នៅថ្ងៃទី៩ ខែមិថុនា ឆ្នាំ២០២៤នេះ ឯកឧត្ដម សុខ សូកេន រដ្ឋមន្រ្តីក្រសួងទេសចរណ៍ បានដឹកនាំប្រតិភូក្រសួង ចុះធ្វើទស្សនកិច្ចនៅឧទ្យានជាតិព្រះជ័យវរ្ម័ន-នរោត្តម ភ្នំគូលែន និងសហគមន៍បឹងឈូក ស្រុកបន្ទាយស្រី ខេត្តសៀមរាប ដើម្បីស្វែងយល់ពីសហគមន៍ទេសចរណ៍ និងពិនិត្យកែលម្អតំបន់ទាំងនោះ ក្នុងន័យបង្កើនភាពទាក់ទាញបន្ថែមទៀត រួមចំណែកក្នុងការជំរុញយុទ្ធនាការទស្សនាសៀមរាប ឆ្នាំ២០២៤។
សូមជម្រាបថា ក្នុងដំណើរទស្សនកិច្ចនេះ ឯកឧត្ដមរដ្ឋមន្រ្តី បានដឹកនាំប្រតិភូស្វែងយល់ពីការរៀបចំមជ្ឈមណ្ឌលស្រាវជ្រាវ និងអភិរក្សកេសរកូល សុខ អាន ភ្នំគូលែន ខណៈឯកឧត្តម បានបង្ហាញការចាប់អារម្មណ៍ចំពោះការរៀបចំបង្កាត់ពូជកេសរកូល ការបង្កាត់ពូជរុក្ខជាតិវ៉ានីឡា និងគម្រោងអភិវឌ្ឍន៍មជ្ឈមណ្ឌលដែលមានច្រើនផ្នែកក្នុងគោលដៅធ្វើឱ្យទីនេះក្លាយជាមជ្ឈមណ្ឌលទេសចរណ៍ដ៏ទាក់ទាញនាពេលអនាគត។
ឯកឧត្តម ក៏បានបន្តចុះសិក្សាបន្ថែមទៀត ចំពោះទីតាំងទឹកជ្រោះ និងព្រះអង្គធំ ដើម្បីពិនិត្យត្រៀមរៀបចំតំបន់រមណីយដ្ឋាននេះឱ្យក្លាយជាគោលដៅដ៏ទាក់ទាញ និងមានសណ្ដាប់ធ្នាប់ អនាម័យថែមមួយកម្រិតទៀត ក្នុងនៃជំរុញការអនុវត្តយុទ្ធសាស្ត្រអភិវឌ្ឍន៍តំបន់ទេសចរណ៍អាទិភាពខេត្តសៀមរាប នៃតំបន់ភ្នំគូលែន មាន៦តំបន់ជាគោលដៅទេសចរណ៍ជំនឿ សាសនា ធម្មជាតិ ផ្សងព្រេង ទេសចរណ៍ស្រាវជ្រាវ និងវិទ្យាសាស្ត្រផងដែរ ឱ្យស្របតាមផែនការមេអភិវឌ្ឍន៍ទេសចរណ៍ខេត្ដសៀមរាប ឆ្នាំ២០២១-២០៣៥ ដែលបានដាក់ចេញដោយរាជរដ្ឋាភិបាលកម្ពុជា ក៏ដូចជាយុទ្ធសាស្រ្តបង្កើន៥ អភិវឌ្ឍ៣ “BUILD +3Ds” របស់ក្រសួងទេសចរណ៍។
នៅថ្ងៃដដែលនេះដែរ ឯកឧត្តមក៏បន្តដឹកនាំប្រតិភូ ចុះពិនិត្យនៅសហគមន៍ទេសចរណ៍បឹងឈូក ស្រុកបន្ទាយស្រីវិញ ដោយក្នុងនោះឯកឧត្ដម បានជំរុញឱ្យសហគមន៍ត្រូវបន្តពង្រឹងសេវាកម្ម ដើម្បីត្រៀមទទួលទេសចរក្រោយពេលវិបត្តិជំងឺកូវីដ។ ជាមួយគ្នានេះ ក្រសួងទេសចរណ៍នឹងបន្តខិតខំប្រឹងប្រែងផ្សព្វផ្សាយគោលដៅសំខាន់ៗ ដើម្បីទាក់ទាញភ្ញៀវទេសចរឱ្យកាន់តែច្រើនមកកម្សាន្តខេត្តសៀមរាប ក្នុងនោះក៏មានសហគមន៍បឹងឈូកផងដែរ៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
