សន្និសីទស្តីពីបច្ចុប្បន្នភាពរោគកុមារវិទ្យាលើកទី៤ រៀបចំដោយសមាគមគ្រូពេទ្យកុមារកម្ពុជា ប្រារព្ធឡើង ក្នុងគោលបំណង ចែករំលែកនិងផ្លាស់ប្តូរបទពិសោធរវាងគ្នាទៅវិញទៅមក ដល់អ្នកឯកទេសផ្នែករោគកុមារទាំងក្នុងនិងក្រៅប្រទេស នូវចំណេះដឹងថ្មីៗ ផ្នែករោគកុមារ ធ្វើយ៉ាងណាឱ្យអ្នកចូលរួមអាចទាញយកសារៈសំខាន់សម្រាប់ប្រើជាប្រយោជន៍ក្នុងការថែទាំកុមារនិងព្យាបាលដល់កុមារ។
សន្និសីទស្តីពីបច្ចុប្បន្នភាពរោគកុមារវិទ្យាលើកទី៤រៀបចំធ្វើឡើងនៅថ្ងៃទី២៥ខែឧសភាឆ្នាំ២០១៩នៅសណ្ឋាគារសុខាសៀមរាប ក្រោមអធិបតីភាព ឯកឧត្តម សាស្ត្រាចារ្យ ធា គ្រុយ រដ្ឋលេខាធិការក្រសួងសុខាភិបាលនិងវត្តមានចូលរួមជាវាគ្មិន របស់សាស្ត្រាចារ្យ វេជ្ជបណ្ឌិត គ្រូពេទ្យដែលជាសមាជិកសមាគមគ្រូពេទ្យកុមារកម្ពុជា ចំនួនជាង២០០នាក់ ព្រមទាំងវាគ្មិនជាវេជ្ជបណ្ឌិតមកពីសឹង្ហបុរីនិងឥណ្ឌាផងដែរ។ប្រធានបទនៃសន្និសីទឆ្នាំនេះ គឺបង្ហាញអំពី៖
-សណ្ឋានធ្ងន់ធ្ងរនៃជំងឺគ្រុនឈាម និងក្បួនព្យាបាលជំងឺគ្រុនឈាម ដែលនៅតែជាចំណោទបញ្ហាគំរាមកំហែងដល់ជីវិតកុមារកម្ពុជា ជាពិសេសនៅឆ្នាំនេះ គេឃើញការកើនឡើងនៃជំងឺនេះ ដែលកំពុងតែយាយីដល់ជីវិតកុមារកម្ពុជាគួរឱ្យព្រួយបារម្ភ។
-ការធាត់ខ្លាំងនៃកុមារដោយសារកត្តាបរិស្ថានជុំវិញជីវភាពកុមារនិងកត្តាតំណពូជរបស់កុមារ។នៅកម្ពុជាក៍មានការកើនឡើងនៃកុមារធាត់លើសទំងន់គួរឱ្យកត់សំគាល់ណាស់ដែរ។
-ការបង្ហាញពីផលវិបាកនៃការមើលអេក្រង់ឧបករណ៍អេឡិកត្រូនិក មានទូរស័ព្ទជាដើចំពោះកុមារនិងជាពិសេសកុមារតូចៗ។
-ការព្យាបាលជំងឈរលាកនិងដំបៅក្រពះបណ្តាលមកពីមេរោគបាតេរីឈ្មោះ អេលីកូបាក់ទែរពីឡូរី។
-ជំងឺ មេឡូអ៊ីត គឺជាជំងឺបណ្តាលមកពីបាក់តេរីម្យ៉ាងឈ្មោះ បូគោដេរា ស៊ីដូម៉ាឡេអ៊ី ដែលច្រើនកើតនៅរដូវភ្លៀងនិងជាជំងឺពិបាកព្យាបាល ជាពិសេសវាមានលក្ខណៈកាចដែលបណ្តាលឱ្យកុមារស្លាប់ក្នុងអត្រាខ្ពស់។
-ការបង្ហាញអំពីការព្យាបាលជំងឺបេះដូងពីកំណើតដោយការប្រើប្រាស់ថ្នាំលេប ឬចាក់ ដោយមិនបាច់វះកាត់ឬរង់ចាំឱ្យកុមារធំធាត់ដល់ពេលដែលអាចវះកាត់បាន។
-ការបង្ហាញពីចាក់ថ្នាំការពារជំងឺឆ្កែឆ្កួតដោយវិទ្យាស្ថានប៉ាស្ទើរកម្ពុជា។
ប្រធានបទខាងលើនេះ សុទ្ឋតែមានសារៈសំខាន់សម្រាប់សមាជិកអង្គសន្និសីទស្វែងយល់រៀនសូត្រនិងផ្លាស់ប្តូរទស្សនៈចំណេះដឹងពីគ្នាទៅវិញទៅមក ដើម្បីរកឃើញនូវបទពិសោធល្អ សម្រាប់ជាទុន ក្នុងការអភិវឌ្ឍន៍ចំណេះដឹងផ្នែកវេជ្ជសាស្ត្ររោគកុមារ។
សាស្ត្រាចារ្យ យិត ស៊ុនណារ៉ា ប្រធានសមាគមគ្រូពេទ្យកុមារកម្ពុជាបានផ្តាំផ្ញើដល់សមាជិក សមាជិកា ក្នុងអង្គសន្និសីទ ឱ្យគាំពារនូវចំណេះដឹងថ្មីៗនេះដើម្បីធ្វើឱ្យកាន់តែប្រសើរក្នុងការផ្តល់សេវាសុខភាពជូនប្រជាជនយើងស្របតាមគោលនយោបាយប្រកបដោយគតិបណ្ឌិតរបស់រាជរដ្ឋាភិបាល ក្រោមការដឹកនាំដ៍ឈ្លាសវៃរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
អត្ថបទ និងរូបភាព: លោក យូ វង្ស
