អាជ្ញាធខេត្តសៀមរាប បានណែនាំដល់អាជ្ញាធរឃុំសង្កាត់ ត្រូវពង្រឹងការងារផ្តល់សេវានៃការចុះបញ្ជីអត្រានុកូលដ្ឋានជូនប្រជាពលរដ្ឋឱ្យបានលឿនទាន់ពេលវេលា និងត្រឹមត្រូវទៅតាមនីតិវិធី ព្រោះនេះជាការចាំបាច់ និងតម្រូវឱ្យមានការទទួលខុសត្រូវខ្ពស់ ជៀសវាងការមានកំហុសបច្ចេកទេស ឬការអាក់ខានណាមួយក្នុងការជូនផ្តល់ប្រជាពលរដ្ឋ ពីព្រោះថាសំបុត្រអត្រានុកូលដ្ឋានមានសារៈសំខាន់សម្រាប់យើងម្នាក់ៗ ពិសេសបងប្អូនប្រជាពលរដ្ឋគ្រប់រូប ដែលនេះគឺជាអត្តសញ្ញាណសម្គាល់ខ្លួនម្នាក់ៗ។
ថ្លែងក្នុងសិក្ខាសាលាផ្សព្វផ្សាយច្បាប់ ស្តីពីអត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្ម ជូនដល់មន្ទីរ អង្គភាពពាក់ព័ន្ធជុំវិញខេត្ត រដ្ឋបាលក្រុង ស្រុក និងរដ្ឋបាលឃុំសង្កាត់ នៅខេត្តសៀមរាប នាព្រឹកថ្ងៃទី២០ ខែមិថុនា ឆ្នាំ២០២៤ លោក សំកុល សុចិត្រា អភិបាលរងខេត្ត មានប្រសាសន៍ថា ការចុះសំបុត្រអត្រានុកូលដ្ឋាននេះធ្វើឱ្យបុគ្គលម្នាក់ៗទទួលបានសិទ្ធិសេដ្ឋកិច្ច សង្គម នយោបាយ និងករណីយកិច្ចនានា រួមមានសិទ្ធិក្នុងការបោះឆ្នោត និងឈរឈ្មោះបោះឆ្នោតសិទ្ធិទទួលបានការអប់រំ និង ការងារ សិទ្ធិទទួលបានយុត្តិធម៌ និងការជំនុំជម្រះក្ដីដោយយុត្តិធម៌ និងសិទ្ធិកាន់កាប់កម្មសិទ្ធិ។ ជាឧទាហរណ៍ ដើម្បីអាចធ្វើអត្តសញ្ញាណប័ណ្ណសញ្ជាតិខ្មែរ ឬលិខិតឆ្លងដែនបាន ទាល់តែមានសំបុត្រអត្រានុកូលដ្ឋាននេះ។
លោក សំកុល សុចិត្រា បញ្ជាក់ថា អត្រានុកូលដា្ឋនជាសេវាមូលដ្ឋានរបស់រដ្ឋដែលផ្ដល់ប្រយោជន៍ចំពោះប្រជាពលរដ្ឋផង និងចំពោះសង្គមជាតិផង ព្រោះអត្រានុកូលដ្ឋានជាកត្តាមួយចូលរួមចំណែកក្នុងការអភិវឌ្ឍវិស័យសេដ្ឋកិច្ច និងហិរញ្ញវត្ថុ ដើម្បីសង្គមមានភាពសុខសាន្ត និងសុវត្ថិភាពដ៏រឹងមាំ។ ដូចនេះសូមឲ្យអាជ្ញាធរពាក់ព័ន្ធក្នុងមូលដ្ឋាន ជំរុញផ្សព្វផ្សាយពត៌មានដល់ប្រជាពលរដ្ឋ ដែលមានទារកទើបកើត ឬប្រជាពលរដ្ឋដែលពុំទាន់មានសំបុត្រកំណើតឱ្យបានគ្រប់ៗគ្នានៅតាមឃុំសង្កាត់ដែលខ្លួនរស់នៅ។ ក្រោយពីចុះសំបុត្រកំណើតរួចត្រូវណែនាំប្រជាពលរដ្ឋទៅស្នើសុំចុះឈ្មោះក្នុងសៀវភៅស្នាក់នៅ និងសៀវភៅគ្រួសារ នៅប៉ុសិ៍្តនគរបាល។ ជួយគាំទ្រលើការងារចុះបញ្ជីអត្រានុកូលដ្ឋានគ្រប់ប្រភេទឱ្យកាន់តែល្អប្រសើរ។ ជំរុញ និងបង្កើនការផ្សព្វផ្សាយដល់ប្រជាពលរដ្ឋដែលទើបគ្រប់អាយុ ១៥ឆ្នាំ ប្រជាពលរដ្ឋដែលមានអត្តសញ្ញាណប័ណ្ណជិតហួសសុពលភាព និងប្រជាពលរដ្ឋពុំទាន់មានអត្តសញ្ញាណប័ណ្ណសញ្ជាតិខ្មែរ ឱ្យមកស្នើសុំចុះបញ្ជីអត្តសញ្ញាណប័ណ្ណសញ្ជាតិខ្មែរ នៅប៉ុសិ៍្តនគរបាលឃុំសង្កាត់ក្នុងដែនសមត្ថកិច្ចរបស់ខ្លួន។ ពង្រឹងការយកចិត្តទុកដាក់ចំពោះការទទួលពាក្យកែតម្រូវទិន្នន័យក្នុងបញ្ជីអត្រានុ-កូលដ្ឋានរបស់ប្រជាពលរដ្ឋតាមបណ្តាក្រុងស្រុក និងបញ្ជូនមករដ្ឋបាលខេត្តឱ្យបានទាន់ពេលវេលា។
លោកអភិបាលរងខេត្ត ក៏បានជំរុញដល់ស្នងការដ្ឋាននគរបាលខេត្តសៀមរាប បង្កើនការផ្តល់អត្តសញ្ញាណប័ណ្ណសញ្ជាតិខ្មែរជូនដល់ប្រជាពលរដ្ឋដែលទើបគ្រប់អាយុ ១៥ឆ្នាំ និងប្រជាពលរដ្ឋពុំទាន់មានអត្តសញ្ញាណប័ណ្ណសញ្ជាតិខ្មែរ ឱ្យបានតាមផែនការដែលបានគ្រោងទុក។ បណ្តុះបណ្តាលបំប៉នសមត្ថភាពដល់មន្ត្រីជំនាញ ដែលអនុវត្តការងារចុះបញ្ជីស្ថិតិប្រជាពលរដ្ឋ និងគ្រប់គ្រងការស្នាក់នៅឱ្យបានជាប្រចាំ ជាពិសេសមន្ត្រីដែលពុំធ្លាប់ទទួលបានការបណ្តុះបណ្តាល។ អធិការដ្ឋាននគរបាលក្រុង ស្រុក និងប៉ុសិ៍នគរបាលឃុំ សង្កាត់ ត្រូវអនុវត្តការចុះបញ្ជីស្ថិតិប្រជាពលរដ្ឋ និងគ្រប់គ្រងការស្នាក់នៅរួមទាំងការផ្លាស់ប្តូរទីលំនៅចេញ ចូល ឱ្យបានជាប់ក្នុងភូមិសាស្ត្ររបស់ខ្លួន។ពង្រឹងសមត្ថភាពបន្ថែមលើការងារអត្តសញ្ញាណប័ណ្ណ ដើម្បីផ្សព្វផ្សាយច្បាប់នេះ ដល់ប្រជាពលរដ្ឋទូទាំងខេត្ត។ ត្រូវអនុវត្តការចុះបញ្ជីអត្រានុកូលដ្ឋាន ការចុះបញ្ជីអត្តសញ្ញាណប័ណ្ណសញ្ជាតិខ្មែរការចុះបញ្ជីស្នាក់នៅ និងការចុះបញ្ជីអត្តសញ្ញាណកម្ម តាមស្មារតីច្បាប់ថ្មីនេះឱ្យមានប្រសិទ្ធភាព និងដំណើរការរលូន៕
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
