នារសៀលថ្ងៃទី១៣ ខែមិថុនា ឆ្នាំ២០២៤ ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តសៀមរាប បានអញ្ជើញជាអធិបតីក្នុងពិធីប្រកាសចូលកាន់មុខតំណែង ឯកឧត្តម លី សំរិទ្ឋ ជាប្រធានក្រុមប្រឹក្សាខេត្តសៀមរាប និងប្រកាសសមាជិកាក្រុមប្រឹក្សាខេត្តចំនួន ២៧រូប ដែលទទួលបានពីការបោះឆ្នោតរបស់តំណាងប្រជាពលរដ្ឋ ពោលគឺសមាជិកសមាជិកាក្រុមប្រឹក្សាឃុំសង្កាត់ ដោយផ្តល់សេចក្តីទុកចិត្តបោះឆ្នោតជ្រើសរើសជាសមាជិកក្រុមប្រឹក្សាខេត្ត អាណត្តិទី៤ ដើម្បីបន្តដឹកនាំ និងអភិវឌ្ឍន៍ខេត្តឲ្យមានការរីកចម្រើនបន្ថែមទៀត។
ជាមួយនឹងការទទួលបានការទុកចិត្តរបស់ពលរដ្ឋនេះ ឯកឧត្តម លី សំរិទ្ឋ ប្រធានក្រុមប្រឹក្សាខេត្ត បានប្ដេជ្ញាចិត្តគោរព និងអនុវត្តឱ្យបានខ្ជាប់ខ្ជួន ត្រឹមត្រូវតាមរដ្ឋធម្មនុញ្ញ ច្បាប់ និងលិខិតបទដ្ឋានគតិយុត្តនានា ពិសេសគោរពបទបញ្ជាផ្ទៃក្នុងរបស់ក្រុមប្រឹក្សា លើកកម្ពស់ស្មារតីសាមគ្គី ឯកភាពផ្ទៃក្នុង និងបន្តប្រពៃណីសហការឱ្យបានស្អិតរមួតជាមួយគណៈអភិបាលខេត្ត ក្រុមប្រឹក្សាប្រភេទផ្សេងទៀតក្នុងខេត្ត និងមន្ទីរអង្គភាពនានា សំដៅសម្រេចឲ្យបាននូវការអភិវឌ្ឍរីកចំរើនលើគ្រប់វិស័យ ស្របតាមកម្មវិធីនយោបាយ និងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលកម្ពុជា នីតិកាលទី៧ នៃរដ្ឋសភា និងសេចក្តីសម្រេចចិត្តសន្និបាតបូកសរុប និងទិសដៅការងាររបស់ក្រសួងមហាផ្ទៃ ក៏ដូចជារបស់រដ្ឋបាលខេត្តសៀមរាបជាបន្តបន្ទាប់។
មានប្រសាសន៍នាឱកាសនោះ ឯកឧត្តម នាយឧត្តមសេនីយ៍ ទៀ សីហា បានថ្លែងនូវការកោតសរសើរ និងវាយតម្លៃខ្ពស់ ចំពោះឯកឧត្តម លោកជំទាវ សមាជិក សមាជិកាក្រុមប្រឹក្សាខេត្តសៀមរាប ដែលត្រូវបានតំណាងប្រជាពលរដ្ឋដែលជាសមាជិកក្រុមប្រឹក្សាឃុំសង្កាត់ ផ្តល់សេចក្តីទុកចិត្តបោះឆ្នោតជ្រើសរើសជាសមាជិកក្រុមប្រឹក្សាខេត្តសៀមរាប អាណត្តិទី៤ ដើម្បីបន្តដឹកនាំខេត្តសៀមរាប សំដៅចូលរួមថែរក្សាសុខសន្តិភាព ស្ថេរភាព និងបន្តអភិវឌ្ឍឱ្យមានការរីកចម្រើន លើគ្រប់វិស័យបន្ថែមទៀត។ ឯកឧត្តម ក៏បានវាយតម្លៃនៃការបោះឆ្នោតជ្រើសរើសក្រុមប្រឹក្សារាជធានីខេត្ត ក្រុងស្រុកខណ្ឌ អាណត្តិទី៤ កន្លងមកនេះ គឺមានលក្ខណៈសេរី ត្រឹមត្រូវ យុត្តិធម៌ គ្មានអំពើហិង្សា ហើយលទ្ធផលនៃការបោះឆ្នោតត្រូវបានទទួលស្គាល់ពីគណបក្សនយោបាយដែលបានចូលរួមផងដែរ។
ឯកឧត្តមឧបនាយករដ្ឋមន្ត្រី មានប្រសាសន៍ទៀតថា ការធ្វើកំណែទម្រង់តាមបែបវិមជ្ឈការ និងវិសហមជ្ឈការនៅរដ្ឋបាលថ្នាក់ក្រោមជាតិ នៃកិច្ចដំណើរការរៀបចំ ដឹកនាំ គ្រប់គ្រងរដ្ឋបាលតាមបែបប្រជាធិបតេយ្យ គឺក្នុងគោលដៅលើកកម្ពស់អភិបាលកិច្ចល្អនៅថ្នាក់មូលដ្ឋាន ដើមី្បពង្រឹងការទទួលខុសត្រូវ និង គណនេយ្យភាពរបស់មន្ត្រីបុគ្គលិក ខែ្សបណ្តោយរបស់ក្រសួងស្ថាប័ន រដ្ឋបាលថ្នាក់ក្រោមជាតិ ហើយ ការបណ្តុះបណ្តាល និងកសាងសមត្ថភាពមន្ត្រីគ្រប់ថ្នាក់ អំពីការកំណែទម្រង់វិមជ្ឈការ វិសហមជ្ឈការ ក៏ត្រូវបានរៀបចំទាំងនៅថ្នាក់ជាតិ និងថ្នាក់ក្រោមជាតិ។
ឯកឧត្តម ក៏បានសង្កត់ធ្ងន់ថា ការរៀបចំផែនការអភិវឌ្ឍរយៈពេល៥ឆ្នាំ និងកម្មវិធីវិនិយោគ ៣ឆ្នាំរំកិលរបស់ខ្លួន ក្រុមប្រឹក្សាត្រូវឆ្លុះបញ្ចាំង និងឆ្លើយតបនឹងគោលបំណង និងគោលដៅអាទិភាពនៃយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល រួមទាំងកម្មវិធីនយោបាយអាទិភាពនានាផ្សេងទៀត។ ជាមួយនេះ ការចូលរួមអនុវត្តកម្មវិធីកំណែទម្រង់នានា របស់រាជរដ្ឋាភិបាលកម្ពុជា ក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រី បានដាក់ចេញនូវ យុទ្ធសាស្ត្របញ្ចកោណ ដំណាក់កាលទី១ ដែលបានកំណត់យកអាទិភាពគន្លឹះចំនួន៥ គឺ“មនុស្ស ផ្លូវ ទឹក ភ្លើង និងបច្ចេកវិទ្យា” ដែលយុទ្ធសាស្ត្របញ្ចកោណនេះ គឺផ្តោតលើការពង្រឹងអភិបាលកិច្ច និងការធ្វើទំនើបកម្មស្ថាប័នរដ្ឋឱ្យក្លាយទៅជារដ្ឋបាលសាធារណៈទំនើប ប្រកបដោយសមត្ថភាពខ្ពស់ ខ្លាំង វៃឆ្លាត និងស្អាតស្អំ ដើម្បីធានានិរន្តរភាព តួនាទី ដំណើរការរដ្ឋបាលសាធារណៈដោយតម្កល់ផលប្រយោជន៍ប្រជាជនជាធំ ព្រមជាមួយនឹងការកសាងជាតិ និងការពង្រឹងនីតិរដ្ឋ សំដៅដល់ការអភិវឌ្ឍសង្គម សេដ្ឋកិច្ច ប្រកបដោយបរិយាបន្ន និងចីរភាព៕
អត្ថបទ និងរូបភាព៖ លោក យូ វង្ស, មុី សុខារិទ្ធ
កែសម្រួល៖ លោក អ៊ុន ណារាជ្យ
