នៅថ្ងៃទី១៧ ខែមិថុនា ឆ្នាំ២០២៤នេះ ឯកឧត្ដម លី សំរិទ្ធ ប្រធានក្រុមប្រឹក្សាខេត្ដសៀមរាប បានអញ្ជើញប្រកាសចូលកាន់មុខតំណែងប្រធាន និងសមាជិកក្រុមប្រឹក្សាស្រុកបន្ទាយស្រី សម្រាប់អាណត្ដិទី៤ ឆ្នាំ២០២៤ សរុប១៥រូប ដោយមានការអញ្ជើញចូលរួមពីឯកឧត្តមលោកជំទាវសមាជិកក្រុមប្រឹក្សាខេត្ត លោកអភិបាលរងខេត្ត រួមនឹងថ្នាក់ដឹកនាំ មន្ត្រីរាជការ អាជ្ញាធរមូលដ្ឋានជាច្រើនរូប។
លោក រិន ឡូត អភិបាលស្រុកបន្ទាយស្រី បានថ្លែងថា រាជរដ្ឋាភិបាលកម្ពុជា នីតិកាលទី៧ បានដាក់ចេញនូវគោលនយោបាយកំណែទម្រង់ស៊ីជម្រៅ ដើម្បីសម្រេចឲ្យបាននូវគោលដៅជាយុទ្ធសាស្ត្រ និងការអភិវឌ្ឍសេដ្ឋកិច្ចប្រកបដោយចក្ខុវិស័យ។ ក្នុងដំណើរឆ្ពោះទៅកាន់គោលដៅនេះ ក្រុមប្រឹក្សាស្រុក រួមនឹងគណៈអភិបាលស្រុក បានធ្វើការគ្រប់គ្រង ដឹកនាំ ចាត់ចែង និងសម្របសម្រួលយន្តការដែលមានលក្ខណៈជាពហុវិស័យ ឱ្យប្រព្រឹត្តិទៅយ៉ាងស៊ីសង្វាក់ប្រទាក់ក្រឡារហូតសម្រេចបាននូវសមិទ្ធផលជាច្រើន បានធ្វើឱ្យប្រជាពលរដ្ឋទទួលបាននូវអត្ថប្រយោជន៍ប្រកបដោយសមធម៌លើការអភិវឌ្ឍ និងកំណើនសេដ្ឋកិច្ចសង្គម មានជាអាទិ៍ សន្តិសុខសណ្តាប់ធ្នាប់ ការលើកកម្ពស់អនាម័យ បរិស្ថាន ការកែលម្អ សោភ័ណភាពស្រុក ហេដ្ឋារចនា សម្ព័ន្ធរូបវន្ត និងអរូបវន្ត កំណែទម្រង់ដីធ្លី និងកំណែទម្រង់សេវាសាធារណៈព្រមទាំងសមិទ្ធផល ផ្សេងៗទៀតជាច្រើន។
ឯកឧត្ដម លី សំរិទ្ធ ប្រធានក្រុមប្រឹក្សាខេត្ដសៀមរាប មានប្រសាសន៍ថា ការបោះឆ្នោតជ្រើសរើសក្រុមប្រឹក្សារាជធានីខេត្ត ក្រុងស្រុកខណ្ឌ អាណត្តិទី៤ កាលពីថ្ងៃទី២៦ ខែឧសភា ឆ្នាំ២០២៤ កន្លងមក ត្រូវបានវាយតម្លៃថាមានលក្ខណៈសេរី ត្រឹមត្រូវ យុត្តិធម៌ និងគ្មានអំពើហិង្សា ហើយលទ្ធផល នៃការបោះឆ្នោត ក៏ត្រូវបានទទួលស្គាល់ពីគណបក្សនយោបាយនានា ដែលបានចូលរួមក្នុងការបោះឆ្នោតនេះផងដែរ។ ផ្អែកតាមលទ្ធផលជាផ្លូវការ ដែលបានប្រកាសជាផ្លូវការដោយ គ.ជ.ប រដ្ឋបាលស្រុកបន្ទាយស្រី មានចំនួនក្រុមប្រឹក្សា ១៥នាក់ ដែលត្រូវប្រកាសឱ្យចូលកាន់តំណែង។
ព័ត៌មានជាតិ ថ្មីៗ
ឯកឧត្ដម លី សំរិទ្ធ បន្ដថា ការបោះឆ្នោតជ្រើសរើសក្រុមប្រឹក្សា នៃរដ្ឋបាលគ្រប់ថ្នាក់នៅថ្នាក់ក្រោមជាតិ គឺជាដំណើរការសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ដែលមានគោលបំណងរួមមាន៖ ១.ការពង្រឹងដំណើរការលទ្ធិប្រជា-ធិបតេយ្យ សេរីពហុបក្ស ឱ្យចាក់គ្រឹះរហូតដល់ថ្នាក់មូលដ្ឋាន, ២.ការផ្លាស់ប្តូររចនាសម្ព័ន្ធ និងប្រព័ន្ធគ្រប់គ្រងរដ្ឋបាលថ្នាក់ក្រោមជាតិតាមរយៈគោលនយោបាយវិមជ្ឈការ និងវិសហមជ្ឈការដោយបង្កើតឡើងនូវរដ្ឋបាលឯកភាព ដែលមានស្វ័យភាព សិទ្ធិអំណាច និងមុខងារ ធនធានសមស្រប ដែលបានផ្ទេរឱ្យទៅរដ្ឋបាលក្រោមជាតិក្នុងការផ្តល់សេវាសាធារណៈ និងសេវាសង្គមនានាតាមមូលដ្ឋានដើម្បីឆ្លើយតបទៅតាមតម្រូវការរបស់ប្រជាពលរដ្ឋ និង៣.លើកកម្ពស់ការចូលរួម និងភាពជាម្ចាស់របស់ប្រជាពលរដ្ឋក្នុងការអភិវឌ្ឍមូលដ្ឋាន សំដៅកាត់បន្ថយភាពក្រីក្រ និងលើកកម្ពស់គុណភាព នៃជីវិតរបស់ប្រជាពលរដ្ឋនៅក្នុងមូលដ្ឋាន។ រហូតមកដល់ពេលនេះ រចនាសម្ព័ន្ធ និងប្រព័ន្ធគ្រប់គ្រងអភិបាលកិច្ចតាមបែបប្រជាធិបតេយ្យនៅរដ្ឋបាលថ្នាក់ក្រោមជាតិ ដូចជា ការបង្កើតក្រុមប្រឹក្សាតាមរយៈការបោះឆ្នោត ប្រព័ន្ធកសាងផែនការ ប្រព័ន្ធគ្រប់គ្រងបុគ្គលិក ប្រព័ន្ធហិរញ្ញវត្ថុ នីតិវិធីអនុវត្តការងារ និងនីតិវិធីផ្តល់សេវា និងយន្តការគណនេយ្យភាព ត្រូវបានរៀបចំ និងដាក់ឱ្យដំណើរការដោយមានការពិនិត្យ វាយតម្លៃ និងកែលម្អជាបណ្តើរៗ។
ឯកឧត្ដម ក៏បានកោតសរសើរ និងវាយតម្លៃខ្ពស់ ចំពោះលោកលោកស្រីសមាជិកក្រុមប្រឹក្សាស្រុកបន្ទាយស្រី ដែលត្រូវបានតំណាងប្រជាពលរដ្ឋ គឺសមាជិកក្រុមប្រឹក្សាឃុំ សង្កាត់ ផ្តល់សេចក្តីទុកចិត្តបោះឆ្នោតជ្រើសរើសជាសមាជិកក្រុមប្រឹក្សាស្រុក-បន្ទាយស្រី អាណត្តិទី៤ ដើម្បីបន្តដឹកនាំស្រុកបន្ទាយស្រី សំដៅចូលរួមថែរក្សាសុខសន្តិភាព ស្ថេរភាព និងបន្តអភិវឌ្ឍឱ្យមានការរីកចម្រើនលើគ្រប់វិស័យបន្ថែមទៀត។ ក្នុងនាមជាសមាជិក សមាជិកា ក្រុមប្រឹក្សាដែលជាប់ឆ្នោត ទោះបីជា លោក លោកស្រី មានសមាសភាពមកពីគណបក្សនយោបាយផ្សេងៗគ្នាក៏ពិតមែន ក៏ប៉ុន្តែតាមគោលការណ៍ច្បាប់រៀបចំអង្គការបានកំណត់ថា ក្រុមប្រឹក្សា គឺជាតំណាងឱ្យប្រជាពលរដ្ឋក្នុងមូលដ្ឋានរបស់ខ្លួនទាំងមូល។ ហេតុនេះ ក្នុងការអនុវត្តការងារ លោកលោកស្រីជាសមាជិកក្រុមប្រឹក្សា ត្រូវខិតខំបម្រើផលប្រយោជន៍ និងសេចក្តីត្រូវការរបស់ប្រជាពលរដ្ឋទាំងអស់ដោយស្មើភាព តម្លាភាព គណនេយ្យភាព សមធម៌ និងបរិយាបន្ន ជាពិសេសមិនត្រូវប្រកាន់និន្នាការនយោបាយណាមួយនោះឡើយ៕
អត្ថបទ និងរូបភាព៖ បូ សាវី , ធន់ ពូថេ
កែសម្រួល៖ លោក អ៊ុន ណារាជ្យ
