ព្រះតេជគុណព្រះគ្រូធម្មវិសុទ្ធិកោសល ឥទ្ទបាលី កែវ អាន ឧត្តមទីប្រឹក្សាព្រះសង្ឃនាយក នៃព្រះរាជាណាចក្រកម្ពុជា និងជាព្រះគ្រូចៅអធិការវត្តឥន្ទ្របត្តបុរី ហៅវត្តអង្គរខាងត្បូង មានថេរដីកាថា ក្នុងន័យផ្សាភ្ជាប់វិស័យព្រះពុទ្ធសាសនា ជាមួយនឹងសង្គម ក្នុងឱកាសប្រារព្ធពិធីបុណ្យវិសាខបូជា ដោយភ្ជាប់ជាមួយពិធីបំបួសកុលបុត្រ កុលធីតា ចំនួន៤៤៩រូបនៅប្រាសាទអង្គរវត្ត នាឆ្នាំ២០១៩នេះ គឺក្នុងគោលបំណងដើម្បីផ្តល់ឱកាសដល់យុវជន យុវនារី ដែលជាទំពាំងស្នងឫស្សីបានសិក្សាអំពីព្រះពុទ្ធសាសនា និងក្រមសីលធម៌រស់នៅ ដើម្បីឲ្យពួកគេបានកសាងខ្លួនជាធនធានល្អប្រសើរសម្រាប់សង្គមជាតិ ជាពិសេសអ្វីដែលអ្នកត្រូវបានបំបួសទាំងនោះ ធ្លាប់បានប្រព្រឹត្តខុសឆ្គងចំពោះអ្នកមានគុណ អាចនឹងមានឱកាសកែប្រែខ្លួនបាន តាមរយៈនៃការអប់រំតាមបែបព្រះពុទ្ធសាសនា ដូច្នេះឆ្នាំ២០១៩នេះ គឺជាឆ្នាំទី៩ហើយ ដែលវត្តអង្គរខាងត្បូង បានប្រារព្ធពិធីបំបួសកុលបុត្រ-កុលធីតា ដោយផ្សាភ្ជាប់ជាមួយនឹងកម្មវិធីបុណ្យវិសាខបូជា ។
ព្រះតេជគុណ កែវ អាន មានថេរដីកាទៀតថា កម្មវិធីបំបួសថ្វីត្បិតតែមានរយៈពេលខ្លីក៏ពិតមែន តែក៏សង្ឃឹមថានឹងអាចអប់រំបន្ទន់និស្ស័យដល់យុវជនមួយចំនួន បានជាបុណ្យកុសលផ្ទាល់ខ្លួនផង និងសិក្សាស្វែងយល់តាមរយៈកម្មវិធីអប់រំប្រចាំថ្ងៃ យល់ពីគុណតម្លៃរបស់មាតាបិតា ឬយ៉ាងហោចណាស់ក៏ក្រោយពីចាកភ្នួសទៅ ពួកគាត់នឹងចេះប្រើកាយវិការឱនលំទោន ប្រើសំដីសំដៅសមរម្យទៅកាន់មនុស្សផងគ្នាជុំវិញខ្លួន ព្រោះថា ក្នុងឋានៈជាពុទ្ឋបរិស័ទ ត្រូវប្រឹងប្រែងរៀនសូត្រព្រះពុទ្ឋសាសនាឱ្យយល់ច្បាស់យកពុទ្ឋធម៌មកអនុវត្តប្រចាំថ្ងៃ ថែរក្សានិងផ្សព្វផ្សាយពាក្យប្រៀនប្រដៅរបស់ព្រះពុទ្ឋអំពីសន្តិភាព បញ្ញា មេត្តា ករុណា ដល់កុលបុត្រខ្មែរ និងមនុស្សជាតិជំនាន់ក្រោយឱ្យបានទូលំទូលាយ។
សូមបញ្ជាក់ថា បុណ្យវិសាខបូជានេះ ត្រូវបានប្រកាសទទួលស្គាល់ជាផ្លូវការដោយសន្និបាតសង្ឃលើកទី១ នៃ ( World Fellowship of Buddhists ) ដែលបានប្រារព្ធឡើងនៅប្រទេសស្រីលង្កាក្នុងឆ្នាំ១៩៥០ ហើយពិធីបុណ្យនេះ ត្រូវបានរៀបចំរៀងរាល់ថ្ងៃ១៥កើត ខែពិសាខជារៀងរាល់ឆ្នាំជុំវិញពិភពលោក ។
បុណ្យវិសាខបូជា គឺរំលឹកដល់ហេតុ៣ នៃអង្គព្រះពុទ្ធព្រះនាមសមណគោត្តម គឺ ទ្រង់ប្រសូត្រថ្ងៃ១៥កើត ខែពិសាខ ឆ្នាំចរ មុនពុទ្ធសករាជ ៨០ឆ្នាំ , ទ្រង់ត្រាសដឹង ថ្ងៃពុធ១៥កើត ខែពិសាខ ឆ្នាំរកា ក្នុងព្រះជន្ម៣៥វស្សា និង ទ្រង់បរិនិព្វានថ្ងៃអង្គារ ១៥កើត ខែពិសាខ ឆ្នាំម្សាញ់ ក្នុងព្រះជន្ម៨០វស្សា ។
ថ្ងៃទី១៥ ខែធ្នូ ឆ្នាំ១៩៩៩ អង្គការសហប្រជាជាតិ បានកំណត់យកវិសាខបូជាជាទិវាពិភពលោក និងទទួលស្គាល់ជាសាកលអំពីការចូលរួមចំណែករបស់ព្រះពុទ្ធសាសនា ក្នុងពិភពលោកជាង២៥០០ឆ្នាំមកនេះ និងត្រូវបន្តឥទ្ធិពលរបស់ខ្លួន ក្នុងការលើកស្ទួយចិត្តវិញ្ញាណរបស់មនុស្សជាតិ តទៅ ដើម្បីសុខសន្តិភាព ៕
អត្ថបទ និង រូបថត ៖ លោក ងិន គឹមឡេង និង លោក យូ វង្ស
កែសម្រួលអត្ថបទ ៖ លោក លីវ សាន្ត
