នារសៀលថ្ងៃទី២៤ ខែមិថុនា ឆ្នាំ២០២៤ ឯកឧត្តម អភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញបិទសន្និបាតថ្នាក់ជាតិបូកសរុបការងារបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ និងការងារបោះឆ្នោតជ្រើសរើសក្រុមប្រឹក្សារាជធានីខេត្ត ក្រុងស្រុកខណ្ឌ អាណត្តិទី៤ ឆ្នាំ២០២៤ នៅខេត្តសៀមរាប ដោយមានការចូលរួមពីថ្នាក់ដឹកនាំ និងអ្នកពាក់ព័ន្ធជាច្រើនរូប។
ក្នុងឱកាសនោះ ឯកឧត្តម អភិសន្តិបណ្ឌិត ស សុខា បានវាយតម្លៃខ្ពស់ ចំពោះថ្នាក់ដឹកនាំ និងមន្ត្រីគណៈកម្មាធិការជាតិរៀបចំការបោះឆ្នោត (គ.ជ.ប) គ្រប់លំដាប់ថ្នាក់ អាជ្ញាធរ កងកម្លាំងប្រដាប់អាវុធ គណបក្សនយោបាយ សមាគមអង្គការនានា ព្រមទាំងអ្នកបោះឆ្នោតទាំងអស់ដែលបានអនុវត្តតាមតួនាទី និងគោរពយ៉ាងខ្ជាប់ខ្ជួនតាមច្បាប់ស្តីពីការបោះឆ្នោត បទបញ្ជា និងនីតិវិធីក្រមសីលធម៌សម្រាប់ការបោះឆ្នោតគ្រប់ដំណាក់កាល និងផ្តល់កិច្ចសហការគាំទ្រគ្នាទៅវិញទៅមកធ្វើឱ្យការបោះឆ្នោតទាំងពីរនេះបានប្រព្រឹត្តិទៅរលូន សេរី ត្រឹមត្រូវ យុត្តិធម៌ តម្លាភាព គ្មានអំពើហិង្សា និងមានសុវត្ថិភាពយ៉ាងល្អប្រសើរ ហើយលទ្ឋផលនៃការបោះឆ្នោតនេះក៏ត្រូវបានគណបក្សនយោបាយនានាដែលចូលរួមប្រកួតប្រជែងទទួលស្គាល់ផងដែរ។
ឯកឧត្តម ឧបនាយករដ្ឋមន្ត្រី មានប្រសាសន៍ថា ការបោះឆ្នោតដ៏មានសារៈសំខាន់ទាំងពីរនេះ បានជះឥទ្ឋិពលមកលើប្រព័ន្ឋនយោបាយ និងការគ្រប់គ្រងរដ្ឋបាលសាធារណៈនៅកម្ពុជា ដូចជាការពង្រឹងពង្រីកលទ្ឋិប្រជាធិបតេយ្យសេរីពហុបក្ស និងនីតិរដ្ឋ លើមូលដ្ឋាននៃស្មារតីបង្រួបបង្រួមជាតិ និងសុខដុមរមណីយកម្មជាតិទាំងមូល ក្រោមដំបូលសន្តិភាពនិងការអភិវឌ្ឍ។ ការបន្តអនុវត្តកំណែទម្រង់អភិបាលកិច្ចនៅថ្នាក់ក្រោមជាតិដែលត្រូវគ្រប់គ្រងតាមគោលការណ៍នៃរដ្ឋបាលឯកភាព ដើម្បីបង្កើត ជំរុញ និងធ្វើឱ្យមានចីរភាពដល់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិដែលកត្តានេះនឹងនាំមកនូវការចូលរួមក្នុងការពង្រឹងពង្រីកដំណើរការលទ្ឋិប្រជាធិបតេយ្យ សេរីពហុបក្សឱ្យចាក់គ្រឺះរឹងមាំរហូតដល់ថ្នាក់មូលដ្ឋាន នាំមកនូវការផ្លាស់ប្តូររចនាសម្ព័ន្ឋ និងប្រព័ន្ឋគ្រប់គ្រងរដ្ឋបាលសាធារណៈនៅកម្ពុជា តាមបែបផែនវិមជ្ឈការ និងវិសហមជ្ឈការ និងការលើកកម្ពស់ការចូលរួម និងភាពជាម្ចាស់របស់ប្រជាពលរដ្ឋគ្រប់មូលដ្ឋានក្នុងការអភិវឌ្ឍមូលដ្ឋានរបស់ខ្លួន សំដៅចូលរួមកាត់បន្ថយភាពក្រីក្រ និងលើកកម្ពស់គុណភាពនៃជីវិតរបស់ប្រជាពលរដ្ឋក្នុងសហគមន៍នានាក្នុងមូលដ្ឋាន។
ឯកឧត្តមមានប្រសាសន៍ទៀថា ការបោះឆ្នោះកាលពីពេលកន្លងទៅនេះដែរ គឺជាសមិទ្ឋផលថ្មីមួយទៀតដែលបានឆ្លុះបញ្ចាំងឱ្យឃើញច្បាស់អំពីជំហានទៅមុខដ៏រឹងមាំ គ្មានអ្វីអាចមកបន្ទុចបង្អាក់ដំណើរការលទ្ឋិប្រជាធិបតេយ្យ សេរី ពហុបក្ស និងនីតិរដ្ឋនៅកម្ពុជា។ ទន្ទឹមនឹងនេះក្រសួងមហាផ្ទៃក៏កំពុងរៀបចំវគ្គបណ្តុះបណ្តាលតម្រង់ទិសដល់សមាជិកក្រុមប្រឹក្សាដែលទើបជាប់ឆ្នោតថ្មី ដើម្បីឱ្យសមាជិកក្រុមប្រឹក្សាដែលមកពីគណបក្សនយោបាយផ្សេងគ្នា សហការរួមគ្នានៅក្នុងក្រុមប្រឹក្សារបស់ខ្លួន បន្តជំរុញកំណែទម្រង់អភិបាលកិច្ចតាមបែបប្រជាធិបតេយ្យនិងវិមជ្ឈការនៅមូលដ្ឋាន សំដៅលើកកម្ពស់ការផ្តល់សេវានិងការអភិវឌ្ឍមូលដ្ឋានប្រកបដោយប្រសិទ្ឋភាពខ្ពស់។
បើតាមឯកឧត្តម ប្រាជ្ញ ចន្ទ ប្រធានគណៈកម្មាធិការជាតិរៀបចំការបោះឆ្នោត បានបញ្ជាក់ថា ឆ្លងកាត់រយៈពេលមួយថ្ងៃ អង្គសន្និបាតបានប្រមូលផ្តុំ និងពិភាក្សាលើប្រធានបទសំខាន់ៗសម្រាប់ការបោះឆ្នោត រួមមាន៖ ១.ការចុះឈ្មោះបោះឆ្នោត និងការរៀបចំបញ្ជីបោះឆ្នោត, ២.ការចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះ, ៣.ការគ្រប់គ្រងប្រព័ន្ឋផ្សព្វផ្សាយក្នុងដំណើរការបោះឆ្នោត និងការឃោសនាបោះឆ្នោត, ៤.កិច្ចសហការបោះឆ្នោត រាប់សន្លឹកឆ្នោត ត្រួតពិនិត្យផ្ទៀងផ្ទាត់ និងបូកសរុបលទ្ឋផលនៃការបោះឆ្នោត និង៥.នីតិវិធីនៃការដាក់ ការទទួលនិងការដោះស្រាយពាក្យបណ្តឹងក្នុងដំណើរការបោះឆ្នោត។ ទន្ទឹមនឹងនេះ អង្គសន្និបាតបានរកឃើញចំណុចខ្លាំងដែលជាបទពិសោធសម្រាប់អនុវត្តបន្តជាច្រើនចំណុច ជាមួយគ្នានេះអង្គសន្និបាតក៏បានរកឃើញនូវចំណុចខ្វះខាតមួយចំនួនក្នុងដំណើរការបោះឆ្នោតផងដែរ៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
