នាព្រឹកថ្ងៃទី២០ ខែ មិថុនា ឆ្នាំ២០២៤ លោកជំទាវបណ្ឌិត កុយ ពិសី រដ្ឋមន្ត្រីប្រតិភូអមនាយករដ្ឋមន្ត្រី បានអញ្ជើញសម្ពោធឆ្លងសមិទ្ធផលរួមមាន ក្លោងទ្វារវត្តនិងសមិទ្ធផលសំខាន់មួយចំនួនសម្រាប់បម្រើដល់វិស័យព្រះពុទ្ធសាសនា ក្នុងវត្តលោមព្រលឹង ដែលជាវត្តមួយដែលមានអាយុកាលជិត ២០០ឆ្នាំ ក្នុងឃុំដានរុនស្រុកសូទ្រនិគម ខេត្តសៀមរាប។
ព្រះគ្រូចរណធម្មោ វិន ថៃ ព្រះគ្រូចៅអធិការវត្ត មានសង្ឃដីកាឲ្យដឹងថា វត្តលោមព្រលឹង ត្រូវបានកសាងឡើងតាំងពីឆ្នាំ១៨២៥ ដែលមកដល់បច្ចុប្បន្នមានអាយុកាល១៩៩ឆ្នាំហើយ។ ចំពោះដែលបានសម្ពោធឆ្លងនាពេលនេះ មានក្លោងទ្វារវត្តចំនួន២ ការជួសជុលកែលំអរព្រះវិហារថ្មី ការជាវដីដើម្បីកសាងសាលាបឋមសិក្សា និងការចាក់ដីពង្រីកទីធ្លាដែលបានចំណាយថវិកាសរុប ១៣៦.៦១២ដុល្លារ ក្រោមការផ្តួចផ្តើម និងបរិច្ចាកថវិកាផ្ទាល់របស់លោកជំទាវ បណ្ឌិត កុយ ពិសី រួមនឹងពុទ្ធបរិស័ទជិតឆ្ងាយជាច្រើនរូបទៀត។
ព័ត៌មានជាតិ ថ្មីៗ
មានប្រសាសន៍ក្នុងឱកាសនោះ លោកជំទាវ បណ្ឌិត កុយ ពិសី បានលើកឡើងថា វិស័យពុទ្ធចក្រ និងអាណាចក្រ ត្រូវបានរាជរដ្ឋាភិបាលយកចិត្តទុកដាក់ខ្ពស់ និងជាកត្តារួមចំណែកក្នុងកិច្ចអភិវឌ្ឍន៍ប្រទេសជាតិ។ ជាក់ស្តែងការៀបចំកសាងវត្តអារាមនេះ គឺជាការយកចិត្តទុកដាក់របស់ថ្នាកដឹកនាំក្នុងការអភិវឌ្ឍន៍មូលដ្ឋាន និងបង្កលក្ខណៈងាយស្រួលជូនប្រជាពលរដ្ឋសម្រាប់ធ្វើបុណ្យទាន ហើយសមិទ្ធផលដែលរៀបចំពិធីសម្ពោធឆ្លងនាថ្ងៃនេះ មិនអាចកើតឡើងដោយឯកឯងបាននោះទេ បើមិនមានការចូលរួមចំណែកពីគ្រប់ភាគីពាក់ព័ន្ធ ជាពិសេសការខិតខំប្រឹងប្រែងរបស់រាជរដ្ឋាភិបាល ដែលបាននាំមកនូវសុខសន្តិភាព និងស្ថិរភាពនយោបាយជូនប្រទេសជាតិ។
លោកជំទាវបណ្ឌិត មានប្រសាសន៍ថា កត្តាសុខសន្តិភាព និងស្ថិរភាពនយោបាយនេះហើយ ដែលបានផ្តល់ឱកាសឱ្យយើង បានជួបជុំគ្នា និងមានឱកាសធ្វើបុណ្យរួមគ្នា ដូចជាការប្រមូលបច្ច័យពីគ្រប់ទិសទីសម្រាប់កសាងសមិទ្ធផលនានាឱ្យចេញជារូបរាងបាន។ លោកជំទាវ ក៏បានថ្លែងអំណរព្រះគុណចំពោះព្រះគ្រូចៅអធិការវត្ត ព្រះសង្ឃ គណៈកម្មការ អាចារ្យវត្ត សប្បុរជន រួមនិងពុទ្ធបរិស័ទទាំងអស់ ដែលបានខិតខំប្រឹងប្រែងចូលរួមចំណែកក្នុងការកសាងសមិទ្ធផលទាំងនេះឱ្យលេចចេញជារូបរាងឡើង សម្រាប់បម្រើឱ្យវិស័យព្រះពុទ្ធសាសនា និងទុកជាសក្ការៈសម្រាប់ពុទ្ធបរិស័ទគោរពបូជា។ ជាមួយនេះ លោកជំទាវក៏បានណែនាំដល់បងប្អូនប្រជាពលរដ្ឋទាំងអស់ និងអាជ្ញាធរគ្រប់ថ្នាក់ សូមធ្វើយ៉ាងណារក្សាឲ្យបាននូវសុខសន្តិភាព ហើយអាជ្ញាធរមូលដ្ឋានត្រូវខិតខំបន្តផ្តល់សេវាជូនប្រជាពលរដ្ឋឲ្យបានល្អប្រសើរប្រកបដោយប្រសិទ្ធភាពខ្ពស់។
សូមជម្រាបថា ក្នុងឱកាសនោះដែរ លោកជំទាវ បណ្ឌិត កុយ ពិសី ក៏បាននាំយកយកសម្ភារៈសិក្សាមួយចំនួនចែកជូនដល់ប្អូនៗសិស្សានុសិស្សនៅសាលាបឋមសិក្សាលោមព្រលឹង ព្រមទាំងបានចែកជូនក្រណាត់សដល់យាយជីតាជី និងប្រគេនថវិកាចំនួន ៣.000ដុល្លារ ដើម្បីទុកប្រើប្រាស់ប្រចាំថ្ងៃក្នុងវត្តផងដែរ៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
