ដើម្បីរួមចំណែកលើកកម្ពស់គុណភាពសីលធម៌ការអប់រំ ក្នុងវិស័យសង្គមព្រះពុទ្ធសាសនាដល់សិស្សានុសិស្សឱ្យ កាន់តែទូលំទូលាយថែមទៀតផងដែរនោះ កាលពីថ្ងៃទី១៣ ខែមិថុនា ឆ្នាំ២០២៤នេះ ព្រះគ្រូវិចិត្រវង្សា ហែម គឹមសាន ញាតិធម្មោ ព្រះគ្រូចៅអធិការវត្តប្រាសាទគោកចក ក្រុងសៀមរាប បាននិមន្តដឹកនាំព្រះសង្ឃបើកដំណើរការកម្មវិធីបង្រៀនសីលធម៌សង្គមតាមបែបព្រះពុទ្ធសាសនាដល់សិស្សានុសិស្សនៃសាលាបឋមសិក្សាប្រាសាទគោកចក ក្នុងសង្កាត់គោកចក ក្រុងសៀមរាបរាប។
ព្រះគ្រូវិចិត្រវង្សា ហែម គឹមសាន ញាតិធម្មោ មានសង្ឃដីការថា កម្មវិធីអប់រំសីលធម៌សង្គមបែបព្រះពុទ្ធសាសនា ពិតជាមានសារៈសំខាន់ណាស់សម្រាប់វិស័យអប់រំ ពិសេសនៅតាមលាបឋមសិក្សា ពីព្រោះក្មេងៗគឺជាក្រដាស ស បើពួកគាត់ទទួលបានការអប់រំល្អ ពួកគាត់និងក្លាយជាមនុស្សដ៏មានសារៈសំខាន់របស់សង្គមជាតិ។ ដូចនេះហើយការបង្កើតកម្មវិធីបង្រៀនសីលធម៌សង្គមតាមរយៈព្រះពុទ្ធសាសនានេះ គឺចង់បង្ហាញឱ្យឃើញពីការយកចិត្តទុកដាក់លើអប់រំតាមរយៈព្រះពុទ្ធសាសនា ដោយមានការប្រកាន់ភ្ជាប់នូវគុណធម៌ សីលធម៌ និងវប្បធម៌របស់សង្គមខ្មែរយើង។ កម្មវិធីនេះដែរ វាជាការអប់រំដល់សិស្សានុសិស្សឱ្យបានយល់ច្បាស់ពីតម្លៃនៃការអប់រំតាមបែបសង្គមព្រះពុទ្ធសាសនា ពិសេសយល់ពីតម្លៃ នៃការដឹងគុណ គោរពបតិបត្តិចំពោះអ្នកមានគុណ តម្លៃនៃសាសនាដែលរួមចំណែកធំធេងក្នុងសង្គមខ្មែរ ហើយដើម្បីជួយណែនាំដល់ក្មួយៗឱ្យយល់ និងប្រព្រឹត្តអំពើល្អ មិនប្រើគ្រឿងញៀន គោរពច្បាប់ចរាចរណ៍ ប្រឹងប្រែងរៀនសូត្រ ធ្វើជាកូនល្អ សិស្សល្អ មនុស្សល្អ សម្រាប់សង្គម និងប្រទេសជាតិ។
ព័ត៌មានជាតិ ថ្មីៗ
ព្រះអង្គបន្តថា កម្មវិធីអប់រំតាមរយៈព្រះពុទ្ធសាសនានេះ គឺជាផ្នែកសំខាន់មួយដែលរួមចំណែកក្នុងការអប់រំផ្ដល់ចំណេះដឹងដល់សិស្សនៅតាមសាលារៀន ពិសេសការចែករំលែកតាមរយៈសាសនា ផ្សារភ្ជាប់ជាមួយទិដ្ឋភាពសង្គមនាពេលបច្ចុប្បន្ន។ ការបើកកម្មវិធីបង្រៀនសីលធម៌សង្គមតាមរយៈព្រះពុទ្ធសាសនាដល់សិស្សានុសិស្សនេះ មានចំនួន២សាលា ដែលនៅក្នុងសង្កាត់គោកចក ក្រុងសៀមរាប ក្នុងនោះនៅសាលាបឋមសិក្សាប្រាសាទគោកចកក្នុង១ខែ គឺបង្រៀន៤ដង រៀងរាល់ថ្ងៃសុក្រ ទាំងពេលព្រឹក និងពេលល្ងាច និងនៅសាលាបឋមសិក្សាមុខនាគ ១ខែ គឺបង្រៀន១ថ្ងៃ គឺរៀងរាល់ថ្ងៃព្រហស្បតិ៍ ទាំងពេលព្រឹក និងពេលល្ងាចផងដែរ៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
