នៅព្រឹកថ្ងៃទី២១ ខែមិថុនា ឆ្នាំ២០២៤នេះ ក្រសួងទេសចរណ៍កម្ពុជា បានសហការជាមួយស្ថានទូតនៃសាធារណរដ្ឋឥណ្ឌាប្រចាំនៅកម្ពុជា រួមនឹងរដ្ឋបាលខេត្តសៀមរាប និងស្ថាប័នពាក់ព័ន្ធ រៀបចំទិវាយោគៈអន្តរជាតិលើកទី១០ ដែលធ្វើឡើងនៅទីលានជល់ដំរី ខេត្តសៀមរាប ដោយមានការចូលរួមពីឯកឧត្ដម ហ៊ុល សីលា អនុរដ្ឋលេខាធិការក្រសួងទេសចរណ៍ លោកជំទាវ Devyani Khobragade ឯកអគ្គរដ្ឋទូតសាធារណរដ្ឋឥណ្ឌាប្រចាំកម្ពុជា និងលោកស្រី ម៉ននី រង្សី អភិបាលរងខេត្តសៀមរាប រួមនឹងវត្តមានថ្នាក់នាំក្រសួង និងមន្ទីរអង្គភាពនានាក្នុងខេត្ត សិស្សានុសិស្ស និងសាធារណៈជនទូទៅជាច្រើនរូប។
លោកជំទាវ Devyani Khobragade មានប្រសាសន៍ថា សម្រាប់ទិវាយោគៈក្នុងឆ្នាំ២០២៤នេះ រៀបចំឡើង ក្រោមប្រធានបទ “យោគៈសម្រាប់ខ្លួនឯងយោគៈសម្រាប់សង្គមជាតិ” ព្រោះដោយសារតែយោគៈ ជាផ្នែកសំខាន់មួយក្នុងការផ្សព្វផ្សាយពីសារសន្តិភាពនៅក្នុងសង្គមជាតិរបស់ពួកយើង និងក្នុងពិភពលោកជារួម។ ការហាត់យោគៈ ក្រៅពីផ្ដល់ផលវិជ្ជមានលើរូបរាងកាយ ការហាត់យោគៈក៏ផ្ដល់ជាអត្ថប្រយោជន៍សម្រាប់ផ្លូវចិត្តផងដែរ។ ជាមួយនេះលោកជំទាវ ក៏បានបង្ហាញនូវក្ដីរីករាយ នៅពេលដែលឃើញប្រជាជនកម្ពុជាកាន់តែច្រើនចាប់ផ្ដើមហ្វឹកហាត់យោគៈនេះ។
ឯកឧត្តម ហ៊ុល សីលា អនុរដ្ឋលេខាធិការក្រសួងទេសចរណ៍ បញ្ជាក់ថា កន្លងទៅក្រសួងទេសចរណ៍ បានសហការជាមួយស្ថានទូតឥណ្ឌាប្រចាំកម្ពុជា រៀបចំទិវាយោគៈអន្តរជាតិចំនួន ៩លើករួចមកហើយ នៅតាមគោលដៅទេសចរណ៍សំខាន់ៗរបស់កម្ពុជា ដោយការរៀបចំនេះ វាបានទាក់ទាញឱ្យមានការចូលរួមជាច្រើនពីសាធារណជន ភ្ញៀវទេចរជាតិ និងអន្តរជាតិ។ ចំពោះការរៀបចំទិវាយោគៈនៅថ្ងៃនេះដែរ វាពិតជាមានសារៈសំខាន់ណាស់ ក្នុងការជំរុញផ្សព្វផ្សាយសក្ដានុពលទេសចរណ៍កម្ពុជា លើកឆាកអន្តរជាតិ ក៏ដូចជាការពង្រឹងកិច្ចសហប្រតិបត្តិការកម្ពុជា-ឥណ្ឌា តាមរយៈការលើកកម្ពស់ទំនាក់ទំនង សង្គម វប្បធម៌ សេដ្ឋកិច្ច រវាងប្រជាជន និងប្រជាជន ព្រមទាំងអបអរសាទរការហោះហើរត្រង់លើកដំបូងរបស់ក្រុមហ៊ុនអាកាសចរណ៍ពីភ្នំពេញ ទៅញូដេលី និងពីញូដេលី មកភ្នំពេញផងដែរ។
មានប្រសាសន៍ក្នុងឱកាសនោះដែរ លោកស្រី ម៉ននី រង្សី អភិបាលរងខេត្តសៀមរាប ក្នុងនាមអាជ្ញាធរខេត្ត បានបង្ហាញនូវការពេញចិត្ត គាំទ្រ និងអរគុណ ដែលក្រសួងទេសចរណ៍ និងស្ថានទូតឥណ្ឌា ដែលបានជ្រើសរើសយកខេត្តសៀមរាប ដើម្បីរៀបចំព្រឹត្តិការណ៍នេះឡើង ព្រោះវានឹងបានជួយផ្សព្វផ្សាយវិស័យទេសចរណ៍កម្ពុជា ជាពិសេសតំបន់វប្បធម៌ប្រវត្តិសាស្ត្ររបស់ខេត្តសៀមរាប ទៅកាន់ពិភពលោកកាន់តែច្បាស់ថែមមួយកម្រិតទៀត។ ហើយវាក៏កាន់តែជួយរឹតចំណងមិត្តភាពរវាងប្រទេសទាំង២ កម្ពុជា-ឥណ្ឌា កាន់តែខ្លាំងបន្ថែមទៀត ក្នុងកិច្ចសហប្រតិបត្តិការនានា ដូចជាសង្គម-វប្បធម៌ និងសេដ្ឋកិច្ច រួមគាំទ្រយុទ្ធនាការផ្សព្វផ្សាយ “ឆ្នាំទេសចរណ៍កម្ពុជា-ឥណ្ឌា លើកទី១ ឆ្នាំ២០២៤” និងយុទ្ធនាការ “ទស្សនាសៀមរាប ឆ្នាំ២០២៤” ស្របតាមគំនិតផ្តួចផ្តើមយុទ្ធសាស្ត្រ “បង្កើន៥ និងអភិវឌ្ឍ៣” របស់ក្រសួងទេសចរណ៍ និងរាជរដ្ឋាភិបាលកម្ពុជាដែមទៀតផង៕
អត្ថបទ និងរូបភាព៖ លោក ឃុត សៅ , ហេង វ៉ាន្នី
កែសម្រួល៖ លោក អ៊ុន ណារាជ្យ
