នៅព្រឹកថ្ងៃទី១១ ខែមិថុនា ឆ្នាំ២០២៤ មន្ទីព័ត៌មានខេត្តសៀមរាប បានសហការជាមួយការិយាល័យនគរបាលប្រយុទ្ធប្រឆាំងគ្រឿងញៀន នៃស្នងការនគរបាលខេត្តសៀមរាប រៀបចំធ្វើតេស្តស្វែងរកសារធាតុញៀនតាមរយៈទឹលមូត្រលើថ្នាក់ដឹកនាំ មន្ត្រីរាជការ និងមន្ត្រីកិច្ចសន្យានៃមន្ទីព័ត៌មានខេត្តសៀមរាប ចំនួន ៥៦នាក់។
លោក លីវ សាន្ត ប្រធានមន្ទីព័ត៌មានខេត្តស្តីទី បានបញ្ជាក់ថា អនុវត្តតាមបទបញ្ជាលេខ ០១ បប ចុះថ្ងៃទី២០ ខែកុម្ភៈ ឆ្នាំ២០២៤កន្លងទៅនេះ របស់រាជដ្ឋាភិបាលកម្ពុជា ស្តីពីការដាក់ចេញវិធានការម៉ឺងម៉ាត់ ក្នុងការប្រយុទ្ធប្រឆាំងគ្រឿងញៀនខុសច្បាប់នៅតាមក្រសួង ស្ថាប័ន និងរដ្ឋបាលថ្នាក់ក្រោមជាតិ។ ជាក់ស្ដែងថ្ងៃនេះ មន្ទីព័ត៌មានខេត្តសៀមរាប បានរៀបចំធ្វើតេស្តដល់បងប្អូនមន្ត្រីរាជការ និងមន្ត្រីជាប់កិច្ចសន្យាទាំងអស់សរុបចំនួន ៥៦នាក់ ស្រី១៩នាក់ ជាលទ្ធផលគឺទទួលបានអវិជ្ជមានទាំងអស់។
ព័ត៌មានជាតិ ថ្មីៗ
លោកប្រធានមន្ទីរស្ដីទី មានប្រសាសន៍ថា ការធ្វើតេស្តនាពេលនេះ គឺជាការចូលរួមចំណែកជាមួយរាជរដ្ឋាភិបាល និងរដ្ឋបាលខេត្តសៀមរាប ធ្វើយ៉ាងណាធានាប្រសិទ្ធភាព នៃការអនុវត្តយុទ្ធនាការប្រឆាំងគ្រឿងញៀនខុសច្បាប់លើកទី៩ ដែលជាអាទិភាពនយោបាយរបស់រាជរដ្ឋាភិបាល ក៏ដូចជាការលើកកម្ពស់ជំនឿទុកចិត្ត ប្រសិទ្ធភាពការងារ និងអភិបាលកិច្ចល្អនៅក្នុងស្ថាប័ន មន្ទីរអង្គភាពជុំវិញខេត្ត។ ជាមួយនេះលោកក៏បានថ្លែងអំណរគុណដល់ថ្នាក់ដឹកនាំ និងមន្រ្តីរាជការ និងក្រុមការងារនៃស្នងការនគរបាលខេត្ត ក្នុងការចូលរួមផ្ដល់កិច្ចសហការណ៍ដ៏ថ្លៃថ្លា ក្នុងការចុះធ្វើតេស្តរកសាធាតុញៀន និងសង្ឈឹមយ៉ាងមុតមាំថាមន្ត្រីនៃមន្ទីព័ត៌មានខេត្តសៀមរាបទាំងអស់ នឹងមិនពាក់ព័ន្ឋជាមួួយគ្រឿងញៀនជាដាច់ខាត។
លោកបញ្ជាក់ថា មន្ត្រីរាជការក្នុងខេត្តទាំងអស គឺនឹងត្រូវធ្វើតេស្តទាំងអស់គ្នា ដើម្បីបញ្ជាក់នូវភាពស្អាតស្អំ ភាពត្រឹមត្រូវ ក៏ដូចជាបញ្ជាក់ពីការចូលរួមគាំទ្រយុទ្ធនាការនេះ ដើម្បីអនុវត្តទៅទទួលបានជោគជ័យ ស្របតាមបទបញ្ជារបស់សម្តេចធិបតី ហ៊ុន ម៉ាណែត នាយករដ្ឋមន្ត្រី ដោយមន្ត្រីរាជការត្រូវធ្វើជាគំរូសម្រាប់ប្រជាពលរដ្ឋ។ ជាមួយនោះតែក្នុងករណីរកឃើញមន្ត្រីជាប់ពាក់ព័ន្ធ និងប្រើប្រាស់គ្រឿងញៀន នោះនឹងត្រូវបណ្តេញចេញពីក្របខណ្ឌដោយគ្មានការលើកលែងឡើយ៕
អត្ថបទ៖ កញ្ញា ប្រ៊ន ស្រីនិត
កែសម្រួល៖ លោក អ៊ុន ណារាជ្យ
