នារសៀលថ្ងៃទី១៤ ខែមិថុនា ឆ្នាំ២០២៤នេះ នៅសាលាស្រុកអង្គរជុំ បានរៀបចំពិធីប្រកាសចូលកាន់ដំណែងក្រុមប្រឹក្សាស្រុកអង្គរជុំ អាណត្តិទី៤ ចំនួន១៩រូប។ ក្រោមអធិបតីភាព លោក សំកុល សុចិត្រា អភិបាលរងខេត្ត តំណាង ឯកឧត្តម ប្រាក់ សោភ័ណ អភិបាលនៃគណៈអភបាលខេត្តសៀមរាប និងមានការអញ្ជើញចូលរួមពីថ្នាក់ដឹកនាំ តំណាង មន្ទីរ អង្គភាពជុំវិញខេត្ត និងមន្ត្រីរដ្ឋបាលស្រុកផងដែរ។
ថ្លែងនៅក្នុងពិធីនោះ លោក សំកុល សុចិត្រា អភិបាលរងខេត្តសៀមរាប បានមានប្រសាសន៍ថា បើទោះបីជាសមាសភាពសមាជិកក្រុមប្រឹក្សាមកពីគណបក្សផ្សេងគ្នាក្ដី ប៉ុន្តែយើងត្រូវឈរលើមូលដ្ឋាននៃការលើកកម្ពស់ប្រសិទ្ធភាពការងារ ការគោរពច្បាប់ គោរពគោលការណ៍ នានារបស់រដ្ឋ និងពង្រឹងរបៀបរបបធ្វើការ ដើម្បីលើកកម្ពស់ការទទួលខុសត្រូវ និងភាពជាម្ចាស់របស់មន្ត្រី នៅក្នុងការបំពេញតួនាទី ភារកិច្ចរបស់ខ្លួន សំដៅអភិវឌ្ឍមូលដ្ឋាន និងឆ្លើយតបចំពោះតម្រូវការរបស់ប្រជាពលរដ្ឋក្នុងដែនសមត្ថកិច្ចរបស់ខ្លួន មិនតែប៉ុណ្ណោះយើងត្រូវរួបរួមគ្នាដើម្បីសម្រេចបាននូវកិច្ចការ ចាំបាច់ត្រូវខិតខំពង្រឹងស្មារតីសាមគ្គីភាព ឯកភាពផ្ទៃក្នុងឱ្យបានល្អនៅក្នុងក្រុមប្រឹក្សា គណៈអភិបាល មន្ត្រីរាជការ និងកងកម្លាំងមានសមត្ថកិច្ចគ្រប់លំដាប់។
លោកអភិបាលរងខេត្តបានអបអរសាទរកោតសរសើរ និងវាយតម្លៃខ្ពស់ចំពោះសមាជិក សមាជិកា ក្រុមប្រឹក្សាស្រុក ដែលត្រូវបានតំណាងប្រជាពលរដ្ឋ គឺសមាជិកក្រុម ប្រឹក្សាឃុំ បានបោះឆ្នោតផ្តល់ សេចក្តីទុកចិត្ត ដើម្បីបន្តដឹកនាំនិងបន្តការអភិវឌ្ឍន៍ក្នុងស្រុកឲ្យកាន់តែរីកចម្រើនលើគ្រប់វិស័យថែមទៀត។
គួរឱ្យដឹងដែរថា សមាសភាពក្រុមប្រឹក្សាស្រុកអង្គរជុំ អាណត្តិទី៤ ដែលបានប្រកាសនាពេលនេះ មកពីគណបក្សចំនួន២ គឺគណបក្សប្រជាជនកម្ពុជា ចំនួន១៤រូប និង គណបក្សកម្លាំងជាតិ ចំនួន៥រូប។
អត្ថបទនិងរូបភាព៖លោក ហេង វ៉ាន់ន្នី
