លោក ស៊ិន ពិសី មន្ត្រីបច្ចេកទេសនៃនាយកដ្ឋានគ្រប់គ្រងព្រៃឈើ បរិស្ថាន និងទេសភាពវប្បធម៌ នៃអាជ្ញាធរជាតិអប្សរា បានឱ្យដឹងថា រយៈកាលកន្លងមក អាជ្ញាធរជាតិអប្សរាតែង តែយកចិត្តទុកដាក់ថែរក្សាព្រៃឈើដែលមានស្រាប់ និងដាំបន្ថែមតាមតំបន់ជុំវិញប្រាសាទដែលជាតំបន់ព្រៃការពារ ដោយមូលហេតុតំបន់ខ្លះត្រូវបានទន្ទ្រានពីប្រជាជន ភ្លើងឆេះព្រៃ និងក្រោយពីកាត់ក្រីដកហូតដើមឈើងាប់ដែលអាចបង្ករហានីភ័យផ្សេងៗដល់មនុស្ស សត្វ ប្រាសាទ និងបរិស្ថាន ហើយព្រៃឈើក្នុងឧទ្យានអង្គរនេះ ត្រូវបានបែងចែកជាបីសំខាន់ៗគឺ ទី១.តំបន់ឧទ្យានបន្ទាយស្រី , ទី២. តំបន់ឧទ្យានកណ្តាល និង ទី៣.តំបន់ឧទ្យានរលួស ដែលគ្របដណ្ដប់លើផ្ទៃដីទំហំ៤០១គីឡូម៉ែត្រក្រឡា និងចែកចេញជា១៤បុស្តិ៍ មានបុគ្គលិកចំនួន៨៤នាក់ ចុះយាមល្បាតជាប្រចាំ និង ថែទាំ ព្រមទាំងព្យាលបាលដើមឈើពេលមានជំងឺ លើកលែងតែតំបន់ប្រាសាទបេងមាលា ស្ថិតនៅក្រៅតំបន់ឧទ្យានអង្គរ ។
លោក ស៊ិន ពិសី បានឲ្យដឹងទៀតថា ក្រុមភ្នាក់ងារគ្រប់គ្រងព្រៃឈើ តែងតែមានកម្មវិធីដាំកូនឈើជារៀងរាល់ឆ្នាំ ហើយមួយលើកៗជាច្រើនរយដើម ដោយមានការចូលរួមពីថ្នាក់ដឹកនាំអាជ្ញាធរជាតិអប្សរា ស្ថាប័នរដ្ឋ ស្ថាប័នអន្តរជាតិ វិស័យឯកជន សហគមន៍ ព្រះសង្ឃ និងសិស្សសាលាជាដើម បំពេញនូវទីតាំងដែលគ្មានព្រៃឈើ សរុបប្រមាណ៣ម៉ឺនដើមក្នុងមួយឆ្នាំៗនៅឧទ្យានអង្គរ ហើយអាជ្ញាធរជាតិអប្សរា បានចែកកូនឈើដល់ស្ថាប័នផ្សេងៗ ព្រះសង្ឃ និងប្រជាជនក្នុងតំបន់អង្គរទៅដាំក្នុងវត្ត ភូមិ ឃុំ មូលដ្ឋានរបស់ខ្លួនដើម្បីបង្កើនចំនួនព្រៃឈើ បង្កើនគម្របបៃតងដល់បរិស្ថានឱ្យមានបរិយាកាសស្រស់ថ្លា ពិសេសគឺទាក់ទាញទេសចរ ។
លោក ស៊ិន ពិសី បានឲ្យដឹងបន្ថែមទៀតថា ព្រៃឈើមានសារៈសំខាន់ទាំងបរិស្ថាន និងសោភ័ណភាពសម្រាប់មនុស្សជាតិ ដូច្នេះតាមរយៈនេះ សូមអំពាវនាវដល់អាជ្ញាធរមូលដ្ឋានជួយអប់រំដល់ប្រជាជន កុំឱ្យពួកគាត់កាប់ទន្ទ្រានដីព្រៃធ្វើជាកម្មសិទ្ធិ ចូលរួមដាំដើមឈើឱ្យបានច្រើនជាងបំផ្លាញ និងពេលដុតចម្ការត្រូវគ្រប់គ្រងភ្លើងឱ្យបានត្រឹមត្រូវ ជៀសវាងមានគ្រោះថ្នាក់ និងមានហានីភ័យដល់ព្រៃឈើក្នុងតំបន់ឧទ្យានអង្គរ៕
អត្ថបទ និង រូបថត ៖ លោក ម៉ាត់ អារីហ្វីន
កែសម្រួលអត្ថបទ ៖ លោក លីវ សាន្ត
