នាព្រឹកថ្ងៃទី២១ ខែមិថុនា ឆ្នាំ២០២៤ លោកជំទាវ ទុយ ជិ ប្រាក់ សោភ័ណ អនុប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប បានអញ្ជើញបំពាក់កន្សែងយុវជនកាកបាទក្រហមកម្ពុជា ជុនដល់យុវសិស្សចំនួន ២០៣នាក់ មកពីវិទ្យាល័យចំនួន៤ ក្នុងស្រុកប្រាសាទបាគង ខេត្តសៀមរាប។
លោកជំទាវ ទុយ ជិ ប្រាក់ សោភ័ណ មានប្រសាសន៍ថា ការបំពាក់កន្សែងយុវជនកាកបាទក្រហមកម្ពុជាដល់យុវសិស្សទាំង ២០៣រូបនាពេលនេះ គឺបានបង្ហាញពីការយកចិត្តទុកដាក់របស់សាខាកាកបាទក្រហមកម្ពុជាខេត្ត ក្នុងការកសាងធនធានមនុស្សបន្តវេនរបស់សមាគមជាតិកាកបាទក្រហមកម្ពុជា ដែលជាស្ថាប័នមនុស្សធម៌ធំជាងគេនៅកម្ពុជា និងជាជំនួយការឲ្យអាជ្ញាធរសាធារណៈលើវិស័យមនុស្សធម៌។
លោកជំទាវ ទុយ ជិ មានប្រសាសន៍ទៀតថា កាកបាទក្រហមកម្ពុជា បានយកចិត្តទុកដាក់ខ្ពស់លើវិស័យអាទិភាពចំនួន៤ គឺ៖ទី១.វិស័យអាទិភាពការគ្រប់គ្រងគ្រោះមហន្តរាយ វិបត្តិភ័យ និងការប្រែប្រួលអាកាសធាតុ, ទី២.សុខភាព និងការថែទាំសុខភាពក្នុងសហគមន៍, ទី៣.ការលើកកម្ពស់គោលការណ៍គ្រឹះ និងតម្លៃមនុស្សធម៌ និងទី៤.ការអភិវឌ្ឍស្ថាប័ន។ ក្នុងនោះកម្ពុជាបានចាត់ទុកយុវជនជាធនធានគ្រឹះ និងមានតម្លៃបំផុតសម្រាប់ការអភិវឌ្ឍសេដ្ឋកិច្ច សង្គមកិច្ច វប្បធម៌ បរិស្ថាន និងការរក្សាសន្តិភាព ហើយនៅគ្រប់សម័យកាលគ្រប់សង្គម យុវជនជាកម្លាំងស្រួចដែលមានកម្លាំងកាយចិត្ត និងស្មារតីភ្លឺស្វាង មានទឹកចិត្តក្លាហាន ពុះពារមិនរារែកគ្រប់ឧបសគ្គ ពិសេសយុវជន គឺជាសសរទ្រូងរបស់ប្រទេសជាតិទាំងនៅពេលបច្ចុប្បន្ន និងទៅអនាគត។ យុវជនកាកបាទក្រហមកម្ពុជា គឺជាអ្នកស្ម័គ្រចិត្តវ័យក្មេងដែលជាកម្លាំងស្នូលមួយដ៏មានសារៈសំខាន់ និងសកម្មបំផុត ក្នុងការផ្ដល់នូវសេវាកម្មមនុស្សធម៌ ប្រកបដោយការប្ដេជ្ញាចិត្តខ្ពស់ និងការលះបង់ឥតងាករេ ស្របតាមប្រធានបទ “កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា” និង “យុវជនជាភ្នាក់ងារនៃការផ្លាស់ប្តូរឥរិយាបទក្នុងសង្គម”។
ព័ត៌មានជាតិ ថ្មីៗ
ជាមួយគ្នានោះ លោកជំទាវអនុប្រធានគណៈកម្មាធិការសាខា ក៏បានណែនាំ និងផ្តាំផ្ញើរដល់ប្អូនយុវជនកាកបាទក្រហម ដែលបានបំពាក់កន្សែងនាពេលនេះ ត្រូវប្រកាន់ខ្ជាប់នូវស្មារតី សាមគ្គីភាពរវាងគ្នានិងគ្នា រវាងយុវជនកាកបាទក្រហមកម្ពុជានិងយុវជនដ៏ទៃទៀតក្នុងការបំពេញបេសកម្មមនុស្សធម៌ ចៀសវាងឱ្យបានដាច់ខាតទង្វើទាំងឡាយណាដែលនាំទៅដល់ការបែកបាក់ ប្រេះសាំ សាមគ្គីភាព។ ខិតខំរៀនសូត្រចំណេះវិជ្ជា ដើម្បីក្លាយជាកូនល្អ សិស្សល្អ យុវជនល្អ មិត្តល្អ ពលរដ្ឋល្អ មិនធ្វើអំពើអសីលធម៌ផ្សេងៗ ដែលនាំឱ្យអ្នកមានគុណពិបាកចិត្ត និងមានទុក្ខ។ ទន្ទឹមនេះ ត្រូវអនុវត្តន៍ក្រមសីលធម៌ មិត្តអប់រំមិត្ត មិនបណ្តោខ្លួនឱ្យធ្លាក់ចូលក្នុងអំពើមិនល្អ គ្រឿងញៀន ក្មេងទំនើង និងធ្វើជាគំរូក្នុងការអូសទាញមិត្តភក្តិ ដែលដើរផ្លូវខុសឱ្យងាកមករកផ្លូវត្រូវវិញផងដែរ៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
