យោងតាមរបាយការណ៍របស់ក្រុមការងារឆ្លើយតបជាពហុវិស័យចំពោះអំពើហិង្សាទាក់ទងនឹងយេនឌ័រ (GBV) ខេត្តសៀមរាប សម្រាប់ឆមាសទី១ ឆ្នាំ២០២៤ ក្រុមការងារបានជួយអន្តរាគមន៍ដល់ស្ត្រី និងក្មេងស្រី ដែលរងគ្រោះដោយអំពើហិង្សាទាក់ទងនឹងយេនឌ័រសរុប ៨៦ករណី ក្នុងនោះ៖ រំលោភសេពសន្ថវះលើអនីតិជន ២៦ករណី និងរួមភេទជាមួយអនីតិជនយាយុក្រោម១៥ឆ្នាំ ៨ករណី ប្រទូស្តកេរ្តខ្មាស១ករណី និងសញ្ចាកម្មទាក់ទងនឹងពេស្យាចារកុមារ ១ករណី រំលោភសេពសន្ថវះលើអនីតិជន និងទិញពេស្យាចារកុមារ១ករណី និងអំពើហិង្សាក្នុងគ្រួសារ ៤៩ករណី។
ថ្លែងក្នុងកិច្ចប្រជុំប្រចាំឆមាសទី១ ឆ្នាំ២០២៤ របស់ក្រុមការងារឆ្លើយតបជាពហុវិស័យចំពោះអំពើហិង្សាទាក់ទងនឹងយេនឌ័រ (GBV) ខេត្តសៀមរាប នាថ្ងៃទី១១ ខែមិថុនា ឆ្នាំ២០២៤នេះ លោកស្រី ម៉ននី រងី្ស អភិបាលរងខេត្ត និងជាប្រធានក្រុមការងារ GBV បានមានប្រសាសន៍ថា កិច្ចប្រជុំនាពេលនេះ គឺដើមី្បលើកកម្ពស់ និងពង្រីកការផ្តល់សេវាជា ពហុវិស័យឆ្លើយតប ចំពោះអំពើហិង្សាលើស្រី និងក្មេងស្រី ប្រកបដោយប្រសិទ្ធិភាព និងទាន់ពេលវេលា ពីសំណាក់អ្នកពាក់ព័ន្ធ។
ក្រោមធ្វើការពិនិត្យ ពិភាក្សា និងឆ្លើយតបពីបញ្ហាដែលកើតមានកន្លងមករួចរាល់ លោកស្រី ម៉ននី រងី្ស បានជំរុញដល់ក្រុមការងារថ្នាក់ខេត្ត ក្រុងស្រុក ត្រូវបន្តរៀបចំផែនការសកម្មភាពដាក់បញ្ចូលទៅក្នុងផែនការខេត្ត ក្រុងស្រុក និងលើកគម្រោងផែនការ ដើម្បីស្នើសុំកញ្ចប់ថវិកាសម្រាប់អនុវត្តផែនការនោះឲ្យមានប្រសិទ្ធភាព។ ជាមួយគ្នានោះ ត្រូវបន្តស្វែងរកការគាំទ្រពីអ្នកពាក់ព័ន្ធ និងអង្គការដៃគូ ដើម្បីពង្រឹងសមត្ថភាពតាមរយៈវគ្គបណ្តុះបណ្តាលពីកញ្ចប់សេវាទាំង៥ និងបន្តពង្រឹងកិច្ចសហការក្នុងការផ្តល់សេវាដល់ស្ត្រី និងក្មេងស្រីរងគ្រោះដោយអំពើហិង្សាទាក់ទងនឹងយេនឌ័រ។
លោកស្រី ម៉ននី រងី្ស បញ្ជាក់ថា តាមរយ:នៃកិច្ចប្រជុំនេះ សូមឲ្យគ្រប់ភាគីពាក់ព័ន្ធទាំងអស់ ត្រូវរួមគ្នាទប់ស្កាត់អំពើហិង្សាដែលពាក់ព័ន្ធនឹងយេនឌ័រគ្រប់ទម្រង់ដូចជាអំពើហិង្សាក្នុងគ្រួសារ ការរំលោភផ្លូវភេទ និងការជួញដូរស្រ្តី និងកុមារជាដើមជាពិសេសនៅតាមបណ្តាក្រុងស្រុកទាំង១៣ របស់ខេត្តត្រូវរួមគ្នាបង្កើនប្រសិទ្ធភាពការងារ។ ក្នុងនោះក្រុមការងារឆ្លើយតបជាពហុវិស័យចំពោះអំពើហិង្សាទាក់ទងនឹងយេនឌ័រថ្នាក់ខេត្ត ត្រូវមានកិច្ចសហការល្អជាមួយស្ថាប័ន មន្ទីរវិស័យ អាជ្ញាធរមានសមត្ថកិច្ច ក្រុមការងារថ្នាក់ក្រុងស្រុក និងអង្គការដៃគូពាក់ព័ន្ធ ក្នុងការសម្របសម្របួលផ្តល់សេវាឆ្លើយតបដល់ជនរងគ្រោះ ដោយអំពើហិង្សាទាក់ទងនឹងយេនឌ័រ បានទាន់ពេលវេលា៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
