នៅថ្ងៃទី១៩ ខែមិថុនា ឆ្នាំ២០២៤នេះ ក្រសួងមុខងារសាធារណៈ បានបើកវគ្គបណ្ដុះបណ្ដាលស្ដីពីការប្រើប្រាស់ប្រព័ន្ធគ្រប់គ្រងទិន្នន័យអង្គភាពថ្នាក់ក្រោមជាតិ ដើម្បីធ្វើបច្ចុប្បន្នភាពរចនាសម្ព័ន្ធ និងទិន្នន័យមន្ត្រីក្នុងវិស័យសុខាភិបាល នៅតាមប៉ុស្តិ៍សុខភាព មណ្ឌលសុខភាព និងមន្ទីរពេទ្យបង្អែកផ្តល់សេវា សំណុំសកម្មភាពបង្គ្រប់កម្រិត១ និងកម្រិត២ នៅក្នុងខេត្តសៀមរាប ក្រោមវត្តមានឯកឧត្តម ឡុង សារឿន អគ្គនាយក នៃអគ្គនាយកដ្ឋានប្រព័ន្ធគ្រប់គ្រងមន្ត្រីតាមឌីជីថល នៃក្រសួងមុខងារសាធារណៈ ដោយមានការចូលរួមពីលោក លី សារី អភិបាលរងខេត្តសៀមរាប រួមនឹងថ្នាក់ដឹកនាំ មន្ត្រីពាក់ព័ន្ធជាច្រើនរូប។
ឯកឧត្តម ឡុង សារឿន អគ្គនាយក នៃអគ្គនាយកដ្ឋានប្រព័ន្ធគ្រប់គ្រងមន្ត្រីតាមឌីជីថល បញ្ជាក់ថា រាជរដ្ឋាភិបាលនីតិកាលទី៧ នៃរដ្ឋសភា បានបន្តផ្តោតលើកិច្ចការអាទិភាពចំនួន៥ គឺការពង្រឹង និងការកែទម្រង់ស្ថាប័ន, ការលើកម្ពស់សមត្ថភាពធនធានមនុស្ស និងការពង្រឹងប្រសិទ្ធភាពនៃការអនុវត្តការងារ, ការលើកម្ពស់ និងការពង្រឹងភាពស្អាតស្អំ នៅក្នុងរដ្ឋបាលសាធារណៈ, ការលើកកម្ពស់ និងការពង្រឹងប្រសិទ្ធភាពនៃច្បាប់ និងប្រព័ន្ធយុត្តិធម៌ និងការពង្រឹងអភិបាលកិច្ចវិស័យឯកជន និងធុរកិច្ចដែលមានគោលដៅយុទ្ធសាស្ត្រ។ ក្នុងយុទ្ធសាស្ត្រថ្មីនេះ ក្រសួងមុខងារក៏មានបេសកកម្មចម្បង ៣ចំណុចផងដែរ រួមមាន៖ ការអនុវត្តចក្ខុវិស័យរបស់សម្តេចធិបតី ហ៊ុន ម៉ាណែត នាយករដ្ឋមន្ត្រី ក្នុងការជំរុញការកែទម្រង់ និងពង្រឹងរដ្ឋបាលសាធារណៈប្រកបដោយប្រសិទ្ធភាព និងប្រសិទ្ធផលក្នុងអាណត្តិទី៧ និងចូលរួមចំណែកក្នុងការលើកស្ទួយ និងការធ្វើទំនើបកម្មស្ថាប័នសាធារណៈ។
ឯកឧត្តមអគ្គនាយក បានឲ្យដឹងថា ក្រសួងមុខងារសាធារណៈបានកំណត់បេសកកម្មចម្បងក្នុងការដឹកនាំក្រសួងមុខងារសាធារណៈចំនួន៣ រួមមាន៖ ការកែលម្អប្រព័ន្ធជ្រើសរើសមន្ត្រីចូលបម្រើការងារក្នុងរដ្ឋបាលសាធារណៈ ដោយត្រូវផ្អែកលើគុណធិបតេយ្យ តម្លាភាព យុត្តិធម៌ បរិយាប័ន្ន និងប្រសិទ្ធភាព។ ការពង្រឹងសមត្ថភាព និងសមិទ្ធកម្មស្ថាប័ន ដើម្បីលើកកម្ពស់គុណភាពការងារប្រកបដោយវិន័យ សីលធម៌វិជ្ជាជីវៈ ប្រសិទ្ធភាព និងស័ក្តិសិទ្ធិភាព និងការដាក់ឱ្យអនុវត្តប្រព័ន្ធលើកទឹកចិត្តគាំទ្រសមិទ្ធកម្មប្រកបដោយ សង្គតិភាព សមធម៌ ប្រសិទ្ធភាព និងចីរភាព។ ដើម្បីសម្រេចបានតាមគោលទាំងនោះ គឺការកែទម្រង់គុណភាពវិស័យអប់រំ និងការកែទម្រង់គុណភាពវិស័យសុខាភិបាល ការកសាងប្រព័ន្ធគ្រប់គ្រងទិន្នន័យអង្គភាពថ្នាក់ក្រោមជាតិ ដែលជាជម្រើសដ៏ល្អ និងត្រឹមត្រូវបំផុត។
ព័ត៌មានជាតិ ថ្មីៗ
ឯកឧត្ដមបានឲ្យដឹងទៀតថា ប្រព័ន្ធគ្រប់គ្រងទិន្នន័យអង្គភាពថ្នាក់ក្រោមជាតិ គឺជាប្រព័ន្ធព័ត៌មានវិទ្យា ជួយគាំទ្រដល់ការធ្វើបច្ចុប្បន្នភាពរចនាសម្ព័ន្ធ និងទិន្នន័យមន្ត្រីក្នុងវិស័យអប់រំ នៅតាមគ្រឹះស្ថានអប់រំមូលដ្ឋានរួមមាន៖ គ្រឹះស្ថានបឋមសិក្សាសាធារណៈ គ្រឹះស្ថានមត្តេយ្យសិក្សាសាធារណៈ មជ្ឈមណ្ឌលសិក្សាសហគមន៍ និងក្នុងវិស័យសុខាភិបាលដូចជា ប៉ុស្តិ៍សុខភាព មណ្ឌលសុខភាព និងមន្ទីរពេទ្យបង្អែកផ្តល់សេវាសំណុំសកម្មភាពបង្គ្រប់កម្រិត១ និងកម្រិត២។ នៅពេលប្រធាន និងអនុប្រធាន អង្គភាពនីមួយៗបានបំពេញទិន្នន័យអំពីរចនាសម្ព័ន្ធ និងទិន្នន័យមន្ត្រីដែលកំពុងបម្រើការងារជាក់ស្តែងក្នុងប្រព័ន្ធរួចរាល់ គណៈកម្មការរៀបចំធ្វើបច្ចុប្បន្នភាពរចនាសម្ព័ន្ធន្ធ និងទិន្នន័យមន្ត្រីក្នុងវិស័យអប់រំ និងវិស័យសុខាភិបាលធ្វើការសិក្សា ដើម្បីរៀបចំនិងអនុវត្តផែនការនៃការប្រើប្រាស់មន្ត្រី បែបបទ នីតិវិធី និងដំណើរការជ្រើសរើស មានសង្គតិភាព ផ្អែកលើគុណាធិបតេយ្យ តម្លាភាព យុត្តិធម៌ បរិយាប័ន្ន និងប្រសិទ្ធភាពកាន់តែប្រសើរ ធានាដល់ការបង្កើតឱ្យមាននិយាមរួមនៃមន្ត្រីក្នុងរដ្ឋបាលសាធារណៈ ជំរុញការដោះស្រាយបញ្ហាប្រឈមនៃការលើស ប៉ុន្តែខ្វះមន្ត្រី ការពង្រាយមន្ត្រី និងការជ្រើសរើសឆ្លើយតបនឹងអាទិភាពនៃការងារ ការបង្កើនប្រសិទ្ធភាពចំណាយបន្ទុកបុគ្គលិក៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
