ក្រុមអ្នកផលិតផលិតផលនានាដែលបានយកមកដាក់តាំងបង្ហាញបានលើកឡើងថា វេទិកាផ្គូផ្គងរវាងអ្នកផលិត និងអ្នកទិញ ដែលរៀបចំឡើងដោយគណៈកម្មាធិការជាតិជំរុញចលនាភូមិមួយ ផលិតផលមួយ បានក្លាយជាព្រឹត្តិការណ៍ផ្សព្វផ្សាយផលិតផលក្នុងស្រុក និងបានធ្វើឲ្យអាជីវកម្មរបស់ពួកគាត់ដំណើរការបានល្អ។
ម្ចាស់សហគ្រាស ជេអឹមអិលអេច (JMLH) ផលិតផលអាហារសុខភាព ដែលកែច្នៃពីបន្លែផ្លែឈើក្នុងស្រុក មកពីខេត្តបាត់ដំបង លោកស្រី សេង សំណាង បានលើកឡើងថា ការរៀបចំវេទិកាផ្គូផ្គងរវាងអ្នកផលិតនិងអ្នកលក់ពិតជាមានសារៈសំខាន់ណាស់ ព្រោះវេទិការនេះជាការជួបប្រជុំគ្នារវាងអ្នកផលិតនៅទូទាំងប្រទេស បានជួបគ្នាជាមួយអ្នកទិញ ហើយក៏ជាឱកាសដែលអ្នកផលិតទាំងអស់ មានលទ្ធភាពបង្ហាញនូវផលិតផលដែលជាស្នាដៃកូនខ្មែរពិតៗ ហើយក៏សូមឲ្យបងប្អូនមានការគាំទ្រទាំងអស់គ្នា។
ចំណែកលោកស្រី ប៉ាន់ សុផាវី ម្ចាស់សិប្បកម្មកែច្នៃផលិតផលអំពីឫស្សី នៅក្នុងស្រុកប្រាសាទបាគង ក៏បានលើកឡើងដែរថា សម្រាប់ការតាំងបង្ហាញផលិតផលរបស់អ្នកស្រីនៅពេលនេះ ហាក់បង្ហាញសញ្ញាណល្អជាងបណ្តាវេទិការមុនៗ ព្រោះថាកាលពីកន្លងទៅ ផលិតផលរបស់លោកស្រីមានតែអ្នកទិញរាយ ទិញប្រើ ប៉ុន្តែសម្រាប់លើកនេះ មានគេចាប់អារម្មណ៍និងធ្វើការទំនាក់ទំនងទិញយកទៅលក់បន្ត។ លោកស្រីបានសម្តែនូវការអរគុណចំពោះរាជរដ្ឋាភិបាលកម្ពុជា ដែលបង្កើតឲ្យមានគណៈកម្មាធិការជាតិជំរុញចលនាភូមិមួយផលិតផលមួយ ដែលផ្តល់ឱកាសឲ្យអ្នកលក់និងអ្នកផលិតបានជួបគ្នា ហើយក៏បានសំណូមពរដល់ប្រជាពលរដ្ឋ ជួយគាំទ្រផលិតផលក្នុងស្រុក ដែលជាចំណែកមួយលើកកម្ពស់សេដ្ឋកិច្ចរបស់ពលរដ្ឋក៏ដូចជាសេដ្ឋកិច្ចជាតិដែរ។
សូមជម្រាបថា វេទិការផ្គូផ្គងរវាងអ្នកផលិត និងអ្នកទិញមានរយៈពេល៣ថ្ងៃ ចាប់ពីថ្ងៃទី២១-២៣ ខែមិថុនា ឆ្នាំ២០២៤ នៅទីតាំងផ្សារម៉ាក្រូ ខេត្តសៀមរាប ដែលវេទិការនេះមានការតាំងបង្ហាញ-លក់ ផលិតផលក្នុងស្រុក ដើម្បីបំផុសស្មារតីអ្នកផលិត និងអ្នកប្រើប្រាស់ ចូលរួមគាំទ្រ លើកស្ទួយផលិតផលក្នុងស្រុក តាមរយៈការរកទីផ្សារ ការបង្កើតឱកាសធុរកិច្ចដល់ផលិតករ សិប្បករ កសិករ ពិសេសការបង្ហាញពីផលិតផលថ្មីៗដែលជាស្នាដៃរបស់ខ្មែរ និងផ្សព្វផ្សាយឲ្យមានការចូលរួមគាំទ្រចលនាភូមិមួយ ផលិតផលមួយកម្ពុជា។
ឯកឧត្តមបណ្ឌិត សួង ណយ អគ្គលេខាធិការរង នៃគណៈកម្មាធិការជាតិជំរុញចលនាភូមិមួយផលិតផលមួយ មានប្រសាសន៍ថា ការរៀបចំវេទិកាផ្គូផ្គងរវាងអ្នកផលិតនិងអ្នកទិញនេះគឺទាមទារឱ្យមានការសាមគ្គី ឈរលើគោលការណ៍ សុចរិតភាព គុណភាព អនាម័យ និងរក្សាតម្លៃទៅតាមស្តង់ដារតម្លៃទីផ្សារ និងទាមទារឱ្យមានការចូលរួមយ៉ាងសកម្មផងដែរពី ក្រសួង អង្គភាពមន្ទីរស្ថាប័នពាក់ព័ន្ឋ ធ្វើយ៉ាងណាជំរុញឱ្យមានការអភិវឌ្ឍផលិតផលថ្មីៗក៏ដូចជាពង្រឹងគុណភាព និងសមត្ថភាពពាណិជ្ជកម្មនៃផលិតផលដែលមានស្រាប់។ ឯកឧត្តមបានជំរុញដល់ម្ចាស់អាជីកម្ម ក៏ដូចជាប្រជាពលរដ្ឋទូទៅចូលរួមប្រើប្រាស់ និងទិញផលិតផលក្នុងស្រុក ឲ្យដូចពាក្យស្លោកថា ទិញផលិតផលខ្មែរស្នេហាជាតិ ទិញទិញផលិតផលខ្មែរឈ្នះៗទាំអស់គ្នា។
លោក យុន លីនណេ អភិបាលរងខេត្ដសៀមរាប ក៏បានលើកឡើងដែរថា វេទិកាថ្ងៃនេះធ្វើឡើងដើម្បីឱ្យអ្នកផលិត និងអ្នកទិញ បានជួបគ្នានឹងធ្វើបទបង្ហាញពីផលិតផលរបស់ខ្លួន និងការរកទីផ្សារផលិតផលក្នុងស្រុក ព្រមទាំងការចងក្រងផលិតករ សេវាករ និងសិប្បករ នៅតាមមូលដ្ឋានឱ្យចូលជាសមាជិកចលនាភូមិមួយផលិតផលមួយ និងអង្គភាព-ស្ថាប័នពាក់ព័ន្ធ ដែលជាសមាជិកគណៈកម្មាធិការជាតិជំរុញចលនាភូមិមួយផលិតផលមួយ។ លោកបានបញ្ជាក់ថា គោលបំណងដូចបានជម្រាបជូនខាងលើនេះ រដ្ឋបាលខេត្ត ក៏ដូចជាគណៈកម្មាធិការជំរុញចលនាភូមិមួយ ផលិតផលមួយ ខេត្តសៀមរាប និងក្រុមលេខាធិការដ្ឋាន ដែលជាជំនួយការឱ្យគណៈកម្មាធិការ សូមគាំទ្រ និងចូលរួមផ្សព្វផ្សាយ និងជម្រុញការអនុវត្តចលនាភូមិមួយ ផលិតផលមួយ ឱ្យបានជោគជ័យ ដើម្បីរួមចំណែកអនុវត្តគោលនយោបាយរបស់រាជរដ្ឋាភិបាលឱ្យទទួលបានជោគជ័យ៕
អត្ថបទ និងរូបភាព៖ លោក ជា ស្រស់ , ធន់ ពូថេ
កែសម្រួល៖ លោក អ៊ុន ណារាជ្យ
