នៅព្រឹកថ្ងៃទី២៧ ខែមិថុនា ឆ្នាំ២០២៤នេះ មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប សហការជាមួរដ្ឋបាលស្រុកពួក បានរៀបចំពិធីប្រកាសកំណត់តំបន់ធ្វើការវិនិច្ឆ័យសម្រាប់ការចុះបញ្ជីដីធ្លីមានលក្ខណៈជាប្រព័ន្ធក្នុងភូមិចំនួន៦ នៃឃុំខ្នាត ស្រុកពួក ខេត្តសៀមរាប ស្ថិតក្នុងបរិវេណវត្តខ្នាតរង្សី ហៅវត្តខ្នាត។
លោក ស៊ុន សុជាតិ អនុប្រធានមន្ទីររៀបចំដែនដីខេត្ត បានបញ្ជាក់ថា ការចុះបញ្ជីដីធ្លីមានលក្ខណៈជាប្រព័ន្ធ គឺទាមទារការកំណត់ព្រំដី ការវាស់វែង និងការវិនិច្ឆ័យច្បាស់លាស់ ដែលអនុវត្តផ្ទាល់ដោយមន្ត្រីជំនាញ សហការជាមួយអាជ្ញាធរដែនដី និងមន្ទីរអង្គភាពពាក់ព័ន្ធ ដោយការចុះបញ្ជីដីធ្លីនេះ គឺត្រូវចុះបញ្ជីទាំងដីឯកជន និងដីរដ្ឋដែលអនុវត្តទៅតាមនីតិវិធី និងបច្ចេក វិទ្យាទំនើប មានតម្លាភាព និងការទទួលខុសត្រូវហើយមានប្រសិទ្ធិភាពលើការគ្រប់គ្រងដីធ្លី។ ដោយឡែកសម្រាប់ឃុំខ្នាត មានភូមិសរុប១២ភូមិ ហើយភូុមិដែលបានរៀបចំពិធីប្រកាសនាពេលនេះមានចំនួន៦ ដូចជា៖ ភូមិស្វាយ ភូមិត្រមេង ភូមិជ្រលង ភូមិអំពិលពាម ភូមិទឹកថ្លា និងភូមិបឹងខ្នារ។
លោកបញ្ជាក់ទៀតថា ការចុះបញ្ជីនេះដែរ អនុវត្តតាមនីតិវិធី ៥ដំណាក់កាល គឺទី១.កំណត់តំបន់ធ្វើការវិនិច្ឆ័យ ទី២.ប្រតិបត្តិការបច្ចេកទេស ចុះកំណត់ព្រំ វាស់វែង និងវិនិច្ឆ័យ ទី៣.ការបិទផ្សាយជាសាធារណៈនូវឯកសារនៃការវិនិច្ឆ័យ ទី៤.ការសម្រេចលើឯកសារវិនិច្ឆ័យ និងទី៥.ចេញវិញ្ញាបនបត្រ និងប្រគល់ជូនម្ចាស់ដី។
ក្នុងឱកាសនោះ លោក ស៊ិន ចាន់ថុល អភិបាលស្រុកពួក បានណែនាំដល់ប្រជាពលរដ្ឋជាម្ចាស់ក្បាលដី និងអ្នកកាន់កាប់ដីក្នុងភូមិទាំង៦ ដែលបានកំណត់តំបន់ធ្វើការវិនិច្ឆ័យសម្រាប់ការចុះបញ្ជីដីធ្លីមានលក្ខណៈជាប្រព័ន្ធទាំងអស់ ត្រូវចូលរួមសហការជិតស្និទ្ឋជាមួយក្រុមការងារវាស់វែង និងចង្អុលបង្ហាញទីតាំងក្បាលដី ព្រំដី និងបោះបង្គោលច្បាស់លាស់ ព្រមទាំងមានការឯកភាពគ្នាជាមួយម្ចាស់ព្រំដី ចៀសវាងមានជម្លោះ ដើម្បីទទួលមកវិញនូវវិញ្ញាបនបត្រសម្គាល់ម្ចាស់អចលនវត្ថុទាំងអស់គ្នា។ បន្ថែមពីនេះសូមរៀបចំឯកសារដែលពាក់ព័ន្ឋនឹងអត្តសញ្ញាណម្ចាស់ដីរួមមាន៖ អត្តសញ្ញាណបណ្ណ សៀវភៅគ្រួសារ សៀវភៅស្នាក់នៅ សំបុត្រកំណើត សំបុត្រអាពាហ៍ពិពាហ៍ រួមនិងអត្តសញ្ញាណក្បាលដី ដូចជា៖ប័ណ្ណកម្មសិទ្ឋ បង្កាន់ដៃទទួលពាក្យ លិខិតលក់-ទិញ លិខិតផ្ទេរសិទ្ឋិ សេចក្តីសម្រេចរបស់តុលាការ ជាមុនសិន មុននឹងដំណើការនៃការកំណត់ព្រំ វាស់វែង វិនិច្ឆ័យឈានមកដល់៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
