ពិធីបុណ្យផ្កាប្រាក់មហាសាមគ្គី ឆ្នាំទី១១ ដើម្បីប្រមូលថវិកាឧបត្ថមដល់មន្ទីរពេទ្យកុមារអង្គរខេត្តសៀមរាប ដែលប្រារព្ធឡើងក្នុងបរិវេនវត្តរាជបូណ៍ ក្រុងសៀមរាប ទទួលបានថវិកាជិត ៧ម៉ឺនដុល្លារ ដើម្បីប្រើប្រាស់ក្នុងការទ្រទ្រង់ដល់ដំណើរការប្រតិបត្តិនៃមន្ទីរពេទ្យកុមារអង្គរ ក្នុងការផ្តល់សេវាថែទាំ និងព្យាបាលដល់កុមារ និងដើម្បីការចូលរួមចំណែកក្នុងការជួយសង្គ្រោះជីវិត និងលើកកម្ពស់សុខុមាលភាពកុមារកម្ពុជា។
ពិធីនេះប្រព្រឹត្តិទៅក្រោមព្រះរាជវត្តមានសម្តេចព្រះព្រហ្មរតនមុនី សិរីសុវណ្ណោ ពិន សែម គណៈមហានិកាយនៃព្រះរាជាណាចក្រកម្ពុជា និងជាព្រះចៅអធិការវត្តរាជបូណ៌ ព្រមទាំងព្រះមន្ត្រីសង្ឃគ្រប់លំដាប់ថ្នាក់ អាចារ្យ គណៈកម្មការវត្ត រួមជាមួយអាជ្ញាធរខេត្ត មន្ត្រីរាជការ ព្រមទាំងគណៈគ្រប់គ្រងទាំងអស់នៃមន្ទីរពេទ្យកុមារអង្គរ រួមនឹងសប្បុរសជនជាច្រើនរូប។
លោកវេជ្ជបណ្ឌិត ងួន ច័ន្ទភក្ត្រា ប្រធានមន្ទីរពេទ្យកុមារអង្គរខេត្តសៀមរាប បានឱ្យដឹងថា មន្ទីរពេទ្យកុមារអង្គរ ត្រូវបានបង្កើតឡើងនៅក្នុងឆ្នាំ១៩៩៩ ក្នុងគោលបំណងផ្តល់ការសេវាពិនិត្យ និងព្យាបាលជំងឺប្រកបដោយក្តីមេត្តាកតុណានិងកុណភាពខ្ពស់ ហើយមកដល់បច្ចុប្បន្ននេះ មន្ទីរ ពេទ្យបានជួយសង្គ្រោះជីវិតកុមារ ដែលមានជំងឺគ្រប់ប្រភេទបានជាច្រើនលាននាក់ មកពីគ្រប់ទិសទីក្នុងព្រះរាជាណាចក្រកម្ពុជា។ ចំពោះការរៀបចំពិធីបុណ្យផ្កាប្រាក់មហាសាមគ្គីឆ្នាំទី១១នេះ ប្រមូលបានថវិកាប្រមាណជាង ៦៥.៣០០ដុល្លារអាមេរិក ហើយការដែលចូលរួមបរិច្ចាគថវិការបស់មហាជនទាំងក្នុង និងក្រៅប្រទេសមកកាន់មន្ទីរពេទ្យនេះ ពិតជាមានសារៈសំខាន់ខ្លាំងណាស់ ដើម្បីបន្តដំណើរការពិនិត្យ និងព្យាបាលជំងឺជូនដល់កុមារកម្ពុជា។
លោកវេជ្ជបណ្ឌិត ក៏បានថ្លែងអំណរគុណយ៉ាងជ្រាលជ្រៅ ចំពោះព្រះសង្ឃ និងថ្នាក់ដឹកនាំខេត្ត ព្រមទាំងសប្បុរសជនទាំងអស់ ដែលបានបន្តចូលរួមបរិច្ចាគថវិកាជូនដល់មន្ទីរពេទ្យ ដើម្បីបន្តដំណើរការពិនិត្យ និងព្យាបាលជំងឺជូនដល់កុមារកម្ពុជា ហើយថវិកាដែលទទួលបានពីការរៀបចំពិធីបុណ្យផ្កាប្រាក់នេះ គឺជាចំណែកដ៏សំខាន់បំផុតដើម្បីថែរក្សាដំណើរការផ្តល់សេវាពិនិត្យ ព្យាបាល ថែទាំ សង្គ្រោះជីវិតកុមារកម្ពុជា ប្រកបដោយគុណភាព ក្តីមេត្តាករុណា នៅក្នុងមន្ទីរពេទ្យកុមារអង្គរផងដែរ៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
