នាព្រឹកថ្ងៃទី១៩ ខែមិថុនា ឆ្នាំ២០២៤ រដ្ឋបាលខេត្តសៀមរាប បានបើកវគ្គបណ្តុះបណ្តាលស្តីពីការត្រៀមបម្រុងឆ្លើយតប និងការឆ្លើយតបគ្រោះមហន្តរាយ នៃគម្រោងការត្រៀមបង្កាស្ថានភាពបន្ទាន់ខេត្តសៀមរាប ក្រោមកិច្ចសហការពីសមាគមអន្តរជាតិ អភិបាលក្រុងប្រើប្រាស់ភាសាបារាំង (AIMF) ជូនដល់អ្នកពាក់ព័ន្ធក្នុងសង្កាត់ទាំង១២ នៃក្រុងសៀមរាប ដឹកនាំដោយលោក ចឹក គឹមជុន នាយករងរដ្ឋបាលសាលាខេត្តសៀមរាប។
លោក ចឹក គឹមជុន បានបញ្ជាក់ថា វគ្គបណ្តុះបណ្តាលនាពេលនេះ គឺដើមី្បធ្វើការអភិវឌ្ឍសមត្ថភាពបន្ថែមជូនដល់អាជ្ញាធរ មន្ត្រី និងអ្នកពាក់ព័ន្ធ អំពីការងារត្រៀមបម្រុងឆ្លើយតប និងការឆ្លើយតបគ្រោះមហន្តរាយ និងរៀបចំផែនការហានីភ័យត្រៀមបង្កា ដើមី្បឆ្លើយតបទៅនឹងស្ថានភាពកើតឡើងបន្ទាន់នៅតាមបណ្តាសង្កាត់ទាំង១២ នៃក្រុងសៀមរាប។
លោក ចឹក គឹមជុន បញ្ជាក់ទៀតថា ដើមី្បឲ្យការងារនេះទទួលបាននូវប្រសិទ្ធិភាព ចាប់បាច់ត្រូវមានគ្រប់សមាសភាពពាក់ព័ន្ធ ចូលរួមក្នុងវគ្គបណ្តុះបណ្តាលនេះ ដោយមានការអញ្ជើញគ្រូឧទ្ទេសនៃអគ្គលេខាធិការដ្ឋាន គណៈកម្មាធិការជាតិគ្រប់គ្រងគ្រោះមហន្តរាយ ធ្វើការបណ្តុះបណ្តាលដល់លោកលោកស្រី ដោយមានរយៈពេលពីរថ្ងៃ ផ្តោតការយកចិត្តទុកដាក់ខ្ពស់ចំពោះសង្កាត់ទាំង១២ នៃក្រុងសៀមរាប ដើមី្បឲ្យចេះចងក្រងសៀវភៅ ដោយក្រុមលេខាធិការដ្ឋាន គម្រោងថ្នាក់ខេត្តជាអ្នកជួយមើល ជួយបន្ថែម និងតម្រង់ទិស។
លោកក៏បានណែនាំដល់សង្កាត់ទាំង១២ នៃក្រុងសៀមរាប ត្រូវត្រៀមសៀវភៅសរសេរ ត្រៀមបង្កា ឆ្លើយតបថ្នាក់ក្រុងសៀមរាប និងការធ្វើបច្ចុប្បន្នភាពទៅថ្នាក់ខេត្តសម្រាប់ឆ្នាំ២០២៥ ដើម្បីសម្រាប់ការអនុវត្តនៅឆ្នាំ២០២៥ ហើយធ្វើនៅក្នុងសង្កាត់ទាំង១២ ត្រៀមបង្កាទប់ស្កាត់នៃគ្រោះមហន្តរាយឆ្នាំ២០២៥។ ក្រៅពីសង្កាត់ទាំង១២ ក្នុងក្រុងសៀមរាប នៅពេលទទួលបានគម្រោងនោះ លេខាធិការដ្ឋានថ្នាក់ខេត្តនឹងបន្តទៅតាមបណ្តាក្រុងស្រុកទាំង១២ បន្តទៀត លើការរៀបចំសៀវភៅ ចងក្រងឯកសារទៅតាមបណ្តាក្រុងស្រុកនីមួយៗ លើការត្រៀមបង្កា ឆ្លើយតបនៅថ្នាក់ក្រុងស្រុកទៀតផង៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
