ការដាក់ដេញថ្លៃគម្រោងសាងសង់ផ្លូវបេតុងអាមេ ១ខ្សែ និងគម្រោងជួសជុលផ្លូវដីសក្រាលក្រួសធម្មជាតិ១ខ្សែ នៅក្នុងឃុំស្នួល ស្រុកក្រឡាញ់ ខេត្តសៀមរាប ត្រូវបានប្រកាសបញ្ចប់ការដេញថ្លៃដោយជោគជ័យ នៅថ្ងៃទី០១ ខែកក្កដា ឆ្នាំ២០២៤ ដោយមានការចូលរួមពីមន្ត្រីបច្ចេកទេសខេត្ត អាជ្ញាធរស្រុក គណៈកម្មការលទ្ធកម្មឃុំ ក្រុមហ៊ុនម៉ៅការ និងអ្នកពាក់ព័ន្ធជាច្រើនរូប។
លោក យ៉ិន ម៉ាក់ ប្រធានគណៈកម្មការលទ្ធកម្មឃុំស្នួល ស្រុកក្រឡាញ់ បានឲ្យដឹងថា ចំពោះគម្រោងមូលនិធិឃុំឆ្នាំ២០២៤នេះ ឃុំស្នួល បានដាក់ដេញថ្លៃគម្រោងចំនួន២ រួមមាន៖ ទី១.គម្រោងសាងសង់ផ្លូវបេតុងអាមេ១ខ្សែ ប្រវែង៨៥ម៉ែត្រ ទទឹង៥ម៉ែត្រ កម្រាស់បេតុង០.១៥ម៉ែត្រ ដាក់ក្រួសក្រហមស្មាផ្លូវ និងស្លាកសញ្ញាគម្រោងចំនួន១ ក្នុងតម្លៃប៉ាន់ស្មាន ៥១.៣១៥.៣៥៦រៀល ដោយមានក្រុមហ៊ុនចំនួន៧ បានដាក់សំណើរ ជាលទ្ធផលបានទៅលើក្រុមហ៊ុន ហ៊ត់ ហៀង ក្នុងតម្លៃ ២៧.០០០.០០០រៀល។ ទី២.គម្រោងជួសជុលផ្លូវដីសក្រាលក្រួសធម្មជាតិ១ខ្សែ ប្រវែង៥៨០ម៉ែត្រ ទទឹង៥ម៉ែត្រ កម្រាស់ក្រួស០.១៥ម៉ែត្រ និងស្លាកសញ្ញាគម្រោងចំនួន១ ក្នុងតម្លៃប៉ាន់ស្មាន ៥១.៣៣០.៣៦៦រៀល ដោយមានក្រុមហ៊ុនចំនួន៧ បានដាក់សំណើរ ជាលទ្ធផលបានទៅលើក្រុមហ៊ុន KMMS ខនស្ត្រាក់សិន ក្នុងតម្លៃ ២២.០៤០.០០០រៀល។
ជាមួយនឹងការទទួលបានសិទ្ធនៃការជួសជុល និងសាងសង់ផ្លូវទាំងពីរនេះ តំណាងក្រុមហ៊ុនម៉ៅការទាំងពីរ បានធ្វើការប្ដេជ្ញាចិត្ត ដោយសន្យាសាងសង់ឲ្យត្រឹមត្រូវ ទាន់ពេលវេលា ស្របទៅតាមគំនូរប្លង់បច្ចេកទេស បទដ្ឋានគតិយុទ្ធនៃការសាងសង់ និងគោរពទៅតាមលក្ខណ្ឌដែលចែងនៅក្នុងកិច្ចសន្យា៕
ព័ត៌មានជាតិ ថ្មីៗ
អត្ថបទ និងរូបភាព៖ លោក ស៊ុំ គីន
កែសម្រួល៖ លោក អ៊ុន ណារាជ្យ
