នៅថ្ងៃទី២៦ ខែមិថុនា ឆ្នាំ២០២៤នេះ ក្រុមប្រឹក្សាខេត្តសៀមរាប បានបើកកិច្ចប្រជុំសាមញ្ញលើកទី១ របស់ខ្លួនសម្រាប់អាណត្តិទី៤ ដឹកនាំដោយ ឯកឧត្តម លី សំរិទ្ឋ ប្រធានក្រុមប្រឹក្សាខេត្តសៀមរាប និង ឯកឧត្តម ប្រាក់ សោភ័ណ អភិបាលខេត្ត ដោយមានការចូលរួមសមាជិកក្រុមប្រឹក្សាខេត្ត ថ្នាក់ដឹកនាំមន្ទីរអង្គភាពជុំវិញខេត្ត អាជ្ញាធរក្រុងស្រុក និងមន្ត្រីរាជការជាច្រើនរូប។
ឯកឧត្តម លី សំរិទ្ឋ មានប្រសាសន៍ថា អនុលោមតាមប្រកាសលេខ២៣៧៥ ប្រក ចុះថ្ងៃទី១៦ ខែឧសភា ឆ្នាំ២០២៤ របស់ក្រសួងមហាផ្ទៃ ស្ដីពីកិច្ចប្រជុំចូលកាន់តំណែងកិច្ចប្រជុំសាមញ្ញលើកទី១ និងកិច្ចប្រជុំសាមញ្ញលើកទី២ របស់ក្រុមប្រឹក្សារាជធានីខេត្ត ក្រុងស្រុកខណ្ឌ អង្គប្រជុំសាមញ្ញលើកទី១ របស់ក្រុមប្រឹក្សា ត្រូវប្រារព្ធឡើងមិនឱ្យហួសពី១៥ថ្ងៃ បន្ទាប់ពីប្រកាសចូលកាន់តំណែង។ ចំពោះកិច្ចប្រជុំក្រុមប្រឹក្សាខេត្តសៀមរាប នាពេលនេះដែរ បានលើកយករបៀបវារៈចំនួន៣ មកពិនិត្យពិភាក្សា រួមមាន៖ទី១.ផ្សព្វផ្សាយសេចក្តីណែនាំលេខ០២៤ សណន របស់ក្រសួងមហាផ្ទៃ ស្តីពីការរៀបចំបទបញ្ជាផ្ទៃក្នុងរបស់ក្រុមប្រឹក្សារាជធានីខេត្ត ក្រុងស្រុកខណ្ឌ, ទី២.ពិនិត្យពិភាក្សាលើការផ្តួចផ្តើមរៀបចំសេចក្តីព្រាងប្រក្រតីទិនកិច្ចប្រជុំសាមញ្ញរបស់ក្រុមប្រឹក្សាខេត្ត សម្រាប់រយៈពេល១២ខែ និងទី៣.រាយការណ៍អំពីលទ្ឋផលការងាររតបស់រដ្ឋបាលខេត្ត ក្នុងអាណត្តិទី៣ នៃក្រុមប្រឹក្សាខេត្ត និងទិសដៅអនុវត្តបន្តរយ:ពេល ៣ខែ។
ឯកឧត្តម ប្រាក់ សោភ័ណ អភិបាលខេត្ត បានថ្លែងអំណរគុណដល់សមាជិកក្រុមប្រឹក្សាខេត្ត ដែលតែងតែជួយជួយយកចិត្តទុកដាក់ពិនិត្យផ្តល់យោបល់ ផ្តល់អនុសាសន៍ និងឱវាទនានា ព្រមទាំងសំណូមពរផ្សេងៗ សម្រាប់ជាការតម្រង់ទិសលើការអនុវត្តគោលនយោបាយ ក៏ដូចជាតួនាទីភារកិច្ចរបស់រដ្ឋបាលខេត្ត ដើម្បីអនុវត្តនិងប្រព្រឹត្តិទៅឱ្យល្អប្រសើរ ដែលនេះបង្ហាញពីភាពខ្លាំងរបស់ក្រុមប្រឹក្សាខេត្តនាពេលកន្លងមក ជាការជួយជំរុញឲ្យការអនុវត្តការងាររបស់ក្រុមប្រឹក្សាខេត្ត អាណត្តិទី៤ កាន់តែខ្លាំង ស្របតាមយុទ្ឋសាស្ត្របញ្ចកោណដំណាក់កាលទី១ របស់រាជរដ្ឋាភិបាលកម្ពុជា។
ឯកឧត្តមអភិបាលខេត្ត ក៏បានស្នើរដ្ឋបាលក្រុងស្រុក កម្លាំងមានសមត្ថកិច្ច មន្ទីរអង្គភាពស្ថាប័ននានា យកចិត្តទុកដាក់លើការងារមួយចំនួនដែលជាកិច្ចការអទិភាព និងសំខាន់សម្រាប់ខេត្តសៀមរាប ដូចជាការងារសន្តិសុខសណ្តាប់ធ្នាប់សាធារណៈ បញ្ហាគ្រោះថ្នាក់ចរាចរណ៍ ក្មេងទំនើង បញ្ហាគ្រឿងញៀន ដោយត្រូវអនុវត្តឱ្យបានម៉ឺងម៉ាត់ ជាពិសេសការអនុវត្តនូវគោលការណ៍ភូមិឃុំសង្កាត់ មានសុវត្ថិភាពឱ្យកាន់តែមានប្រសិទ្ឋភាពខ្ពស់។ បន្ថែមពីនេះត្រូវត្រៀមផែនការដោះស្រាយ និងទប់ស្កាត់បញ្ហាភ្លាមៗ ក្នុងស្ថានភាពប្រែប្រួលអាកាសធាតុ ដែលអាចនឹងកើតមានក្នុងរដូវេវស្សា រួមមានខ្យល់កន្ត្រាក់ ផ្គររន្ទះ ជាពិសេសករណីសត្វដង្កូវហ្វូង ដែលកំពុងរាតត្បាតបំផ្លាញដំណាំស្រូវពលរដ្ឋរាប់ពាន់ហិកតាតាមបណ្ដាក្រុងស្រុកទូទាំងខេត្ត។
ថ្លែងបូកសរុបកិច្ចប្រជុំ ឯកឧត្តម លី សំរិទ្ឋ មានប្រសាសន៍ថា គោលនយោបាយរាជរដ្ឋាភិបាលនីតិកាលទី៧ រដ្ឋបាលខេត្តសៀមរាប បានអនុវត្តកិច្ចការសំខាន់ៗ លើការងារសន្តិសុខ សណ្តាប់ធ្នាប់សាធារណៈ ការគ្រប់គ្រងគ្រោះមហន្តរាយ ដោយខ្យល់កន្ទ្រាក់ ជំនន់ទឹកភ្លៀង ដោយគណៈអភិបាលខេត្ត មន្ត្រីពាក់ព័ន្ធ បានចុះផ្ទាល់ដល់មូលដ្ឋាន និងដោះស្រាយបានទាន់ពេលវេលាដល់គ្រួសារជួបការលំបាក និងងាយរងគ្រោះ។ ឯកឧត្តមក៏បានថ្លែងកោតសរសើរ ចំពោះអាជ្ញាធរមូលដ្ឋានតាមបណ្ដាក្រុងស្រុក ឃុំសង្កាត់ និងថ្នាក់ដឹកនាំមន្ទីរអង្គភាពស្ថាប័នពាក់ព័ន្ឋនានា ដែលបានសហការគ្នា និងអនុវត្តបំពេញតួនាទីភារកិច្ចទៅតាមវិស័យ តាមជំនាញសម្រេចបានលទ្ឋផលបានល្អប្រសើរគួរជាទីមោទនៈនាពេលកន្លងមក៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
