យោងតាមសេចក្ដីប្រកាសព័ត៌មានរបស់គ្រឹះស្ថានអង្គរ នៅថ្ងៃទី១ ខែកក្កដា ឆ្នាំ២០២៤នេះ បានបង្ហាញថា ក្នុងរយៈពេល៦ខែ ឆ្នាំ២០២៤ គ្រឹះស្ថានអង្គរ បានទទួលប្រាក់ចំណូលជាង ២៤លានដុល្លាអាមេរិក ពីការលក់សំបុត្រឱ្យភ្ញៀវទេសចរអន្ដរជាតិចូលទស្សនាតំបន់រមណីយដ្ឋានអង្គរ ជាង ៥ម៉ឺននាក់។
សេចក្ដីប្រកាសព័ត៌មានដដែលបញ្ជាក់ថា ក្នុងរយៈពល៦ខែនេះ មានភ្ញៀវទេសចរទិញសំបុត្រចូលទស្សនារមណីយដ្ឋានអង្គរ ចំនួន ៥២១.៩៥០នាក់ កើនឡើងជាង ៣៥ភាគរយ ធៀបទៅនឹងរយៈពេលដូចគ្នាឆ្នាំ២០២៣ និងទទួលបានប្រាក់ចំណូលចំនួន ២៤.៣៥៧.៦៩៥ដុល្លាអាមេរិក កើនឡើងជិត ៣៦ភាគរយ បើធៀបទៅនឹងរយៈពេលដូចគ្នាកាលពីឆ្នាំ២០២៣កន្លងទៅ។
ក្នុងនោះសម្រាប់រយៈពេល១ខែ ខែមិថុនា ឆ្នាំ២០២៤វិញ មានភ្ញៀវទេសចរអន្ដរជាតិទិញប័ណ្ណចូលទស្សនាតំបន់រមណីយដ្ឋានអង្គរចំនួន ៤៩.៦៩២នាក់ កើនឡើងជាង ២០ភាគរយ បើធៀបនឹងឆ្នាំ២០២៣កន្លងទៅ និងរកចំណូលបានចំនួន ២.១៥០.៨០៤ដុល្លាអាមេរិក កើនឡើងជាង ១៨ភាគរយ ធៀបនឹងរយៈពេលដូចគ្នាកាលពីឆ្នាំ២០២៣។
ដោយឡែកចំពោះការលក់ប័ណ្ណចូលទស្សនាប្រាសាទកោះកែរវិញ រយៈពេល៦ខែនេះ មានចំនួន ១០.៨២៨នាក់ រកចំណូលបាន ១៦២.៤២០ដុល្លា ខណៈដែលមួយខែមិថុនា ឆ្នាំ២០២៤នេះ មានអ្នកទេសចរទិញសំបុត្រចូលទស្សនាចំនួន ៧០១នាក់ រកចំណូលបានចំនួន១០.៥១៥ដុល្លាអាមេរិក៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
