នៅព្រឹកថ្ងៃទី១៩ ខែមិថុនា ឆ្នាំ២០២៤នេះ មន្ទីរសុខាភិបាលនៃរដ្ឋបាលខេត្តសៀមរាប បានបើកកិច្ចប្រជុំក្រុមការងារពិសេសលុបបំបាត់ជំងឺគ្រុនចាញ់ថ្នាក់ខេត្ត ប្រចាំត្រីមាសទី២ ឆ្នាំ២០២៤ ដើម្បីពង្រឹងតួនាទីក្រុមការងារពាក់ព័ន្ធ ធ្វើបច្ចុប្បន្នភាពពីជំងឺគ្រុនចាញ់ លទ្ធផលការងារ និងពិភាក្សាលើបញ្ហាប្រឈមរកដំណោះស្រាយ ដើម្បីផ្ដល់អនុសាសន៍ និងលើកទិសដៅអនុវត្ដបន្ដ ក្នុងគោលបំណងសម្រេចគោលដៅលុបបំបាត់ជំងឺគ្រុនចាញ់ ដឹកនាំដោយលោក ពិន ប្រាកដ អភិបាលរងខេត្តសៀមរាប ដោយមានការចូលរួមពីថ្នាក់ដឹកនាំ មន្ត្រីជំនាញ អាជ្ញាធរមូលដ្ឋាន និងអ្នកពាក់ព័ន្ធជាច្រើនរូប។
យោងតាមរបាករណ៍របស់ក្រុមការងារពិសេសលុបបំបាត់ជំងឺគ្រុនចាញ់ថ្នាក់ខេត្ត បានឲ្យដឹងថា ការធ្វើតេស្តស្រាវជ្រាវនៅគ្រឹះស្ថានសុខាភិបាល (អង្គរជុំ) និងនៅកម្រិតអ្នកស្ម័គ្រចិត្ត (ក្រឡាញ់) បានធ្លាក់ចុះបន្តិច បើធៀបនឹងឆ្នាំមុន ហើយអាជ្ញាធរបន្តចូលរួមលើកទឹកចិត្ត ឱ្យប្រជាពលរដ្ឋមករកសេវាធ្វើតេស្តប្រសិនបើ សង្ស័យ ពិសេសប្រជាពលរដ្ឋចល័ត មកពីតាមតំបន់ប្រឈមនានា ដូចជាតាមព្រំដែន ឬតំបន់ព្រៃភ្នំ។ ជាមួយនោះក្រុមការងារនិងគ្រោងចែកមុងជ្រលក់ថ្នាំដល់ប្រជាជនគោលដៅ មានមណ្ឌលសុខភាពខ្នងភ្នំ មណ្ឌលកន្ទួត មណ្ឌលតាយ៉ែក មណ្ឌលពង្រក្រោម ដែលមានចំនួន១០.២២២មុង គ្រែ៧.៧៨៩ មុងអង្រឹង ២.៤៣៣នាពេលបន្តបន្ទាប់។
លោក ពិន ប្រាកដ បានសម្ដែងនូវការកោតសរសើរដល់អ្នកពាក់ព័ន្ធក្នុងការចូលរួមធ្វើសកម្មភាពលុបបំបាត់នូវជំងឺគ្រុនចាញ់ ដោយការលុបបំបាត់ជំងឺគ្រុនចាញ់មិនសំដៅលើការកាប់បំផ្លាញព្រៃឈើ ដើម្បីអស់ជម្រកមូសនោះទេ គឺធ្វើយ៉ាងណារួមគ្នារកវិធីសាស្ដ្រផ្សេងៗដើម្បីលុបបំបាត់នូវជំងឺមួយនេះ។ ដូចនេះត្រូវបន្តការតេស្តស្រាវជ្រាវរកមេរោគគ្រុនចាញ់ និងគ្រោងចែកមុងជ្រលក់ថ្នាំដល់ប្រជាជនគោលដៅ បន្តធានាឱ្យមានតេស្ត និងថ្នាំគ្រប់គ្រាន់នៅតាមតំបន់គោលដៅឲ្យបានជាប់ជាប្រចាំ ខណៈរដូវវស្សាបានមកដល់ ជាឱកាសដែលសហគមន៍អាចឆ្លងជំងឺតាមរយៈសត្វមូស ដូចនេះសមាជិកក្រុមការងារទាំងអស់ ត្រូវបន្តជួយផ្សព្វផ្សាយ អំពីវិធីបង្ការជំងឺដែលឆ្លង ដោយសារសត្វមូសឱ្យបានទូលំទូលាយ។
លោកអភិបាលរងខេត្ត ក៏បានផ្ដាំផ្ញើដល់ក្រុមការងារទាំងអស់ ត្រូវជួយណែនាំដល់ប្រជាជនឱ្យស្គាល់ និងមកធ្វើតេស្តឈាមនៅផ្ទះអ្នកស្ម័គ្រចិត្យព្យាបាលជំងឺគ្រុនចាញ់ដែលមានស្លាកសញ្ញាពណ៌លឿង និងមានសរសេរនៅទីនេះមានធ្វើតេស្តឈាម និងព្យាបាលជម្ងឺគ្រុនចាញ់ ដោយឥតគិតថ្លៃនៅទូទាំងប្រទេស។ ស្នើសុំសមាជិក ក្រុមការងារពិសេសលុបបំបាត់ជំងឺគ្រុនចាញ់ទាំងអស់ ជួយផ្សព្វផ្សាយពីវិធានការ ការពារជំងឺគ្រុនចាញ់ដល់ប្រជាជននៅតាមភូមិ និងជួយជំរុញប្រជាជន ឱ្យមកធ្វើតេស្តឈាមបន្ទាប់ពីត្រឡប់មកពីព្រៃឬចំការវិញ និងពេលមានគ្រុនក្តៅ៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
