ក្រសួងបរិស្ថានកម្ពុជា-ថៃ បានសហការរៀបចំកិច្ចប្រជុំលើកទី១ នៃគណៈកម្មការតម្រង់ទិស នៃកិច្ចសហប្រតិបត្តិការអាស៊ាន-ន័រវែស ស្តីពីការកសាងសមត្ថភាពមូលដ្ឋានក្នុងការកាត់បន្ថយការបំពុលប្លាស្ទីក ក្នុងតំបន់អាស៊ាន-ASEANO ដំណាក់កាលទី២ នៅក្រុងសៀមរាប ដែលកិច្ចប្រជុំនេះមានរយៈពេល ២ថ្ងៃ ចាប់ពីថ្ងៃទី៤-៥ ខែមីនា ឆ្នាំ២០២៤ ដោយមានការចូលរួមពីអស់លោកលោកស្រីជាតំណាងប្រទេសជាសមាជិកអាស៊ាន ព្រមទាំងគណៈប្រតិភូ អ្នកជំនាញពាក់ព័ន្ធ តំណាងមកពីដៃគូពាក់ព័ន្ធ។
លោក យន់ លីនណេ អភិបាលរងខេត្តសៀមរាប បានបញ្ជាក់ថា ខេត្តសៀមរាប ជាខេត្តសំបូរទៅដោយធនធានធម្មជាតិ និងសម្បត្តិបេតិកភណ្ឌវប្បធម៌ជាច្រើន រួមនឹងតភ្ជាប់ទៅបឹងទឹកសាបដ៏ធំបំផុតនៅអាស៊ីអាគ្នេយ៍ ជាប់ចំណាត់ថ្នាក់ទី៤ នៅលើពិភពលោកដែលជាបឹងធំបំផុត។ សម្បត្តិបេតិកភណ្ឌវប្បធម៌ ទីតាំងយុទ្ធសាស្ត្រនេះ មិនមែនជារឿងចៃដន្យទេ ប៉ុន្តែជាការឆ្លុះបញ្ចាំងពីតួនាទីដែលមិនអាចខ្វះបាន ហើយទឹកដើរមានតួនាទីយ៉ាងសំខាន់ក្នុងការផ្តល់អត្ថប្រយោជន៍ផ្សេងៗសម្រាប់មនុស្ស សត្វ និងរុក្ខជាតិ តាមរយៈការផ្តល់ទីជម្រក អាហារ (ត្រី សាច់ បន្លែ) ឱសថបុរាណ មធ្យោបាយធ្វើដំណើរ និងទីកន្លែងប្រវត្តិសាស្ត្រដែលមានតម្លៃវប្បធម៌ និងទេសចរណ៍។ ក្នុងនោះ បឹងទន្លេសាប ដែលជាតំបន់បម្រុងជីវមណ្ឌលពិភពលោករបស់អង្គការយូណេស្កូ ផ្ទុកសត្វក្នុងទឹក និងសត្វព្រៃលើដីជាច្រើនប្រភេទ ដោយផ្តល់ចំណី និងកន្លែងចិញ្ចឹមសត្វស្លាបទឹកជាច្រើន។ លក្ខខណ្ឌជីវភូមិសាស្ត្រនៃបឹងទន្លេសាបមានសារសំខាន់ ក្នុងការចិញ្ចឹមបីបាច់ថែរក្សាទេសភាព បរិស្ថាន ដែលមានគុណភាពខ្ពស់ ជម្រុញទាំងការអភិវឌ្ឍន៍សេដ្ឋកិច្ចសង្គម និងជីវភាពរស់នៅយូរអង្វែងរបស់សហគមន៍មូលដ្ឋានពេញមួយសតវត្ស។
ឯកអគ្គរដ្ឋទូតន័រវេសប្រចាំអាស៊ាន ឯកឧត្តម Kjell Tormod Pettersen ក្នុងឱកាសនោះដែរ ក៏បានលើកឡើងអំពីចំណោទបញ្ហាបរិស្ថាននៅលើពិភពលោក បានធ្វើឲ្យមានការបម្រែបម្រួលអាកាសធាតុ និងការបំពុលបរិយាកាសនៅក្នុងតំបន់ ធ្វើប្រទេសមួយចំនួនទទួលរងផលប៉ះពាល់ខ្លាំងជាងគេពីបម្រែបម្រួលអាកាសធាតុ។ ជាមួយគ្នានោះផលប៉ះពាល់នៃថង់ប្លាស្ទិក បានបំពុលដល់បរិស្ថាននៅលើភពផែនដី សំខាន់នៅលើដី ក្នុងដី ក្នុងទឹក គឺវាត្រូវការពេលវេលាជាច្រើនរយឆ្នាំដើម្បីធ្វើការបំបែក សំណល់ប្លាស្ទិកគឺសារធាតុដែលមិនងាយនឹងពុកផុយ ឬរលួយបានដោយងាយនោះទេ។
ឯកឧត្តម សាន វណ្ណធី រដ្ឋលេខាធិការក្រសួងបរិស្ថានកម្ពុជា បានធ្វើការវាយតម្លៃខ្ពស់ចំពោះលទ្ធផលការងារប្រែប្រួលអាកាសធាតុ ការងារនិរន្តរភាពបរិស្ថាន ការងារអភិរក្សធម្មជាតិ និងជីវៈចម្រុះ ការងារអប់រំបរិស្ថាន ការងារគ្រប់គ្រងធនធានទឹក ការងារតំបន់ឆ្នេរ និងបរិស្ថានសមុទ្រ ការងារសារធាតុគីមីនិងសំណល់ ការងារបំពុលផ្សែងអ័ព្ទឆ្លងដែន និងវឌ្ឍនភាពការងាររបស់មជ្ឈមណ្ឌលជីវៈចម្រុះអាស៊ាន។ សំណល់ប្លាស្ទិក បានកើនឡើងដោយសារតែកំណើនប្រជាពលរដ្ឋ កំណើនជីវភាពនិងសេដ្ឋកិច្ច ការផ្លាស់ប្តូរឥរិយាបទក្នុងការប្រើប្រាស់ និង ការប្រើប្រាស់ប្លាស្ទិកសម្រាប់វេចខ្ចប់ម្ហូបអាហារ ឬសម្ភារផ្សេងៗ និងការខ្វះខាតចំណេះដឹងក្នុងការញែកសម្រាម។
ឯកឧត្តមរដ្ឋលេខាធិការ បានបញ្ជាក់ថា ដើម្បីចូលរួមជាមួយរាជរដ្ឋាភិបាលកម្ពុជា កាត់បន្ថយសំណល់ប្លាស្ពីក ដែលជាកម្លាំងរួម និងទាមទារពេលវេលា ក្នុងការកើតបន្ថយ។ កាកសំណល់ប្លាស្ទីករាប់លានតោន ដែលក្នុងមួយឆ្នាំហូរចូលទៅក្នុងសមុទ្រ ពីទន្លេ ដែលបង្កឲ្យមានផលប៉ះពាល់ ដល់ប្រព័ន្ធ អេកូឡូស៊ី សុខភាព និងសុខុមាលភាពប្រជាពលរដ្ឋ ដែលអាស្រ័យផលពីទន្លេមេគង្គនេះ។ ការបំពុលដោយ ថង់ប្លាស្ទីក នៅទន្លេមេគង្គ គឺជាបញ្ហាបរិស្ថានដ៏សែនស្មុគស្មាញ ដែលទាមទារឱ្យមានការដោះស្រាយរួមគ្នា និងមានការចូលរួមពីក្រុមមជ្ឈដ្ឋានតាំងពីថ្នាក់ជាតិ អន្តរជាតិផងដែរ។ វិបត្តិប្លាស្ទិក តម្រូវឲ្យមានកិច្ចខិតខំប្រឹងប្រែងរួមគ្នា រិះរកអ្វីដែលត្រូវធ្វើផ្សេងពីមុន ដើម្បីបង្កើតនូវសេដ្ឋកិច្ចវិលជុំ ដែលបរិមាណសំណល់ស្មើសូន្យ ។ គម្រោងនេះនឹងពង្រឹងកិច្ចសហប្រតិបត្តិការក្នុងចំណោមស្ថាប័នពាក់ព័ន្ធ និងប្រទេសនានា ដែលជម្រុញកិច្ចសហប្រតិបត្តិការក្នុងតំបន់ ក៏ដូចជាកិច្ចសហការជាសកល លើការគ្រប់គ្រង និងកាត់បន្ថយសំណល់ប្លាស្ទិកប្រកបដោយប្រសិទ្ធភាព និងការដោះស្រាយកង្វល់បរិស្ថានដែលកំពុងកើតមានជាសកលផ្សេងទៀត៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
