នៅថ្ងៃទី៣០ ខែមិថុនា ឆ្នាំ២០២៤នេះរដ្ឋបាលខេត្តសៀមរាប បានរៀបចំប្រារព្ធពិធីអបអរសាទរទិវាអន្តរជាតិប្រយុទ្ធប្រឆាំងគ្រឿងញៀន២៦មិថុនា ឆ្នាំ២០២៤ ក្រោមប្រធានបទ៖ រួមគ្នាវិនិយោគលើការបង្ការទប់ស្កាត់ និងលើកកម្ពស់ការអប់រំដើម្បីសហគមន៍គ្មានគ្រឿងញៀន ដែលស្ថិតក្រោមអធិបតីភាព ឧត្តមសេនីយ៍ឯក ថោង សុគន្ធា អគ្គលេខាធិការរង នៃអាជ្ញាធរជាតិប្រយុទ្ធប្រឆាំងគ្រឿងញៀន និងលោក ពិន ប្រាកដ អភិបាលរងខេត្តសៀមរាបព្រមទាំងមានការអញ្ជើញចូលរួមពីតំណាងសាលាដំបូងខេត្ត ព្រះរាជ្ញា នៃអយ្យការអមសាលាដំបូងខេត្ត, កងកម្លាំងទាំង៣ ប្រធានមន្ទីរ អង្គភាពនានាជុំវិញខេត្ត និងស្ថាប័នពាក់ព័ន្ធជាច្រើនផងដែរ ។
ព្រះរាជអាជ្ញា នៃអយ្យការអមសាលាដំបូងខេត្ដសៀមរាប ឯកឧត្ដម មាស ច័ន្ទពិសិដ្ឋ មានប្រសាសន៍ថា ដើម្បីអនុវត្តឱ្យបានត្រឹមត្រូវនូវបទបញ្ជារបស់ប្រមុខរាជរដ្ឋាភិបាល អយ្យការអមសាលា ដំបូងខេត្តសៀមរាប ស្នើដល់មន្ត្រីអនុវត្តច្បាប់នៅខេត្តសៀមរាប ត្រូវរួមគ្នាចាត់វិធានការឱ្យបានតឹងរ៉ឹង និងម៉ឺងម៉ាត់ជាទីបំផុតក្នុងការបង្ក្រាបករណីជួញដូរ ចែកចាយ ឱ្យដល់ឬសគល់ មេក្លោង បណ្តាញចែកចាយ ដើម្បីលុបបំបាត់ឱ្យអស់គ្រឿងញៀននៅក្នុងសហគមន៍ ធានាបានភូមិឃុំមានសុវត្ថិភាព។ ក្នុងនាមស្ថាប័នអនុវត្តច្បាប់ ត្រូវអនុវត្ដន៍ឱ្យបានត្រឹមត្រូវ ប្រកបដោយភាពម៉ឺងម៉ាត់ក្នុងការផ្តន្ទាទោសឧក្រិដ្ឋជនគ្រឿងញៀនឱ្យបានធ្ងន់ធ្ងរ និងយុត្តិធម៌បំផុត ដូចដែលបានអនុវត្តកន្លងមក តាមរយៈការផ្សាយជាសាធារណៈ អំពីចំណាត់ការលើសំណុំរឿងគ្រឿងញៀន និងសំណុំរឿងផ្សេងៗទៀត ដើម្បីបង្ហាញពីតម្លាភាពលើចំណាត់ការ និងការផ្តន្ទាទោសលើសំណុំរឿងទាំងនោះ ។
ឯកឧត្ដមព្រះរាជអាជ្ញា ក៏បានស្នើរដល់មន្ត្រីអនុវត្តច្បាប់ អាជ្ញាធរមានសមត្ថកិច្ច និងប្រជាពលរដ្ឋបន្ត អនុវត្តនូវពាក្យស្លោករបស់ប្រមុខរាជរដ្ឋាភិបាល ៣កុំ ១រាយការណ៍ គឺកុំពាក់ព័ន្ធ កុំអន្តរាគមន៍ កុំលើកលែង និងត្រូវរាយការណ៍ ។
ឯកឧត្ដមបញ្ជាក់ថា គ្រឿងញៀន និងវត្ថុតាងដែលបានសម្រេចរឹបអូសដោយសាលាដំបូង ដែលត្រូវដុតបំផ្លាញចោលនេះមានចំនួន៤៣ សំណុំរឿង រួមមាន គ្រឿងញៀនសរុបទម្ងន់ ១០,៥៧៦.១១ (មួយម៉ឺនប្រាំរយចិតសិបប្រាំមួយក្បៀសដប់មួយ)ក្រាម ។ បារីអេឡិចត្រូនិចគ្រប់ប្រភេទចំនួន ១៨កេសធំ និង៤៧ប្រអប់តូច ដែលបានចាប់យកក្នុងពេលប្រតិបត្តិការបង្ក្រាបគ្រឿងញៀន។ ឧបករណ៍កែច្នៃសម្រាប់ប្រើប្រាស់គ្រឿងញៀន និងវត្ថុតាងផ្សេងៗមួយចំនួនទៀត ។
ឯកឧត្ដមបន្ថែមថា កន្លងទៅថ្មីៗនេះ សមត្ថកិច្ចបានធ្វើការបង្ក្រាបគ្រឿងញៀនករណីធំជាលើកទីមួយនៅក្នុងខេត្ដសៀមរាប បានរហូតដល់ទៅជាង ១២០ គីឡូក្រាម ប៉ុន្ដែមិនទាន់ដុតកំទេចចោលនៅឡើយទេ ដោយសារសុំណុំរឿងមិនទាន់បានបញ្ចប់នៅតុលាការនៅឡើយ។
លោក ពិន ប្រាកដ អភិបាលរងខេត្ដសៀមរាប បានថ្លែងថា ការវិវត្តរីកចម្រើនស្ទើគ្រប់វិស័យរបស់ខេត្ដនេះ ធ្វើឱ្យជនឱកាសនិយមខិលខូចមួយចំនួនលបលួចចរាចរណ៍នាំចូលនូវគ្រឿងញៀនគ្រប់ប្រភេទ ហើយបានចែកចាយបន្តទៅគោលដៅផ្សេងៗទៀត និងមួយចំណែកមកធ្វើសកម្មភាពចែកចាយដល់សមាសភាពមិនល្អ និងភ្ញៀវទេសចរមួយចំនួននៅតាមបណ្តាក្លឹបកំសាន្ត ភោជនីយដ្ឋាន ផ្ទះសំណាក់ ព្រមទាំងមានការរាលដាល ដល់ទីជនបទមួយចំនួនផងដែរ។ ជាមួយនឹងសកម្មភាពចែកចាយ និងប្រើប្រាស់គ្រឿងញៀនខុសច្បាប់ទាំងនេះ គណៈកម្មាធិការត្រួតពិនិត្យគ្រឿងញៀនខេត្ត ដោយមានកងកម្លាំងប្រដាប់អាវុធ គ្រប់ប្រភេទ បានយកចិត្តទុកដាក់ដាក់ធ្វើសកម្មភាព ស្រាវជ្រាវ បង្ក្រាប ទប់ស្កាត់ និងអប់រំផ្សព្វផ្សាយជាបន្តបន្ទាប់។ លោកបន្ដថា រយៈពេល៥ខែ ឆ្នាំ២០២៤នេះ សមត្ថកិច្ចជំនាញបង្ក្រាបបានចំនួន២៣៨ករណី ឃាត់ខ្លួនមនុស្សចំនួន១៣៩៣ នាក់ ក្នុងនោះ មានករណីជួញដូរ និងរក្សាទុក១០៣ករណី ឃាត់ខ្លួន៣០៧នាក់ ករណីប្រើប្រាស់១០៥ករណី ឃាត់ខ្លួន១០៧៩នាក់ និងអនុវត្តដីកាចំនួន២០ករណី ឃាត់ខ្លួន១៧នាក់
ខណៈដែលវិធានការព្យាបាល ស្តារនីតិសម្បទា និងសមាហរណកម្មមជ្ឈមណ្ឌលស្តារនីតិសម្បទាអ្នកញៀនគ្រឿងញៀនខេត្ត បានទទួលអ្នកញៀនគ្រឿងញៀនចំនួន ១០៤៦នាក់។
ព័ត៌មានជាតិ ថ្មីៗ
ឯកឧត្តមសេនីយ៍ឯក ថោង សុគន្ធា អគ្គលេខាធិការរង នៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀនក៍ផ្តាំផ្ញើដល់អង្គភាព និងស្ថាប័នពាក់ព័ន្ធទាំងអស់ត្រូវបន្តយកចិត្តទុកដាក់ពង្រឹងតួនាទី និងភារកិច្ចរបស់ខ្លួន ដើម្បីអនុវត្តការងារប្រយុទ្ធប្រឆាំងគ្រឿងញៀន តាមដែនសមត្ថកិច្ចរបស់ខ្លួនឱ្យបានជាប្រចាំ និងមានប្រសិទ្ធភាពខ្ពស់ ទន្ទឹមនោះ ក៏ត្រូវយកចិត្តទុកដាក់ពង្រឹង សមត្ថភាព និងគុណភាពការងារ ខិតខំរកវិធីសាស្ត្រថ្មីៗ ឱ្យស្របទៅនឹងបរិបទនៃសម័យឌីជីថលដែលរាជរដ្ឋាភិបាល បាននិងកំពុងពង្រីកនាពេលបច្ចុប្បន្ននេះ។
អត្ថបទ និងរូបភាព ៖លោកឈិត សាវី លោកទ្រា ពន្លឺ និងលោកជាស្រស់
កែសម្រួល ៖លោក ហាំ ម៉េងហួត
