កាលពីថ្ងៃទី១៣ ខែមិថុនា ឆ្នាំ២០២៤នេះ មន្ទីរពេទ្យកុមារអង្គរខេត្តសៀមរាប ទទួលអំណោយជាសម្ភារៈប្រើប្រាស់លើតម្រូវការបរិក្ខាពេទ្យ សម្រាប់ការប្រើប្រាស់ចាំបាច់ក្នុងការពិនិត្យព្យាបាលនិងសង្គ្រោះអ្នកជំងឺ សរុបជាថវិកា ៨០លានរៀល ពីធនាគារហត្ថា។
លោកវេជ្ជបណ្ឌិត ងួន ចាន់ភក្រ្តា នាយកមន្ទីរពេទ្យកុមារអង្គរ មានប្រសាសន៍ថា មន្ទីរពេទ្យនេះបានផ្តល់សេវាថែទាំឯកទេសដល់កុមារដែលមានស្ថានភាព ជម្ងឺរ៉ាំរ៉ៃ កម្រ និងមានសភាពស្រួចស្រាវធ្ងន់ធ្ងរ នៅទូទាំងប្រទេសកម្ពុជា។ ដូច្នេះ ការចូលរួមប្រាក់ឧបត្ថម្ភរបស់សប្បរសជននឹងជួយគាំទ្រដល់បេសកកម្មរបស់មន្ទីរពេទ្យក្នុងការធ្វើឲ្យប្រសើរឡើងនូវការថែទាំសុខភាពសម្រាប់កុមារកម្ពុជាគ្រប់រូប។
តំណាងឲ្យថ្នាក់ដឹកនាំ គ្រូពេទ្យ និងបុគ្គលិកទាំងអស់នៃមន្ទីរពេទ្យកុមារអង្គរ លោកបានថ្លែងអំណរគុណ និងមានមោទនភាពបំផុត ដែលបានទទួលការឧបត្ថម្ភគាំទ្រពីធនាគារ ហត្ថា ក្នុងការជួយលើកស្ទួយដល់វិស័យសុខាភិបាល ដើម្បីឲ្យសុខុមាលភាពកុមារកម្ពុជាឲ្យកាន់តែប្រសើរឡើង ព្រោះពួកគេគឺជាអនាគតដ៏រឹងមាំនៃប្រទេសកម្ពុជាយើង។
លោក វី មន្តសេង (Wee Mun Seng) អនុប្រធានអគ្គនាយក នៃធនាគារ ហត្ថា មានប្រសាសន៍ថា ការចូលរួមប្រាក់ឧបត្ថម្ភនេះ សបញ្ជាក់អំពីការប្តេជ្ញាចិត្តរបស់យើងក្នុងការជួយគាំទ្រដល់សុខុមាលភាពសហគមន៍ដែលយើងកំពុងផ្តល់សេវាកម្មជូនកុមារកម្ពុជាដោយមិនរើសអើង ពណ៌សម្បុរ និន្នាការអ្វីឡើយ ហើយនេះក៏ បង្ហាញពីការប្តេជ្ញាចិត្តជាបន្តបន្ទាប់របស់ធនាគារ ហត្ថាចំពោះសកម្មភាពទំនួលខុសត្រូវលើការងារសង្គម (CSR)ផងដែរ។ ការឧបត្ថម្ភដល់មន្ទីរពេទ្យកុមារអង្គរ គឺបង្ហាញយ៉ាងច្បាស់ក្នុងការចូលរួមចំណែកជួយដល់សង្គម ហើយ ស្របទៅតាមគុណតម្លៃស្នូល និងសសរស្តម្ភមួយនៃកិច្ចការងារសង្គម ការជួយឧបត្ថម្ភផ្នែកហិរញ្ញវត្ថុ ដើម្បីលើកស្ទួយសុខុមាលភាពសង្គមកម្ពុជាឲ្យកាន់ល្អតែប្រសើរ។
លោកក៏បានបង្ហាញនូវក្ដីរីករាយ ក្នុងការចូលរួមបំពេញបេសកកម្មផ្តល់សេវាថែទាំសុខភាពដ៏មានសារៈសំខាន់ដល់កុមារនៅក្នុងប្រទេសកម្ពុជា ហើយលោកជឿជាក់លើកម្លាំងរួបរួមក្នុងការផ្តល់ផលជាវិជ្ជមានទៅឲ្យសង្គមទាំងមូល។ ជាមួយនេះធនាគារហត្ថា នឹងបន្តជួយដល់កុមារកម្ពុជា ក្នុងការចូលរួមកសាងអនាគតកុមារកម្ពុជា ដែលជាធនធានមនុស្សក្នុងកិច្ចអភិវឌ្ឍន៍ប្រទេសកម្ពុជាទៅអនាគត៕
អត្ថបទ និងរូបភាព: លោក យូ វង្ស មុី សុខារិទ្ធ
កែសម្រួល: លោក អ៊ុន ណារាជ្យ
