កាលពីថ្ងៃទី២៥ ខែមិថុនា ឆ្នាំ២០២៤ម្សិលមិញនេះ ក្រសួងបរិស្ថាន បានរៀបចំកិច្ចប្រជុំពិគ្រោះយោបល់លើកចុងក្រោយ ស្តីពីការកំណត់ និងបែងចែកតំបន់គ្រប់គ្រង និងផែនការគ្រប់គ្រង នៅឧទ្យានជាតិព្រះជ័យវរ្ម័ន-នរោត្តម “ភ្នំគូលែន” ដឹកនាំដោយឯកឧត្តម សុខខេង នវិន្ទ អនុរដ្ឋលេខាធិការក្រសួងបរិស្ថាន រួមនឹងវត្តមានឯកឧត្ដម ស្រី ស៊ុនលាង អគ្គនាយកនៃអគ្គនាយកដ្ឋានតំបន់ការពារធម្មជាតិ និងលោក យុន លីនណេ អភិបាលរងខេត្តសៀមរាប ដោយមានការចូលរួមពីមន្ត្រីជំនាញ និងអ្នកពាក់ព័ន្ធជាច្រើនរូប។
លោក យុន លីនណេ មានប្រសាសន៍ថា ខេត្តសៀមរាបជាតំបន់ទេសចរណ៍ដ៍សំខាន់របស់ប្រទេសកម្ពុជា ដោយសារវត្តមានប្រាសាទអង្គរវត្តដ៏ល្បីល្បាញ និងប្រាសាទបុរាណដទៃទៀតជាច្រើន។ ថ្មីៗនេះ ក្រុងសៀមរាបកំពុងប្រែក្លាយរូបរាងជាក្រុងទំនើបតាមរយៈកំណើនសណ្ឋាគារ ភោជនីយដ្ឋាន ហាងលក់ទំនិញ ជាដើមដែលបម្រើឱ្យវិស័យទេសចរណ៍។ ខេត្តសៀមរាបមានតំបន់ការពារធម្មជាតិចំនួន៨ ក្នុងនោះឧទ្យានជាតិព្រះជ័យវរ្ម័ន-នរោត្តម «ភ្នំគូលែន» ជាតំបន់ការពារធម្មជាតិ១ ក្នុងចំណោមតំបន់ការពារធម្មជាតិទាំង៨។
លោកអភិបាលរងខេត្ត បន្តថា ឧទ្យានជាតិទាំងមូលត្រូវបានត្រូវបានរៀបចំសេចក្តីព្រាងតំបន់គ្រប់គ្រង របាយការណ៍បច្ចេកទេស និងមានកម្មវិធីគ្រប់គ្រងនិងបានប្រជុំពិគ្រោះយោបល់ច្រើនដងរួចមកហើយ ដូច្នេះកិច្ចប្រជុំពិគ្រោះយោបល់លើកចុងក្រោយស្តីពី ការកំណត់ និងបែងចែកតំបន់គ្រប់គ្រង នៅឧទ្យានជាតិព្រះជ័យវរ្ម័ន-នរោត្តម «ភ្នំគូលែន» នាពេលនេះនឹងចង្អុលបង្ហាញឱ្យកាន់តែច្បាស់បន្ថែមទៀត ពីតំបន់ដែលមានសក្តានុពលកំណត់ជាស្នូល និងតំបន់អភិរក្ស ដែល មានតំលៃសម្រាប់ការពារធនធានធម្មជាតិដ៏មានតំលៃសម្រាប់ជាតិ មាតុភូមិរបស់យើង និងតំបន់មួយចំនួនទៀតមានតំលៃសម្រាប់សេដ្ឋកិច្ចជាតិ សហគមន៍មូលដ្ឋាន ដែលគួរជាតំបន់ប្រើប្រាស់ដោយចីរភាព និងភូមិករ ស្រែចម្ការ ដីលំនៅដ្ឋាន និងដីអាស្រ័យផលជាក់ស្តែងរបស់ប្រជាពលរដ្ឋ ជាតំបន់សហគមន៍។
លោកបានបញ្ជាក់ថា រដ្ឋបាលខេត្តសូមគាំទ្រយ៉ាងពេញទំហឹងលើការបង្កើតឱ្យមានការកំណត់ និងបែងចែកតំបន់គ្រង់គ្រងនៅក្នុងឧទ្យានជាតិព្រះជ័យវរ្ម័ន-នរោត្តម «ភ្នំគូលែន» ហើយខ្ញុំមានជំនឿយ៉ាងម៉ុតមាំថា ក្រោយពីបានរៀបចំកំណត់ និងបែងចែកតំបន់គ្រង់គ្រង ធនធានធម្មជាតិ ជាពិសេសសត្វព្រៃសំខាន់ៗ ដែលជាប្រភេទមានដោយកម្រ ប្រភេទជិតផុតពូ ប្រភេទកំពុងទទួលរងគ្រោះថ្នាក់ នឹងត្រូវបានការពារអភិរក្ស និងគ្រប់គ្រងបានកាន់តែប្រសើឡើង ហើយនាពេលអនាគតដ៏ខ្លីខាមុខនេះ ធនធានធម្មជាតិរបស់ជាតិយើងនឹងមានការកើនឡើងជាលំដាប់។
មានប្រសាសន៍ក្នុងឱកាសនោះ ឯកឧត្តម សុខខេង នវិន្ទ អនុរដ្ឋលេខាធិការក្រសួងបរិស្ថាន បានស្នើដល់មន្ទីរពាក់ព័ន្ធ អាជ្ញាធរឃុំស្រុក ពិនិត្យសេចក្តីព្រាងផែនទីកំណត់ និងបែងចែកតំបន់គ្រប់គ្រងឧទ្យានជាតិលើកចុងក្រោយ និងផ្តល់ធាតុចូលឱ្យបានគ្រប់ជ្រុងជ្រោយ ដើម្បីឱ្យក្រុមការងារអាចដំណើការរៀបចំកំណត់ និងបែងចែកតំបន់គ្រប់គ្រង និងផែនការគ្រប់គ្រង អនុវត្តទៅបានដោយឆាប់រហ័ស និងទាន់ពេលវេលា ព្រោះនេះជាកិច្ចការប្រវត្តិសាស្ត្រដើម្បីបន្សល់ទុកឱ្យកូនចៅជំនាន់ក្រោយរបស់យើងទាំងអស់គ្នា៕
អត្ថបទ និងរូបភាព៖ រដ្ឋបាលខេត្តសៀមរាប
កែសម្រួល៖ លោក អ៊ុន ណារាជ្យ
