ការដេញថ្លៃគម្រោងសាងសងផ្លូវបេតុងអាមេ២ខ្សែ ក្នុងភូមិពង្រ សង្កាត់ស្រង៉ែ ក្រុងសៀមរាប ត្រូវបានប្រកាសបញ្ចប់ការដេញថ្លៃដោយជោគជ័យ នៅថ្ងៃទី២៦ ខែមិថុនា ឆ្នាំ២០២៤ ដោយមានការចូលរួមពីមន្ត្រីបច្ចេកទេសខេត្ត អាជ្ញាធរស្រុក គណៈកម្មការលទ្ធកម្មសង្កាត់ ក្រុមហ៊ុនម៉ៅការ និងអ្នកពាក់ព័ន្ធជាច្រើនរូប។
លោកស្រី ធិវ រួន ប្រធានគណៈកម្មការលទ្ធកម្មសង្កាត់ស្រង៉ែ ក្រុងសៀមរាប បានឲ្យដឹងថា ចំពោះគម្រោងមូលនិធិសង្កាត់ឆ្នាំ២០២៤នេះ សង្កាត់ស្រង៉ែ បាន ដាក់ដេញថ្លៃគម្រោងសាងសង់ផ្លូវបេតុងអាមេ២ខ្សែ ប្រវែង២៤៣ម៉ែត្រ ទទឹង៥ម៉ែត្រ កម្រាស់០.១៥ម៉ែត្រ ស្លាកសញ្ញាគម្រោងចំនួន២ ក្នុងតម្លៃប៉ាន់ស្មាន ១៥១.៥៧៦.៩២៧រៀល ដោយមានក្រុមហ៊ុនចំនួន៤ បានដាក់សំណើរ។ ជាលទ្ធផលបានទៅលើក្រុមហ៊ុន សករាជ ក្នុងតម្លៃ ១៥០.៧៧៦.០០០រៀល។
ជាមួយនឹងការទទួលបានសិទ្ធនៃការសាងសង់នេះ តំណាងក្រុមហ៊ុនម៉ៅការ បានធ្វើការប្ដេជ្ញាចិត្ត ដោយសន្យាសាងសង់ឲ្យត្រឹមត្រូវ ទាន់ពេលវេលា ស្របទៅតាមគំនូរប្លង់បច្ចេកទេស បទដ្ឋានគតិយុទ្ធនៃការសាងសង់ និងគោរពទៅតាមលក្ខណ្ឌដែលចែងនៅក្នុងកិច្ចសន្យា៕
អត្ថបទ និងរូបភាព៖ លោក ស៊ុំ គីន
កែសម្រួល៖ លោក អ៊ុន ណារាជ្យ
