កាលពីថ្ងៃទី១៧ ខែមិថុនា ឆ្នាំ២០២៤ម្សិលមិញនេះ មន្ត្រីក្រសួងកសិកម្ម រុក្ខាប្រម៉ាញ់ និងនេសាទ សហការជាមួយមន្ត្រីជំនាញខេត្តសៀមរាប បានចុះពិនិត្យ និងបាញ់ថ្នាំសម្លាប់ដង្កូវហ្វូង ដែលបំផ្លាញស្រូវវស្សាប្រជាពលរដ្ឋប្រមាណ ៥០ហិកតា ខណៈដែលស្រូវវស្សានោះទើបលូតលាស់បាន ៣អាទិត្យ ស្ថិតក្នុងសហគមន៍កសិកម្មទំនើបស្រូវនាងអំ នៃឃុំកន្ទួត ស្រុកស្វាយលើ ខេត្ដសៀមរាប។
លោក គង់ គា ប្រធាននាយកដ្ឋានដំណាំស្រូវ នៃអគ្គនាយកដ្ឋាន ក្រសួងកសិកម្ម បានមានបញ្ជាក់ថា ក្រុមអ្នកជំនាញមានក្រុមហ៊ុនថ្នាំពុល មន្ទីរកសិកម្ម និងក្រសួងកសិកម្ម បានពិនិត្យឃើញថា ស្រូវវស្សាប្រមាណ ៥០ហិកតា ក្នុងចំណោមជាង ៣រយហិកតា បានរងផលប៉ះពាល់ដោយសត្វដង្កូវហ្វូងស៊ី ហើយត្រូវបានអ្នកជំនាញចាត់វិធានការបាញ់ថ្នាំសម្លាប់សត្វដង្កូវនោះទាន់ពេលវេលា។ ការអន្ដរាគមន៍កំចាត់ដង្កូវស៊ីស្រូវនេះ ក្រុមហ៊ុនឯកជនក៏បានជួយផ្ដល់ថ្នាំបាញ់ថ្នាំសាកល្បង ហើយក្រោយពីបានបាញ់ថ្នាំហើយ ឃើញថាមានប្រសិទ្ធិភាពដោយសត្វដង្កូវបានងាប់ភ្លាមៗ។
លោកបន្ដថា សត្វដង្កូវហ្វូងនេះ ក្នុងដំណាក់កាលនៅតូចនៅឡើយ ប៉ុន្ដែវាធំលឿនវានឹងបំផ្លាញស្រូវលឿន បើសិនមិនបានពិនិត្យមើលឪ្យបានត្រឹមត្រូវ និងចាត់វិធានការទាន់ពេលវេលាទេ វាអាចប៉ះពាល់ធ្ងន់ធ្ងរដល់ទិន្នផលស្រូវ និងរាលដាលទៅស៊ីស្រូវកន្លែងផ្សេងៗទៀត។ សត្វដង្កូវរយនេះ គឺកើតឡើងមកពីសត្វមេអំបៅ ដែលហើរចល័តចេញពីប្រទេសថៃ រកកន្លែងពងញាស់ក្នុងប្រទេសកម្ពុជា ដែលធ្វើឱ្យប៉ះពាល់ដល់ខេត្ដព្រះវិហារ ឧត្ដរមានជ័យ និងខេត្ដសៀមរាប។
លោកក៏បានអំពាវនាវដល់ប្រជាកសិករ ត្រូវចុះតាមដានពិនិត្យមើលស្រូវរបស់ខ្លួនឱ្យជាប់ជានិច្ច ដើម្បីការពារស្រូវពីសត្វដង្កូវ ជាពិសេសពិនិត្យមើលពេលព្រឹកព្រលឹម និងពេលល្ងាច។ ជាមួយគ្នានេះការបាញ់ថ្នាំសម្លាប់ដង្កូវ ត្រូវមានការប្រយ័ន្នខ្ពស់កុំឱ្យប៉ះពាល់ដល់សុខភាព ព្រោះនៅតំបន់ឃុំកន្ទួតស្រុកស្វាយលើ ជាលើកទីមួយហើយ ដែលមានវត្ដមានដង្កូវហ្វូងស៊ីស្រូវប្រជាពលរដ្ឋ។
តំណាសហគមន៍ កសិករទំនើបស្រូវនាងអំ ស្ថិតនៅឃុំកន្ទួត ស្រុកស្វាយលើ លោក ឈឺន ចាន់បរមី បានថ្លែងអំណរគុណដល់ក្រសួង និងមន្ទីរកសិកម្មរុក្ខាប្រម៉ាញ់ និងនេសាទ ព្រមទាំងអ្នកជំនាញក្រុមហ៊ុនឯកជន ដលបានផ្ដល់ថ្នាំពុល និងបច្ចេកទសបាញ់សម្លាប់សត្វដង្កូវហ្វូងទាន់ពេលវេលា។ លោកថា ការផ្ទុះដង្កូវហ្វូងនេះ បានកើតឡើងរយៈពេលពីរថ្ងៃមកហើយ ប៉ះពាល់ស្រូវប្រមាណ៥០ហិក ខណៈដែលស្រូវនាងអំនេះ ទើបតែមានអាយុ៣សប្ដាហ៍។ លោកថា តាមផែនការសហគមន៍កសិករទំនើបស្រូវនាងអំ ដាំដុះស្រូវឱ្យគ្រប់ចំនួនជាង៨០០ហិកតា ប៉ុន្ដែទើបដាំបានប្រមាណជាង៣០០ហិកតា ក្នុងចំណោមជាង៨រយហិកតានោះ។ ដូចនេះសុំស្នើឱ្យក្រសួងនិងមន្ទីរបន្ដជួយផ្ដល់បច្ចេសដាំដុះ ក៍ដូចថ្នាំសម្លាប់សត្វល្អិតបន្ថែមទៀត៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
