ជាជំនឿ ឬទម្លាប់ របស់ប្រជាពលរដ្ឋនៅភូមិស្ទឹង ឃុំសំរោង ស្រុកសូទ្រនិគម ខេត្តសៀមរាប ឱ្យតែដល់បុណ្យចូលឆ្នាំថ្មី គឺប្រជាពលរដ្ឋក្នុងភូមិទាំងមូល តែងតែនិមន្តព្រះសង្ឃស្រោចទឹក នៅតាមផ្ទះនិមួយៗព្រមគ្នាតែម្តងដើម្បីឱ្យគ្រោះចង្រៃហូរទៅតាមទឹក និងសុំសេចក្តីសុខ ក្នុងឱកាសបុណ្យចូលឆ្នាំថ្មី សម្រាប់ឆ្នាំនេះបានធ្វើឡើងនៅរសៀលថ្ងៃទី៧ ខែមេសា ឆ្នាំ២០២៤។
លោកតា ម៉ម នឿម រស់នៅភូមិស្ទឹង ឃុំសំរោង ស្រុកសូទ្រនិគម ខេត្តសៀមរាប បានឱ្យដឹងថា ព្រះសង្ឃនិមន្តមកសូត្រមន្តស្រោចទឹកដល់ប្រជាពលរដ្ឋនៅក្នុងភូមិនេះ គឺជាជំនឿមួយ ដែលប្រជាពលរដ្ឋនៅក្នុងភូមិនេះ បានអនុវត្តន៌តាំងពីចាស់ៗជំនាន់មក។ ដោយអ្នកភូមិមានជំនឿថា ការនិមន្តព្រះសង្ឃឱ្យមកស្រោចទឹកនេះ ជាការរំដោះគ្រោះ និងរឿងអាក្រក់ៗ ដែលកំពុងកើតមានឱ្យហូរទៅតាមទឹក និងសុំសេចក្តីសុខសប្បាយសម្រាប់ក្រុមគ្រួសារ ក្នុងឆ្នាំថ្មីដែលបានឈានចូលមកដល់។
លោកតាបន្តថា ពិធីនេះតែងតែធ្វើជារាងរាល់ឆ្នាំ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ។ ហើយមូលហេតុដែលប្រជាពលរដ្ឋនៅក្នុងឃុំសំរោងនេះ តែងតែជឿ គោរព និងធ្វើពិធីនេះ គឺដោយសារតែពួកគាត់ធ្វើទៅតែងតែជួបនូវសេចក្តីសុខចម្រើន ដោយនៅក្នុងពិធីនេះ មិនត្រឹមតែស្រោចទឹកឱ្យតែមនុស្សប៉ុណ្ណោះទេ សូម្បីតែសម្ភារប្រើប្រាស់ដូចជា ម៉ូតូ ឡាន ក៏បានឱ្យព្រះសង្ឃប្រោះព្រំឱ្យដែរ ដើម្បីឱ្យពេលធ្វើដំណើរទៅណាជួបតែសុវត្ថិភាព។ លោកតាចង់ឱ្យកូនចៅជំនាន់បន្តធ្វើពិធីនេះបន្តទៅមុនទៀត ព្រោះវាជាជំនឿ ឬទម្លាប់ ដែលបានធ្វើឱ្យអ្នកភូមិបានសេចក្តីសុខ។
ព្រះតេជគុណ ថង ចន្ថា ព្រះចៅអធិការវត្តសំរោង ស្ថិតនៅភូមិសំរោងជើង ឃុំសំរោង ស្រុកសូទ្រនិគម ខេត្តសៀមរាប មានថេរដីកាឱ្យដឹងថា ជារាងរាល់ឆ្នាំព្រះសង្ឃគង់នៅវត្តសំរាង តែងតែបាននិមន្តទៅស្រោចទឹកឱ្យពុទ្ធបរិស័ទទាំង៧ ភូមិ នៃឃុំសំរោងនេះ ដោយធ្វើឡើងរយៈពេល៧ថ្ងៃ គឺចាប់ពីថ្ងៃទី៧ រហូតទៅដល់ថ្ងៃស្រង់ព្រះ ដែលធ្វើឡើងនៅថ្ងៃទី ៣ ដែលត្រូវនឹងថ្ងៃឡើងស័ក ថ្ងៃចុងក្រោយ នៃពិធីបុណ្យចូលឆ្នាំថ្មីប្រពៃណីខ្មែរ។ព្រះតេជគុណបន្តថា ក្នុងរយៈពេល៧ថ្ងៃនេះ ក្នុង១ថ្ងៃព្រះសង្ឃនិមន្តទៅស្រោចទឹកប្រោះព្រំឱ្យប្រជាពលរដ្ឋបានតែមួយភូមិទេ។ ហើយនៅតាមភូមិនិមួយៗចាប់ពីម៉ោង៣ ឬ៤ ទៅប្រជាពលរដ្ឋបានដងទឹកដាក់ផ្ការៀបចំរួចជាស្រាចរងចាំព្រះសង្ឃនិមន្តទៅដល់។
សូមបញ្ជាក់ថា ប្រជាជនខ្មែរ មានជំនឿតៗគ្នាមកយូរហើយថា ស្រង់ព្រះទាំងព្រះបដិមាថ្ម និង ព្រះរស់ សុទ្ធតែទទួលបានមកវិញនូវសេចក្ដីសុខចម្រើន ត្រជាក់ត្រជុំ។ ទឹកតំណាងភាពត្រជាក់ ម្ល៉េះហើយនៅពេលស្រោចស្រពលើរាងកាយជនណាម្នាក់ហើយនឹងបានត្រជាក់។ ទាំងអ្នកស្រោចស្រពគេ និងគេស្រោចឱ្យសុទ្ធតែសប្បាយចិត្តដោយជឿជាក់ថានឹងទទួលបាននូវបុណ្យកុសលល្អទៅថ្ងៃខាងមុខនិងជាតិក្រោយ។ ដូចនេះហើយបានជា ប្រជាពលរដ្ឋនៅក្នុងភូមិទាំង៧ នៃឃុំសំរោងនេះ គោរព និងបន្តនិមន្តព្រះសង្ឃស្រោចទឹក នៅតាមផ្ទះនិមួយៗព្រមគ្នាតែម្តង៕
អត្ថបទ និងរូបភាព៖ លោក ឃុត សៅ
កែសម្រួល៖ លោក អ៊ុន ណារាជ្យ
