នាថ្ងៃទី២៤ ខែមិថុនា ឆ្នាំ២០២៤ នៅភោជនីយដ្ឋានសមភាពក្រុងសៀមរាប និងបានប្រារព្ឋពិធីបូកសរុបការងារបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ និងការងារបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌ អាណត្តិទី៤ ឆ្នាំ២០២៤ ក្រោមអធិបតីភាព ឯកឧត្តម ជឺ ចំណាន អនុប្រធានគណៈកម្មាធិការជាតិរៀបចំការបោះឆ្នោត និងវត្តមានសមាជិក សមាជិកា គណៈកម្មាធិការជាតិរៀបចំការបោះឆ្នោត មកពីបណ្តាខេត្ត-រាជធានីទាំង២៥ វត្តមានឯកឧត្តម លោកជំទាវ លោក លោកស្រី តំណាងក្រសួង ស្ថាប័ន គណបក្សនយោបាយ សមាគម និងអង្គការមិនមែនរដ្ឋាភិបាល សរុបចំនួនប្រមាណជាង៥០០នាក់។
ថ្លែងបើកសន្និបាត ឯកឧត្តម ជី ចំណាន អនុប្រធានគណៈកម្មាធិការជាតិរៀបចំការបោះឆ្នោត
មានប្រសាសន៍ថា សន្និបាតនាពេលនេះ មានគោលបំណងសំខាន់គឺធ្វើការបូកសរុប និងវាយតម្លៃ លើលទ្ធផលការងាររបស់គណៈកម្មាធិការជាតិរៀបចំការបោះឆ្នោតក្នុងការរៀបចំ ការចាត់ចែង និងការគ្រប់គ្រងការបោះឆ្នោតអសកលចំនួន២ រួមមាន ការបោះឆ្នោត ជ្រើសតាំងសមាជិកព្រឹទ្ធសភា នីតិកាលទី៥ និងការបោះឆ្នោតជ្រើសរើសក្រុមប្រឹក្សា រាជធានី ខេត្ត ក្រុង ស្រុក ខណ្ឌ អាណត្តិទី៤ ដែលបានប្រព្រឹត្តទៅក្នុងឆមាសទីមួយ នៃឆ្នាំ២០២៤នេះ ហើយតាមរយៈសមិទ្ធផល និងជោគជ័យនៃការបោះឆ្នោត ដែលបានប្រព្រឹត្តទៅ ប្រកបដោយសន្តិសុខ សុវត្ថិភាព និងសណ្តាប់ធ្នាប់ល្អស្របតាមបទបញ្ជា និងនីតិវិធី ផែនការមេ និងប្រតិទិនការងារ ត្រូវបានភាគីពាក់ព័ន្ធជាតិ និងអន្តរជាតិ ពិសេសគឺគណបក្សនយោបាយដែលបានចូលរួម ការបោះឆ្នោតបានសាទរ និងវាយតម្លៃថាពិតជាមានតម្លាភាព និងបានប្រព្រឹត្តទៅដោយសេរី ត្រឹមត្រូវនិងយុត្តិធម៌ ស្របតាមគោលការណ៍លទ្ធិប្រជាធិតេយ្យសេរីពហុបក្ស។
ឯកឧត្តម បានបន្តទៀតថា គជប ពិតជាមានមោទនៈភាពក្រៃលែង ដែលសមិទ្ធផលទាំងអស់នេះ អាចសម្រេចទៅបានអាស្រ័យលើកត្តាសំខាន់ចំនួន២ ដូចជា កត្តាផ្ទៃក្នុងរបស់គជប គឺមានការដឹកនាំរៀបចំចាត់ចែងបានល្អពីថ្នាក់ដឹកនាំគ.ជ.ប និងមន្ត្រីបោះឆ្នោត គ្រប់លំដាប់ថ្នាក់ ដែលជាសេនាធិការលើការងារបច្ចេកទេសប្រកបដោយ បទពិសោធ និងមនសិការវិជ្ជាជីវៈ និងកត្តាខាងក្រៅ គឺមានកិច្ចសហការល្អតាមតួនាទី និងភារកិច្ចរបស់ខ្លួនពីគ្រប់ភាគីពាក់ព័ន្ធ អាជ្ញាធរដែនដីគ្រប់លំដាប់ថ្នាក់ និងអ្នកបោះឆ្នោតដែលជា តំណាងរាស្ត្រក្នុងតំណែង ឬ/និងសមាជិកក្រុមប្រឹក្សាឃុំ សង្កាត់ក្នុងតំណែង គណបក្សនយោបាយ អ្នកសង្កេតការណ៍ជាតិអន្តរជាតិ និងអ្នកសារព័ត៌មាន ជាតិ អន្តរជាតិ។
ឯកឧត្តមជឺចំណានបញ្ជាក់ថា៖ទោះបីជាគណៈកម្មាធិការជាតិរៀបចំការបោះឆ្នោតបានរៀបចំការបោះឆ្នោត អសកលទាំងពីរនេះ សម្រេចបាននូវលទ្ធផលជោគជ័យយ៉ាងណាក្តី ក៏យើងពិនិត្យ ឃើញថា នៅមានចំណុចខ្វះខាតមួយចំនួន ដែលយើងទាំងអស់គ្នាត្រូវតែចូលរួមចំណែក ដោះស្រាយ ដោយត្រូវស្វែងរកនូវចំណុចខ្លាំង ចំណុចខ្សោយ កាលានុវត្តភាព និងបញ្ហាប្រឈមនានាតាមរយៈអង្គសន្និបាតនេះ ហេតុនេះសូមលើកទឹកចិត្ត ឯកឧត្តម លោកជំទាវ លោក លោកស្រី មេត្តាចូលរួមពិភាក្សា ឱ្យបានផុលផុស ដោយលើកឡើងនូវបញ្ហាប្រឈមសំខាន់ៗ ផ្តល់ជាយោបល់ ឬលើកជាសំណូមពរ ឬអនុសាសន៍ ទៅតាមប្រធានបទនីមួយៗ ដើម្បីជាមូលដ្ឋាន ក្នុងការរៀបចំការបោះឆ្នោតខាងមុខទៀតឱ្យកាន់តែប្រសើរឡើងថែមទៀត៕
អត្ថបទ និងរូបភាព ៖លោក យូ វង្ស និងលោកឈិត សាវី
កែសម្រួស ៖ លោកហាំ ម៉េងហួត
