរិច។
អត្ថបទ និងរូបភាព: លោក អ៊ិន សីហរិទ្ធ
កែសម្រួលអត្ថបទ ៖ លោក សេង ផល្លី
