នៅព្រឹកថ្ងៃទី២៦ ខែមិថុនា ឆ្នាំ២០២៤នេះ ក្រសួងផែនការ បានរៀបចំសិក្ខាសាលាស្ដីពីការជំរុញការអនុវត្តគោលនយោបាយជាតិប្រជាជន ២០១៦-២០៣០ ក្នុងក្របខ័ណ្ឌគោលដៅអភិវឌ្ឍន៍ប្រកបដោយចីរភាពកម្ពុជា ‘‘បញ្ហាប្រជាជន និងយេនឌ័រ” នៅខេត្តសៀមរាប ដើម្បីធ្វើការជំរុញដល់អ្នកពាក់ព័ន្ធឲ្យយល់ដឹង និងចូលរួមចំណែកក្នុងការអនុវត្តនូវគោលនយោបាយជាតិ និងគោលដៅអភិវឌ្ឍន៍ប្រកបដោយចីរភាពរបស់រាជរដ្ឋាភិបាលកម្ពុជា។
ឯកឧត្តមបណ្ឌិត ប៉ូច ប៊ុណ្ណាក់ រដ្ឋលេខាធិការក្រសួងផែនការ មានប្រសាសន៍ថា សិក្ខាសាលានេះគឺជាការជំរុញការអនុវត្តគោលនយោបាយជាតិប្រជាជន ២០១៦-២០៣០ ក្នុងក្របខ័ណ្ឌគោលដៅអភិវឌ្ឍន៍ប្រកបដោយចីរភាពកម្ពុជា ឱ្យកាន់តែមានប្រសិទ្ធភាព តាមរយៈការបញ្ជាបការយល់ដឹងឱ្យទូលំទូលាយដល់អ្នកពាក់ព័ន្ធអំពីទស្សនៈវិស័យ យុទ្ធសាស្ត្រ ផែនការ គោលនយោបាយជាតិ និងគោលដៅអភិវឌ្ឍន៍ប្រកបដោយចីរភាពរបស់រាជរដ្ឋាភិបាល ដោយផ្សារភ្ជាប់ជាមួយនឹងបញ្ហាប្រជាជននិងការអភិវឌ្ឍ រួមមាន៖ បញ្ហាប្រជាជន និងការអភិវឌ្ឍ បញ្ហាបម្រែបម្រួលប្រជាសាស្ត្រ និងភាគលាភប្រជាសាស្ត្រ បញ្ហាទេសន្តរប្រវេសន៍ និងនគរូបនីយកម្ម បញ្ហាអប់រំ ចំណេះដឹង ជំនាញ និងការងារ បញ្ហាសុខភាព បញ្ហាយុវវ័យ បញ្ហាមនុស្សវ័យចាស់ បញ្ហាយេនឌ័រ សុខុមាលភាព និងសុខភាពបន្តពូជយុវវ័យ។
ឯកឧត្តម ប៉ូច ប៊ុណ្ណាក់ ក៏បានបញ្ជាក់ថា នៅឆ្នាំ២០៥០ កម្ពុជានឹងមានប្រជាជនប្រមាណជាង២២លាននាក់ ដែលក្នុងនោះប្រជាជនអាយុក្រោម១៥ឆ្នាំ មាន៣,៤លាននាក់ ស្មើនឹង១៦% ប្រជាជនអាយុ១៥-៦៤ឆ្នាំ មាន១៤,៧លាននាក់ ស្មើនឹង៦៧% និងប្រជាជនអាយុ៦៥ឆ្នាំឡើង មាន៣,៧លាននាក់ ស្មើនឹង១៧% ប្រជាជនវ័យចាស់នឹងចាប់ផ្តើមមានចំនួនច្រើនជាងប្រជាជនវ័យក្រោម១៥ឆ្នាំ ជាបណ្តើរៗចាប់ពីឆ្នាំ២០៤៨ទៅ។ ចំនួននេះ ពិតណាស់ទាមទាឲ្យអ្នកពាក់ព័ន្ធត្រូវគិតគូរអំពីយុទ្ធសាស្រ្តគោលនយោបាយប្រជាជន ដើម្បីជំរុញកំណើតទៅថ្ងៃអនាគត ខណៈបច្ចុប្បន្នកម្ពុជាកំពុងបន្តមានបន្ទុកសេដ្ឋកិច្ចធូរស្រាល យើងត្រូវយកចិត្តទុកដាក់ឱ្យបានខ្លាំងក្លាជាទីបំផុតទៅលើការទាញយកអត្ថប្រយោជន៍ភាគលាភ ប្រជាសាស្ត្រ និងភាគលាភយេនឌ័រឱ្យបានជាអតិបរមា ដើម្បីការអភិវឌ្ឍសេដ្ឋកិច្ចបានលឿនជាងមុន ដូចមានចែងក្នុងគោលនយោបាយជាតិប្រជាជន២០១៦-២០៣០ និងយុទ្ធសាស្ត្របញ្ជាកោណដំណាក់កាលទី១។
មានប្រសាសន៍ក្នុងឱកាសនោះដែរ លោក សុខ ថុល អភិបាលរងខេត្តសៀមរាប បានបង្ហាញ់ក្ដីជឿជាក់ថា អ្នកពាក់ព័ន្ធដែលបានចូលរួមក្នុងសិក្ខាសាលានេះទាំងអស់នឹងទទួលបាននូវចំណេះដឹង និងបទពិសោធន៍ថ្មីៗ ដើម្បីជាទុនបន្ថែមសម្រាប់រៀបចំ និងអនុវត្តការងារ ការរៀបចំគ្រួសារ និងការរស់នៅរបស់ខ្លួនឱ្យបានរុងរឿងនៅក្នុងសង្គមកម្ពុជា ដែលពោរពេញដោយសន្តិភាព និងការរីកចម្រើនឥតឈប់ឈរ។ លោក៏សុំសូមស្នើដល់អង្គសិក្ខាសាលាទាំងមូល ចូលរួមស្វែងយល់ និងពិភាក្សាឱ្យបានផុលផុស និងស៊ីជម្រៅទៅលើខ្លឹមសារនៃបទបង្ហាញក្នុងអង្គសិក្ខាសាលានេះ ធ្វើយ៉ាងណាជួួយជំរុញដល់ការអនុវត្តនូវគោលនយោបាយជាតិ និងគោលដៅអភិវឌ្ឍន៍ប្រកបដោយចីរភាពរបស់រាជរដ្ឋាភិបាលកម្ពុជា សំដៅលើកកម្ពស់គុណភាពនៃជីវិត និងសុខមាលភាពរបស់ប្រជាជន និងកាត់បន្ថយអត្រាភាពក្រីក្រនៅកម្ពុជា៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ